Read Sehwi Anyandera 5 Bible Online

Anyandera 5 - Sehwi bible

Anyandera 5

¹Mma, tie me nworɛ dwirɛ ne, yɛ asoɛ tie me nworɛ bɔ nu pi ne,

²amaa ɔnate so w’adwene nu abukye, ná wɔ noa ahã nimdeɛ dwirɛ.

³Ofikyɛ brasua sanzaniɛ ye noa dwirɛ te kyɛ woɛ bɔ ɔpepe ɔ, na ye noa te menemene tra aloko;

⁴nakoso ɔkwaayie ye bo ne, ɔyɛ wee te kyɛ awɔwee, na ɔyɛ nna te kyɛ sɛpɔ.

⁵Ye gya diedie sona kɔ ewue nu, na ye agyirɛtulɛ fa sona kɔ ɛborɔ.

⁶Ɔmva atee bɔ ɔkɔ ngoa nu ɔ so, na ye atee te makyebu bɔ ɔnze ɔ.

⁷Afei, me mma mɔ, ɛ́mɔtie me, nnɛma ɛmɔyakyi me noa dwirɛ so lilɛ.

⁸Twe wɔ nwo fi sɔ brasua ne anwo, na nnɛpingye ye awuro anoa ne;

⁹amaa ɔnate so amva w’animnyam amma ebiemɔ, ná amva wɔ ngoa anwura atianuserɛniɛ bie sa;

¹⁰ná ɛwɔfoɛ mɔ banzesa wɔ nningyein, ná bɔ afɛ anya ye ne, wangɔanni amanvrafoɛ sa nu;

¹¹ná wɔ ngoa ayieleɛ ne, wando wɔ ne ɛpenenɛ, mmerɛ bɔ anwonyerɛ adidi wɔ sonaluwaa ne anwoɔnaen ne,

¹²ná anga kyɛ, “Ao, ɔyɛle me ahi kyɛ ngotie foɛtulɛ ɔ, na me kra hyili ye kɔkɔkɔkɔ kyɛ bekohwi me nyunu ɔ!

¹³Mandie m’akyerɛkyerɛfoɛ dwirɛ, yeɛ mamva me foɛtulɛfoɛ bɛ dwirɛ manyɛ huu.

¹⁴Ao, ɔhale kãa mane m’ayieleɛ yiele me wɔ mmenia badwa nyunu.”

¹⁵No wɔ bɔbɔ w’abura nu nzue, nzue bɔ opu fi wɔ bɔbɔ w’asue ti ɔ.

¹⁶Aso odi kyɛ wɔ mbombonzue obu fa so kogua nekaa bie, anaakyɛ w’asueba tengyɛ kɔfa dwaaso?

¹⁷Maa bɛyɛ wɔ ngome wɔ deɛ, nnɛma ɛwɔfoɛ mɔ bɛno bie bɛboka wɔ so.

¹⁸Ma wɔ mbombonzue ne ɔyɛ saleɛ, ná nya wɔ mmerandeɛ nu braa nwo anigye.

¹⁹Ɔte dabɔɔ beleɛ anwonyemene ne wanzane beleɛ bɔ ole animnyam ɔ, ma wɔ nye gye ye nyɔfone nwo mmerɛ biala, ná ma ye hurolɛ oli wɔ ti mmerɛ biala.

²⁰Mma, nzu ati yeɛ odi kyɛ ɛma brasua sanzaniɛ ye hurolɛ di wɔ ti maa ɛsosɔ brasua foforɛ nyɔfone nu ɔ?

²¹Ofikyɛ bɔ sona yɔ ne, ɔla AWURADE nyunu, na ɔneanea ye atee bɔ ɔnate so amukoraa nu.

²²Bɔnefoɛ ye bɔbɔ ye amumuyɛɛ yeɛ osua ye ngaen kye ye ɔ, na ye bɔne nyamaa yeɛ ɔkyekye ye ɔ.

²³Ɔnde fo, yiti okowu, na ɔnate ye gyiminɛ somaa ti, okomini kofi atee ne aso.