Read Sehwi Anyandera 29 Bible Online

Anyandera 29 - Sehwi bible

Anyandera 29

¹Sona bɔ bɛtaa betwi ye nyunu a ogua ye so asi ne, musue bɔ ɔkɔto ye mvum nu ne, ongonya ye sɔbea.

² Sɛ teneneefoɛ bedi maen so a, nu mmenia di ahurusi, nakoso sɛ bɔnefoɛ di so a, nu mmenia sũ gua bɛ kunu.

³Sona bɔ ye nye gye nworɛ nwo ne, ɔma ye baba nye gye, nakoso sona bɔ ɔne gyanderafoɛ yeɛ betu nu ne de, ɔbɔ hwea.

⁴Sɛ ɛhene fa pɛpɛɛpɛyɛlɛ bu maen a, maen ne nya ngɔsoɛ, nakoso bɔ ode fea-ase-ma de, ɔbɔ maen ne.

⁵Ebiala bɔ ɔkã adɛfɛdɛfɛ dwirɛ kyire obiɛngo ne, né osua obiɛngo ne gya ngaen.

⁶Bɔnefoɛ, ye mmeraatolɛ kakyi ngaen kye ye, nakoso teneneeniɛ de, ɔto dwein di ahurusi.

⁷Teneneeniɛ dwene bɛ bɔ bɛyɛ anwumvo ɔ nwo, nakoso bɔnefoɛ de, olle sɔ adwene ne.

⁸Ngorohoɛfoɛ bɛto kuro nu see, nakoso nworɛfoɛ de, bɛma ahone tɔ nzue nu.

⁹Sɛ nworɛniɛ ne kwaseaa bɛbɔ nguro a, kwaseaa ne teatea nu, anaa ɔsere bɔ ɔmbɛ so ɔ.

¹⁰Kodiawufoɛ bɛpɔ sona bɔ ye bra te sannwuu ɔ, nakoso teneneefoɛ de, bɛpena ye kra ngoa.

¹¹Kwaseaa fɛ yaa a, ɔda ye ali, nakoso nworɛniɛ de, ɔfɛ yaa a ɔhyɛ ye nwo so.

¹²Maenbulɛniɛ bɔ otie ngondombo dwirɛ ne, ye mbanyi amukoraa bɛyɛ bɔnefoɛ.

¹³Nikyee ko he ma ehianiɛ ne apoobɔlɛniɛ bɛte pɛ: AWURADE yeɛ ɔma bɛ munyɔ bɛ nye nwu nikye ɔ.

¹⁴ Sɛ ɛhene fa pɛpɛɛpɛyɛlɛ di ehiafoɛ dwirɛ a, ye ahennie bo kotimu berɛ daa.

¹⁵Mbire ne bɛ nyunu hanɛ ma nworɛ, nakoso baa bɔ bato ye asaworam ne de, ɔtwetwe animguaseɛ brɛ oni.

¹⁶Sɛ bɔnefoɛ bɛsone a, mmeraatolɛ sone pee, na teneneefoɛ konwu bɔnefoɛ nemɔ b’asefinɛ.

¹⁷ Tea ɛwa, na ɔkɔma wɔ so anu kɔtɔ wɔ, amba, ɔkɔma wɔ nye kɔgye.

¹⁸Nekaa bɔ mmenia bɛndwene kyẽa bie ngɔsoɛ nwo ne, maen ne anu yɛ basaa, nakoso sona bɔ odi mmeraa ne aso ne, onya saleɛ.

¹⁹Bɛmva bɛ noa mbaen bɛndea akoaa, ofikyɛ ɔte edwirɛ ne abo po a, ongoli so.

²⁰Yeɛ anwu sona bɔ ɔpe dwirɛ nwo ɔ? Anyelasoɛ wɔ berɛ ma kwaseaa tra sɔ sona ne.

²¹Sɛ ɛkorɔkorɔ wɔ kanganiɛ fi ye ngwadaa nu a, nziɛ ye ɔkɔyɛ ye nwo kyɛ baa.

²²Sona bɔ okuro ɛyaafɛlɛ ne, ɔtwetwe ngondii ba, yeɛ bɔ ɔma ye ahone hu ne, ɔto mmeraa pee.

²³ Sona ye anwomasoɛ brɛ ye ase, nakoso bɔ ɔte sunzum nu awiɛmvoɛ ne de, okonya animnyam.

²⁴Ebiala bɔ ɔne awueniɛ bekotu nu ne, ɔpɔ ye bɔbɔ ye kra, ɔte amoenwaa ne de, nakoso ɔnga nahorɛ.

²⁵Esuro sona a, né asua wɔ nwo ngaen, nakoso ebiala bɔ ɔfa ye wora wura AWURADE nu ne de, ye nwo sonn.

²⁶Mmenia pee bɛpena maenbulɛniɛ ye nyunu animnyam, nakoso AWURADE berɛ yeɛ sona nya pɛpɛɛpɛyɛlɛ ɔ.

²⁷Amumuyɛɛniɛ te teneneeniɛ akyiwadeɛ, yeɛ sona bɔ ye bra te sannwuu ne, ɔte bɔnefoɛ akyiwadeɛ.