Read Sehwi Anyandera 3 Bible Online

Anyandera 3 - Sehwi bible

Anyandera 3

¹Mma, nnɛma wɔ wora fi me foɛtulɛ ne, na mmom fa me mmeraa dwirɛ nemɔ sie wɔ ti anu;

²ofikyɛ bɛkɔmaa ekonyi kɔhyɛ, ekonya ngoa tendenn, ná wayie wɔ yé.

³Nnɛma pɛpɛɛpɛyɛlɛ ne nahorɛlilɛ bɛpa wɔ nwo, kyekye fa ya wɔ kɔme, ná kyerɛ ye wɔ w’ahone nu.

⁴ Na ɛhe kɔmaa Nyameɛ ne mmenia bɛkɔlo wɔ, ná babɔ wɔ dumaa paa.

⁵Fa wɔ wora amukoraa wura AWURADE nu, na nnɛfa wɔ nwo to wɔ bɔbɔ wɔ nworɛ so.

⁶Wɔ bra mukoraa, maa Nyameɛ bra nu, na okohyire wɔ atee maa ɛkɔfa so.

⁷ Nnɛbu wɔ nwo nworɛniɛ, suro AWURADE, ná twe wɔ nwo fi bɔne nwo.

⁸Ɔkɔyɛ aporɛnuserɛ kɔma wɔ nwonaen, ɔne wɔ mmowue nu anwoserɛ.

⁹Fa bɔ ele ye ɔ hyɛ AWURADE animnyam, wɔ fieso aleɛ bɔ ekoli moa kɔfa amukoraa koso,

¹⁰amaa ɔnate so aleɛ ayi wɔ pata mɔ so tɛkyɛtɛkyɛɛ, na wɔ kumaa bɔ etwi nzaa nu ne, nzaa koyi kobu kɔfa so.

¹¹ Mma, ɔyɛ a nnɛpo AWURADE tealɛ bɔ ɔfa tengyɛtengyɛ wɔ ne, yeɛ sɛ ɔkã wɔ nyunu a, nnɛmaa ɔyɛ wɔ ahi,

¹² ofikyɛ sona bɔ AWURADE kuro ye dwirɛ ne yeɛ ɔkã ye nyunu ɔ, kyɛbɔ seɛ ɔyɛ ɔwa bɔ ɔla ye ahone nwo ne ala.

¹³Sona bɔ wapena nworɛ si atee wanwu ye ne, yeɛ sona bɔ onya ndeaseɛ ne, saleɛ te ye deɛ.

¹⁴Ofikyɛ bɔ enya ye fi nu ne, ɔte paa tra ɛdwetɛ, yeɛ so mvasoɛ ne ɔte paa tra sikaa kɔkorɛ.

¹⁵Nworɛ nyɔboɛ yɛ se tra agudeɛ, na bɔ wɔ nye gye ye nwo biala, ɛngɔhora ngɔfa ngɔtoto nworɛ nwo.

¹⁶Ngoa tendenn wɔ ye sa famaa nu, yeɛ anwonya ne animnyam wɔ ye sa bɛen nu.

¹⁷Ye atee te anika atee, na ye saa amukoraa te asomdwee.

¹⁸Ɔte ngoa bakaa ma bɛ bɔ betira ye nu ɔ, na bɛ bɔ bɛsɔ ye nu bum ne, benya saleɛ.

¹⁹AWURADE nate nworɛ so yeɛ ɔbɔle aseɛ bo ɔ, ɔnate ndeaseɛ so yeɛ ɔfale ewienu sɛle berɛ ɔ;

²⁰ɔnate ye nimdeɛ so yeɛ buma mɔ nu nzue pu wale ɔ, yeɛ ɔnate so yeɛ munungum mɔ koso bɛpepe bosue begua ase ɔ.

²¹Mma, fa nworɛ bɔ nu pi ɔ, ɔne adwene bɔ nu abukye ɔ sie, nnɛmaa befi wɔ nye so,

²²amaa ɔnate so bayɛ ngoa bama wɔ kra, ɔne animnyam bɔ ɔla wɔ kɔme ɔ.

²³Ɔba ye sɔ a, ɛkɔfa w’atee so asomdwee nu, na wɔ gya ngopoli.

²⁴Sɛ ɛkɔda a, engosuro, yeɛ sɛ ɛda a, wɔ nnaa kɔyɛ wɔ fɛ.

²⁵Nnɛsuro mvum nu ahunundetelɛ, anaa asane bɔ ɔto bɔnefoɛ ɔ.

²⁶Ofikyɛ AWURADE kɔyɛ w’anyelasoɛ, na ɔkɔbɔ wɔ nwo waen bɔ ɛngɔtɔ ngaen biala nu ɔ.

²⁷Sona bɔ ohia mmokalɛ ne, nnɛfa paayɛlɛ bɔ ye atianuserɛ, na sɛ ɛkɔhora kɔboka a, boka.

²⁸Nnɛkã kyire ebiɛngo kyɛ, “Kɔ bra, na ngɔfa ngɔma wɔ ɛhema,” wɔ aberɛ bɔ ele nikyee ne bie wɔ berɛ ɔ.

²⁹Nnɛbɔ ebiɛngo anwo porɛ tɛɛ, wɔ aberɛ bɔ ɔne wɔ bɛte ye asomdwee nu ɔ.

³⁰Nnɛne ebiala benya edwudwolɛ mbaen mbaen, wɔ aberɛ bɔ ɔyyɔle wɔ tɛɛ biala ɔ.

³¹Nnɛma wɔ nye boro asisiefoɛ, yeɛ esaa bɔ bapɛ bato berɛ ne, nnɛfa nu biala so.

³²Ofikyɛ sona bɔ ɔte kanda ne, ɔte AWURADE akyiwadeɛ, nakoso teneneeniɛ de, AWURADE kã ye ti anu dwirɛ kyire ye.

³³AWURADE ɛnomalɛ wɔ bɔnefoɛ awuro nu, nakoso nekaa bɔ teneneeniɛ te de, oyira berɛ.

³⁴ Nahorɛ nu, ɔgoro ngorohoɛfoɛ nwo, nakoso anwobrɛaseɛfoɛ de, ɔdo bɛ.

³⁵Animnyam kooli nworɛfoɛ bɛ sa nu, nakoso ngwaseafoɛ de, animguaseɛ kɔmata bɛ.