Read Sehwi Anyandera 2 Bible Online

Anyandera 2 - Sehwi bible

Anyandera 2

¹Mma, sɛ etie me dwirɛ, ná ɛma me mmeraa dwirɛ nemɔ ka wɔ ti anu,

²sɛ ɛyɛ asoɛ tie nworɛ dwirɛ, ná ɛma w’adwene nya ndeaseɛ,

³amba, sɛ ɛtea nu frɛ kyɛ ɛpena adwene bɔ nu pi, ná ɛma wɔ komvi so kyɛ ɛpena ndeaseɛ,

⁴sɛ ɛpena ye si atee kyɛbɔ ɛpena ɛdwetɛ, ná ɛpena ye kyɛ agyapadeɛ bɔ bafa bafea ɔ hɔ a,

⁵ye de ɛkɔte kyɛbɔ AWURADE surolɛ osi te ɔ bo, na ekonya Nyameɛ nwo nimdeɛ.

⁶Ofikyɛ AWURADE yeɛ ɔma nworɛ ɔ, na ye noa nu yeɛ nimdeɛ ne ndeaseɛ fi ba ɔ.

⁷Ɔfa nworɛ bɔ nu pi ɔ osie ma teneneefoɛ, ɔte akokyɛm ma bɛ bɔ bɛ bra te sannwuu ɔ;

⁸ɔbɔ ndɛenbualɛ turoloo nwo waen, na ɔnea ye anwoteefoɛ b’atee bɔ bɛnate so ɔ so.

⁹Na afei ɛkɔte tenenee, nahorɛlilɛ, pɛpɛɛpɛyɛlɛ ne atee bɔ ɔte paa biala bo.

¹⁰Ofikyɛ ekonwu nworɛ, nimdeɛ kɔma wɔ kra nye kɔgye,

¹¹adwene nu bukyelɛ kɔnea wɔ so, na ndeaseɛ kɔbɔ wɔ nwo waen;

¹²ɔkɔpepɛ kole wɔ kofi bɔne atee so, kofi mmenia bɔ bɛ noa dwirɛ te kanda ɔ bɛ sa nu,

¹³kofi bɛ bɔ bali nahorɛ atee nwo makyebu baafa awosii atee so ɔ bɛ sa nu.

¹⁴Sɔ mmenia ne, bɛ nye gye bɔneyɔlɛ nwo, na bɛ kanda bra tɛɛ ne yeɛ ɔma bɛ anika ɔ.

¹⁵B’atee te kanda atee, na bɛ suban te nnakannaka.

¹⁶Nworɛ kole wɔ kofi brasua sanzaniɛ sa nu, kofi gyanderaniɛ bɔ ye noa dwirɛ te menemene ɔ sa nu.

¹⁷Ye bɔ wapo ye ndaluwa nu biaa, ná wama ye wora afi ye Nyameɛ apam ne ɔ.

¹⁸Ofikyɛ ye awuro diedie sona kɔ ewue nu, na ye atee fa sona kɔ ɛborɔ.

¹⁹Ebiala bɔ ɔkɔ sɔ braa ne nekaa ne, onza mma ko, yeɛ ɔmbe ngoa atee so ko.

²⁰Yiti agyirɛ bɔ mmeni paa betu ne, tu bie, ná fa teneneefoɛ b’atee ne aso bie.

²¹Ofikyɛ bɛ bɔ bɛ bra te sannwuu ne yeɛ bɛkɔtena aseɛ ne aso ɔ, bɛ bɔ bɛ nwo te ne yeɛ bɛkɔtena so ɔ;

²²nakoso bɔnefoɛ de, bekonua bɛ boso bekofi aseɛ so, na amumuyɛɛfoɛ wora, bɛkɔprapra bɛ boso bekofi so.