Read Sehwi Anyandera 17 Bible Online

Anyandera 17 - Sehwi bible

Anyandera 17

¹ Edi nzammoa bɔ wawo ná wɔ so anu tɔ wɔ a, ɔte paa tra awuro bɔ afɔleɛbɔlɛ ngome, nakoso nu te ngondii ɔ.

²Kanganiɛ bɔ ɔse nworɛ ne, okoli baa bɔ ɔbɔ nyanzoen bra so tumi, na okonya aliɛmaa nemɔ b’agyapadeɛ ne bie.

³Bɛfa bokyea bɛpɔ ɛdwetɛ nwo, yeɛ bɛfa afaa bɛpɔ sikaa kɔkorɛ nwo, nakoso AWURADE yeɛ oso adwene nea ɔ.

⁴Nzɛmmɔneniɛ tie nnakannakafoɛ bɛ noa dwirɛ, yeɛ ngondomboniɛ koso tie sona bɔ ɔte kanda ɔ dwirɛ.

⁵ Ɛgoro sona bɔ ɔyɛ anwumvo nwo a, né agua ye Nyameɛ bɔ ɔbɔle ye ne nyunu ase, yeɛ sona bɔ edwirɛ to obiɛngo a ɔyɛ ye fɛ ne, ɔngɔfa ye nwo ngoli tɔtorɔtɔɔ.

⁶ Nnomaa te nworowaa b’abotire, yeɛ mmaa b’animnyam ole bɛ baba.

⁷Kwaseaa nze edwirɛ bɔ bɛkã ye kama ɔ, yeɛ nnakannaka dwirɛ hanɛ koso mvata dehyeɛ.

⁸Fea-ase-ma ɔte kyɛ tafo wɔ sona bɔ ɔfa ma ne nye so, nekaa biala bɔ sɔ sona ne kowura ne, nningyein kɔ yé ma ye.

⁹Sona fa mvomsoɛ kyɛ a, né ɔpena koyɛlɛ, nakoso bɔ ɔsɔ dwirɛ nu a ɔnyakyi ne de, ɔtete abiɛngoɛ nu.

¹⁰Sɛ etwi badwemma nyunu a, ɔkɔ ye nu tra kyɛ ekofi kwaseaa mbire ɛyaa ɔ.

¹¹Bɔnefoɛ mbena hwee te kyɛ ɛlɔenyɛlɛ, yiti bɛkɔsoma ɛbɔfoɛ atianuserɛniɛ maa ɔkɔhɔ ye so.

¹²Ɔte paa kyɛ ɛne kwabrafo bɔ bahye ye mma ɔ bɛkɔbɔ numbunumbu tra kyɛ ɛne kwaseaa bɔ ye gyiminɛ awa ɔ kɔbɔ numbunumbu ɔ.

¹³Sona bɔ ɔfa bɔne tua paa so ne, bɔne ngɔpa ye awuro le.

¹⁴Ngondii bohyɛlɛ te kyɛ asue bɔ batikye ye ɔ, yiti anzana ɔkɔkakyi ngondii bɔ nu yɛ se nen, pɛ so.

¹⁵ Ebiala bɔ obua bɔnefoɛ be, ɔne ebiala bɔ obua teneneeniɛ fɔ ne, AWURADE kyi bɛ munyɔ kɔkɔkɔkɔ.

¹⁶Mvasoɛ beni yeɛ ɔwɔ so kyɛ kwaseaa kotua sikaa kɔtɔ nworɛ, wɔ aberɛ bɔ onnya ɔyyɛle ye adwene kyɛ okosua nworɛ ɔ?

¹⁷ Adamvoa kuro wɔ dwirɛ mmerɛ biala, yeɛ w’amaneɛnwunɛ nu ti yeɛ bɛwole eliɛma ɔ.

¹⁸Sona bɔ adwene nne ye ti anu ne, ye yeɛ odi kerɛ nu agyinamuɛ ɔ, ná afei odi ebie mbaen agyinamuɛ ɔ.

¹⁹Sona bɔ okuro ngondii ne, okuro mmeraatolɛ, yeɛ sona bɔ ɔfa anwomasoɛ anoa otua ye awuro noa ne, ɔtwetwe amaneɛ brɛ ye nwo.

²⁰Sona bɔ ɔte kanda ne, onyie ye yé, yeɛ nnakannaka sona wora musue to ye.

²¹Sona bɔ ɔwo kwaseaa ne, odi aworabɔlɛ, na baa bɔ wagyimi wora, ye baba nye ngye.

²²Sona nye gye a, ɔte ayire paa, nakoso aworabɔlɛ de, ɔkweekwee mmowue nu.

²³Bɔnefoɛ ɔfea ye nwo ode fea-ase-ma, kyɛ ogyina so obua ndɛengyea.

²⁴Badwemma sona fa nworɛ sie ye nye so, nakoso kwaseaa de, ye adwene la nekaa bie dededede.

²⁵Baa bienzua kwaseaa ma ye baba di aworabɔlɛ, na ɔma ye maame bɔ ɔwole ye ne teetee.

²⁶Ɔtte mayee kyɛ bɛkɔbɔ sona bɔ odi be ɔ kerɛ, yeɛ onni kyɛ sona titire ye nahorɛlilɛ ti bɛbo ye ɔ.

²⁷ Sona bɔ ole nimdeɛ ne, ondwudwo pee, yeɛ sona bɔ ole aboterɛ ne, ɔte badwemma.

²⁸Kwaseaa po, sɛ omua ye noa a, mmenia bu ye nworɛniɛ, yeɛ sɛ wammukye ye noa a, bebu ye badwemma.