Read Sehwi Nworɛ Dwirɛhanɛniɛ 1 Bible Online

Nworɛ Dwirɛhanɛniɛ 1 - Sehwi bible

Nworɛ Dwirɛhanɛniɛ 1

¹Dawide awa Nworɛ Dwirɛhanɛniɛ, bɔ odi hene wɔ Yerusalem ne, ye noa dwirɛ ɛhe.

²“Mbaen nu mbaen.” Nworɛ Dwirɛhanɛniɛ ne nwa nyoo: Mbaen nu mbaen! Ye mukoraa te mbaen!

³Ɛfɛɛ worawora bɔ sona fɛ wɔ ewiase ye, nzikyɛ mvasoɛ yeɛ onya fi nu ɔ?

⁴Aworɛ ndoatoasoɛ ko pɛ nu kɔ, né foforɛ koso awa, nakoso aseɛ de, otimu berɛ afebɔɔ.

⁵Eyia pukye, yeɛ eyia tɔ, na ɔma ye nwo yɛ nyera osa kɔ nekaa bɔ opukye fili ne.

⁶Mvrama bɔ kɔ ngwaen, ɔkakyi ye nwo osa kɔ sorɔ, mvrama ne pɛnepɛne ye nwo alaa, na ɔpɛ ye nwo tee osa ba ye boso.

⁷Asue amukoraa bɛtengyɛ bɛkɔ ɛpo nu, nakoso ɛpo onyi; nzue sa ba asue nemɔ anu wɔ nekaa bɔ bɛtengyɛ befi ne, na bɛkɔ so besa bɛtengyɛ.

⁸Nningyein amukoraa yie ɛfɛɛ, ɛfɛɛ bɔ sona ngora ye kã ɔ; anyeɛ nea nikyee a ɔnde ye, yeɛ asoɛ tie dwirɛ a onyi.

⁹Nikyee biala bɔ ɔwɔ berɛ ne, ɔkɔhɔ so kɔwɔ berɛ, bɔ bayɔ ye daa ne, bekosa bɛkɔyɔ, na nikyee foforɛ biala nne wiase.

¹⁰Aso nikyee bie wɔ berɛ bɔ bɛkã ye nwo dwirɛ kyɛ, “Nea, ɛhe te nikye foforɛ” ɔ? Ɔwɔ berɛ fite tetetete koraka yeɛ yɛba ɔ.

¹¹Daa tete nningyein ne, bɛ nwo ngayeɛ biala nne berɛ, yeɛ nningyein bɔ kyẽa bie bɛbaawa ne koso, bengonya ngayeɛ wɔ bɛ bɔ bɛkɔwa nziɛ nemɔ bɛ berɛ.

¹²Me, Nworɛ Dwirɛhanɛniɛ, né nde Yisrael so hene wɔ Yerusalem.

¹³Mva nziele me nye so kyɛ, nikyee biala bɔ bɛyɔ ye wɔ ewiase ne, mefa nworɛ mepɛnzɛpɛnzɛ nu mete ye bo. Ɔte adwuma serɛ paa bɔ ye yɔlɛ nyɛ fɛ, bɔ Nyameɛ afa ato adasa so kyɛ bɛyere bɛ nwo bɛyɔ ɔ.

¹⁴Manwu nikyee biala bɔ bɛyɔ ye wiase ɔ, na tie, ye mukoraa te mbaen, na ɔte dadwene mbaen.

¹⁵Nikyee bɔ wakondo ne, bɛngɔhora ye tengyɛ, yeɛ nikyee bɔ ɔne berɛ ne, bɛka a ɔnyɛ yee.

¹⁶ Na ngane ye me ti anu kyɛ, “Masua nworɛ pee paa matra ebiala bɔ olili me nyunu moa wɔ Yerusalem ɔ, na nworɛ ne nimdeɛ ayɛ me ti anu tɛkyɛ.”

¹⁷Yiti mva nziele me nye so kyɛ ngɔpena nworɛ si atee, yeɛ afei kyɛ ngonwu ɛlaenbɔlɛ ne ngwaseasɛm ɔ. Na nwuni kyɛ ɛhe koso te dadwene mbaen.

¹⁸Ofikyɛ nworɛ pee nwunɛ ne ɛhawo pee yeɛ bɛnate ɔ, na ebiala bɔ onya nimdeɛ pee ne, ɔtwetwe amaneɛ pee brɛ ye nwo.