Read Sehwi Anyandera 18 Bible Online

Anyandera 18 - Sehwi bible

Anyandera 18

¹Sona bɔ ɔpena ye ngome ye yeeyɛlɛ ne, ɔpena ye ngome ye deɛ, na onne nzusuleɛ paa biala ndo nu.

²Kwaseaa nye ngye kyɛ okonya nimdeɛ ɔ, na mmom bɔ ɔwɔ ye adwene nu angome yeɛ ɔkã ɔ.

³Nzɛmmɔne ne animtia yeɛ bɛnate ɔ, yeɛ nyanzoen bra ne animguaseɛ yeɛ bɛnate ɔ.

⁴Sona noa dwirɛ te kyɛ asue buma, yeɛ nworɛ dwirɛ te kyɛ asue bɔ ɔsẽ ɔ.

⁵ Ɔtte mayee kyɛ ɛkɔma bɔnefoɛ koli be, ná ekobua teneneeniɛ ndɛengyea ɔ.

⁶Kwaseaa dwudwolɛ ma ngondii ba, yeɛ ye noa dwirɛ frɛfrɛ ɛbolɛ.

⁷Kwaseaa ye dwudwolɛ fa ye kɔ amaneɛ nu, na ye noa dwirɛ sua ye kra ngaen.

⁸Nzekurebɔlɛniɛ ye noa dwirɛ te menemene, na edwirɛ ne woroworo wɔ.

⁹Sona bɔ ɔte foen wɔ ye adwuma nwo ne, oliɛma ole sona bɔ ɔsɛkye nningyein ɔ.

¹⁰ AWURADE dumaa ne te abandenden pindinn, nu yeɛ teneneeniɛ nwati kɔbɔ ye nwo waen maa onya ye ti didi nu ɔ.

¹¹Sikaniɛ anwonya yeɛ ɔte ye kuro bɔ wato ye nwo fasue ɔ, osusu kyɛ ɔte fasue tendenn.

¹²Anwomasoɛ mma onyie sona yé, na anwobrɛaseɛ ne animnyam yeɛ bɛnate ɔ.

¹³Sona bɔ ondie edwirɛ nyie koraka né wabua ye nwo bie ne, ɔmaa ɔyɛ kwaseaa, na ogua ye nyunu ase.

¹⁴Sona nde apɔ a, ye sunzum maa ogyina anwonyerɛ ne noa, nakoso sunzum bɔ ye wora abɔ de, nwa yeɛ ɔkɔhora kogyina sɔ tebea ne noa ɔ?

¹⁵Sona badwemma osua nimdeɛ, yeɛ nworɛfoɛ bɛ so pena nimdeɛ.

¹⁶Sona akyɛdeɛ bukye atee ma ye, na ɔmaa onya atee kɔ mmeni titire nyunu.

¹⁷Sona di moa bɔ ye nguro a, ɛnwanzɛ odi be kɔpem kyɛ bɔ ɔne ye bɛbɔ nguro ne kobisabisa ye dwirɛ ɔ.

¹⁸Serewagualɛ ma aporowaa so pɛ, na obua tumifoɛ mɔ b’afia ndɛen.

¹⁹Aliɛmaa bɔ ayɛ ye tɛɛ ne, ɔyɛ se kyɛ ɔne wɔ bɛkɔyɛ ko, tra kyɛ ekoli kuro bɔ bato ye nwo fasue so ngonim ɔ, na bɛ ngondii te kyɛ mmuralɛ bɔ ɔbrambram sua anoa asi ɔ.

²⁰Sona noa dwirɛ ma ye ko yi, ye noa dwirɛ ma ye nwo tɔ ye.

²¹ Sona noa dwirɛ maa onya ewue anaa ngoa, na bɔ okuro edwudwolɛ ne, onya ye nwo amaneɛ.

²² Bienzua bɔ okonya yeɛ ne, wanya nikye paa, na AWURADE alo ye.

²³Ehianiɛ noa dwirɛ te kyerɛpalɛ, nakoso sikaniɛ de, ɔma mmuayɛɛ fumfum.

²⁴Abiɛngoɛ biemɔ fa sona kɔ sɛkyelɛ nu, nakoso abiɛngoɛ bie bata wɔ tra aliɛmaa.