Read Sehwi Anyandera 26 Bible Online

Anyandera 26 - Sehwi bible

Anyandera 26

¹Kyɛbɔ asukɔtwea mvata ahuhuro mmerɛ, ná esue koso mvata fieso aleɛfalɛ mmerɛ ne, sɔ ala yeɛ animnyam mvata kwaseaa ɔ.

²Kyɛbɔ akatipire tu tenatena, ná nandwinoma koso tu kyinikyini ne, sɔ ala yeɛ amoenwaa bɔ olle nyinasoɛ ne ongonzi huu ɔ.

³Pɔngɔ fata bakaa, afupɔngɔ fata nyamaa, yeɛ kwaseaa si fata mbire.

⁴Kwaseaa kã ngwaseasɛm a, nnɛtɛ ye so, anyɛ a, wɔ koso ɛkɔyɛ kwaseaa kyɛ ye ala.

⁵Ma kwaseaa ye ngwaseasɛm nwo mmuayɛɛ, anyɛ a, ɔkɔdwene kyɛ ɔse nworɛ.

⁶Sɛ ɛfa ngraa soma kwaseaa a, ɔpepɛ ye bɔbɔ ye gya gua, yeɛ ɔtwetwe musue dwirɛ ba.

⁷Kyɛbɔ bubuaniɛ ye gya sinze berɛ fɛngyɛfɛngyɛ ne, sɔ ala yeɛ kwaseaa noa nu anyandera te ɔ.

⁸Sɛ ɛhyɛ kwaseaa animnyam a, ɔte kyɛ afa nyɔboɛ awura taya nu ɔ.

⁹Kwaseaa noa nu anyandera te kyɛ akɔnomnzaniɛ bɔ ɔnwaha bakaa mmowue mmowue ɔ.

¹⁰Sona bɔ ɔbɔ kwaseaa anaa akɔnomnzaniɛ paa ne, ɔte kyɛ agyaentolɛniɛ bɔ opurapura mmenia mukoraa ɔ.

¹¹ Kyɛbɔ kyea fe a osa kodi ne, sɔ ala yeɛ kwaseaa osa kɔyɔ ngwaseade ɔ.

¹²Yeɛ anwu sona bɔ obu ye nwo kyɛ ye de ɔse nworɛ ɔ? Sɔ sona ne, anyelasoɛ wɔ berɛ ma ngwaseafoɛ tra ye.

¹³Sona bɔ ɔte foen ne, ye dwirɛ ole: “Gyata wɔ atunu dɔ! Gyata wɔ dwaaso dɔ!”

¹⁴Kyɛbɔ anoa ɔpɛ ye nwo wɔ ye ndenasoɛ so ne, sɔ ala yeɛ ɛfoen sona yɔ wɔ ye bɛen so ɔ.

¹⁵ Ɛfoen sona fa ye sa to talie nu a, ɔyɛ ye akwadworɔ kyɛ ɔkɔfa kɔhɔ ye noa ɔ.

¹⁶Ɛfoen sona bu ye nwo nworɛniɛ tra badwemmafoɛ nzoo.

¹⁷Sona bɔ ɔfa ye nwo wurawura edwirɛ bɔ ɔmva ye nwo nu ne, ɔte kyɛ ebie bɔ ɔsɔ kyea bɔ ɔpɛ nu kɔ ɔ ye so nu ɔ.

¹⁸Bɔnamvoɛ bɔ ofindi see, agyaen ne ewue ne, kyɛbɔ ɔte ne,

¹⁹sɔ ala yeɛ sona bɔ ɔlakalaka obiɛngo, ná ɔkã kyɛ, “Oo, né mefa medi angorɛ” nen, ye koso ɔte ɔ.

²⁰Sɛ eyein nne see nu a, onua, yeɛ sɛ nzekurebɔlɛniɛ nne berɛ a, ngondii bo pɛ.

²¹Kyɛbɔ see nzramaa ma ebunaen sɔ, ná see ma eyein sɔ ne, sɔ ala yeɛ sona bɔ okuro ngondii ɔ fa koɛ ba ɔ.

²²Nzekurebɔlɛniɛ ye noa dwirɛ te menemene, edwirɛ ne woroworo wɔ.

²³Sona noa dwirɛ menemene bɔ bɔne adwene wɔ ye si ne, ɔte kyɛ ɛdwetɛ fiɛ bɔ bafa bama kukue nwo ɔ.

²⁴Pɔfoɛ noa dwirɛ te menemene, nakoso ɔbɔ nnakannaka porɛ wɔ ye ti anu.

²⁵Sɛ ɔkã ye dwirɛ fɛfɛɛfɛ a, nnede ye di, ofikyɛ akyiwadeɛ nzoo wɔ ye ti anu.

²⁶Ɔwɔ nu kyɛ ɔfa nnakannaka kata ye ɛpɔen ne aso de, nakoso ye bɔne nwo kɔla ali badwa nu.

²⁷ Ebiala bɔ ɔpɛ kumaa ne, ɔkɔte kɔtɔ nu, yeɛ sona bɔ omunu nyɔboɛ ne, nyɔboɛ ne kosa ye si kɔɔtɔ ye so.

²⁸Sona bɔ ɔlakalaka ye mmango ne, okyi bɛ, yeɛ bɔ ɔfa ye noa dɛfɛdɛfɛ ne, ɔma mmenia kɔ amaneɛ nu.