Read Sehwi Anyandera 24 Bible Online

Anyandera 24 - Sehwi bible

Anyandera 24

¹Nnɛma wɔ nye boro bɔnefoɛ, yeɛ nnɛmaa ɔyɛ wɔ nyemene kyɛ ɛne bɛ kɔbɔ afɛ ɔ;

²ofikyɛ bɛbɔ porɛ tɛɛ, na bɛ noa kekã musue dwirɛ.

³Sona fa nworɛ yeɛ osi sua ɔ, na bɛfa ndeaseɛ yeɛ bɛmaa ogyina ɔ;

⁴bɛfa nimdeɛ so yeɛ bɛfa anwodeɛ nyɔboɛserɛ nyemenenyemene amukoraa besiesie ye pumbu nemɔ anu ɔ.

⁵Bienzua bɔ ɔse nworɛ ne, ole anwoserɛ, yeɛ bɔ ole nimdeɛ ne koso, onya anwoserɛ mmɔhoɛ mmɔhoɛ;

⁶ofikyɛ ɛyɔ nhyehyɛleɛ paa koraka né ahɔ koɛ, na ngonimlilɛ gyi foɛtulɛfoɛ pee so.

⁷Nworɛ te nikyee bɔ ɔbo ngwaseafoɛ adwene so, kwaseaa dwu nekaa bɔ bedi dwirɛ a, ommukye ye noa.

⁸Sona bɔ ɔbɔ porɛ tɛɛ ne, bɛfrɛ ye busueniɛ.

⁹Ngwaseasɛm nwo adwene falɛ te bɔne, yeɛ ngorohoɛniɛ te mmenia akyiwadeɛ.

¹⁰Kyẽa bɔ edwirɛ kɔto wɔ ne, sɛ w’aba nu bu a, ye de né w’anwoserɛ te kãa.

¹¹ Sɛ ambepɛ anne bɛ bɔ babua bɛ ndɛengyea bɛkwaahũ bɛ, bɛ bɔ babua bɛ kumfɔ bɛkwaahũ bɛ a;

¹²ná sɛ ɛkã kyɛ, “Tie, né yɛnze” a, Nyameɛ bɔ ɔse sona ti anu dwirɛ ne, aso onnwuni wɔ anaa? Ye bɔ ɔnea wɔ kra so ne, aso ɔnze anaa? Aso ongotua ebiala kerɛ kyɛbɔ ye yɔleɛ te anaa?

¹³Mma, di woɛ, ofikyɛ ɔte paa, ná di woɛ bɔ ɔwɔ nzasameɛ nu bɔ ɔyɛ wɔ temverema so fɛfɛɛfɛ ne.

¹⁴Nwu ye kyɛ, sɔ ala yeɛ nworɛ te ma wɔ kra ɔ, sɛ enwu ye a, ekonya so mvasoɛ kyẽa bie, na w’anyelasoɛ ne bo ngɔpɛ.

¹⁵O, bɔnefoɛ, nnɛtɛ teneneeniɛ wɔ ye awuro, nnɛbɔ apaa wɔ ye nekaa bɔ ɔte ɔ,

¹⁶ ofikyɛ, teneneeniɛ kɔhora kofĩ ase pɛen nzoo, nakoso osa dwɔso, nakoso bɔnefoɛ de, musue to ye ma ye ayieleɛ yie ye.

¹⁷ Wɔ pɔfoɛ fĩ ase a, nnɛmaa ɔyɛ wɔ fɛ, yeɛ sɛ osoti koso a, nnɛma wɔ nye gye,

¹⁸ɔba ye sɔ a, AWURADE konwu ye, ɔngɔyɛ ye fɛ, na ɔkɔyakyi ye yaa bɔ wafɛ wɔ ye so ne.

¹⁹Nnɛha wɔ nwo wɔ bɔnefoɛ nwo, nnɛma wɔ nye boro amumuyɛɛfoɛ,

²⁰ofikyɛ bɔnefoɛ ayieleɛ ngoyie ye yé, na bɔnefoɛ kanea konua.

²¹Mma, suro AWURADE ne ɛhene ne, na nnɛfa wɔ nwo bɔ mmenia bɔ bɛyɛ lɔen ne,

²²ofikyɛ amaneɛ kɔto bɛ mvum nu, na nwa yeɛ ɔse asohwenɛ bɔ ofi bɛ munyɔ bɛ berɛ kɔwa ne ɔ?

²³ Nworɛniɛ ne, ɛhemɔ koso te ye noa dwirɛ: Ɔtte mayee kyɛ ekobua ndɛengyea ɔ.

²⁴Ebiala bɔ okose bɔnefoɛ kyɛ, “Edi be” nen, mmenia kɔnoma ye, na maen maen kohyi ye.

²⁵Nakoso bɛ bɔ bɛtwe bɔnefoɛ so de, okoyie bɛ yé, na bekonya saleɛ piri.

²⁶Sona bɔ ɔma mmuayɛɛ paa ne, ɔte kyɛ sona bɔ wayɛ wɔ atuu ɔ.

²⁷Siesie w’adwuma wɔ nekaa bie, duadua wɔ fieso nningyein yie, ná afei asi w’awuro.

²⁸ Nnɛdi adanzewia tia ebiɛngo, yeɛ nnɛfa wɔ noa kekã nnakannaka dwirɛ.

²⁹Nnɛkã kyɛ, “Edwirɛ bɔ wafa wali me ne, me koso ngɔfa bie ngoli ye, bɔ wayɔ ne, ngɔyɔ bie ngotua ye so.”

³⁰Ngɔmvale ɛfoen sona bie ye fieso, yeɛ ngɔmvale ebie bɔ adwene nne ye ti anu ɔ ye bobe boo nu;

³¹na tie, né nu amukoraa afu ɛfone, né nu afu ndetema setuu, yeɛ nyɔboɛ bɔ bafa bato ye nwo waen ne koso, né wadwiri wagua.

³²Nwuni ye ne, ndwenene ye nwo yé, nneane, na nzuane nworɛ he mvili nu:

³³ Maa nna kãa, maa ndɔ ngosie kãa, maa ndengyɛ me nu kãa,

³⁴na ehiaa kɔwa wɔ so kyɛ awerɔm awueniɛ, yeɛ anwokyere kɔwa wɔ so kyɛ koɛhonɛniɛ bɔ otira akodeɛ ɔ.