Read Sehwi Nworɛ Dwirɛhanɛniɛ 3 Bible Online

Nworɛ Dwirɛhanɛniɛ 3 - Sehwi bible

Nworɛ Dwirɛhanɛniɛ 3

¹Nikyee biala le ye mmerɛ bɔ ɔla berɛ ma ye ɔ, na edwirɛ biala le ye mmerɛ wɔ wiase:

²Aworɛ le ye mmerɛ, yeɛ ewue le ye mmerɛ; nningyein lualɛ le ye mmerɛ, yeɛ bɔ balua ne, ye tulɛ le ye mmerɛ;

³ehunɛ le ye mmerɛ, yeɛ anwonyerɛsalɛ le ye mmerɛ; nikyee sɛkyelɛ le ye mmerɛ, yeɛ ye siesielɛ le ye mmerɛ;

⁴esuɛ le ye mmerɛ, yeɛ ɛserelɛ le ye mmerɛ, awuyebɔlɛ le ye mmerɛ, yeɛ abiliegolɛ le ye mmerɛ;

⁵mmerɛ bɔ begyi nyɔboɛ begua ɔ le ye mmerɛ, yeɛ nyɔboɛ noa boaboalɛ le ye mmerɛ; awaawaatuuyɛlɛ le ye mmerɛ, yeɛ mmerɛ bɔ bɛnyɛ awaawaatuu ɔ le ye mmerɛ;

⁶nikyee penalɛ le ye mmerɛ, yeɛ nikyee minilɛ le ye mmerɛ; nikyee fa sielɛ le ye mmerɛ, yeɛ ye gyigualɛ le ye mmerɛ,

⁷nikyee nu sunzualɛ le ye mmerɛ, yeɛ ye pombalɛ le ye mmerɛ, konnyɛlɛ le ye mmerɛ, yeɛ edwudwolɛ le ye mmerɛ,

⁸sona dwirɛ hurolɛ le ye mmerɛ, yeɛ ɛpɔen le ye mmerɛ; koɛhonɛ le ye mmerɛ, yeɛ asomdwee le ye mmerɛ.

⁹Nzikyɛ mvasoɛ koraa yeɛ adwumayɔlɛniɛ onya fi ye fɛɛ nu ɔ?

¹⁰Manwu adwuma serɛ bɔ Nyameɛ afa awura adasa sa kyɛ bɛfɛ bɛ nwo bɛyɔ ɔ.

¹¹Wayɔ nikyee biala nyemenenyemene wɔ ye mmerɛ nu. Wafa mmerɛ bɔ olle ayieleɛ nwo adwene wawura kuro sona adwene nu, nakoso sona ngora nnwu bɔ Nyameɛ ayɔ ɔ, ofi ye bohyɛlɛ bɔ ɔkwaadwu ayieleɛ ɔ.

¹²Bɔ mese ole kyɛ, bɛte ase ye de, nikye paa biala nne berɛ mma bɛ ndra kyɛ bɛkɔgye bɛ nye, ná bɛkɔsɛpɛ bɛ nwo ɔ.

¹³Asa koso, sɛ sona biala didi, ɔno, ná ɔfa bɔ wafɛ wanya ye ɔ ɔgye ye nye a, né Nyameɛ akyɛdeɛ ɛne.

¹⁴Mese kyɛ nikyee biala bɔ Nyameɛ yɔ ne, ɔkɔtena berɛ daa. Ɛngɔhora ngɔfa bie ngɔboka so, yeɛ ɛngɔhora ngɔye bie ngofi nu. Nyameɛ yɔ ye sɔ, amaa ɔnate so sona biala asuro ye.

¹⁵Bɔ ɔwɔ berɛ kekesaala ye ne, ɔwɔ berɛ dadadada; yeɛ bɔ ɔbaawa ne, ɔwɔ berɛ dadadada, na Nyameɛ ma bɔ wasi daa ne osa si bieku.

¹⁶Masa manwu ye wɔ wiase kyɛ, nekaa bɔ bedi dwirɛ ne, amumuyɛɛ wɔ berɛ, nekaa bɔ ɔsɛ kyɛ tenenee ba berɛ ne, bɔne yeɛ ɔwɔ berɛ ɔ.

¹⁷Na ngane ye me ti anu kyɛ, “Nyameɛ kobua teneneefoɛ ne bɔnefoɛ ndɛen, ofikyɛ wahyehyɛ mmerɛ wato berɛ wama edwirɛ biala ne adwuma biala.”

¹⁸Na bɔ ɔfa adasa nwo ne, ngane ye wɔ me ti anu kyɛ, Nyameɛ so bɛ nea maa benwu kyɛ bɛte ngaka.

¹⁹Ofikyɛ adasa mmaa ne ngaka b’ayieleɛ te ko. Nikyee komapɛ yeɛ ɔto bɛ ɔ. Kyɛbɔ sona owu ne, sɔ ala yeɛ kaka wu ɔ. Ngoa nwomeɛ wɔ bɛ mukoraa nu; yiti sona ndra kaka: ofikyɛ nikyee biala te mbaen.

²⁰Nningyein mukoraa bɛkɔ neka horɛ, nningyein mukoraa befi nnɛterɛ nu, na nningyein mukoraa besa bɛkɔ nnɛterɛ nu.

²¹Sona sunzum, sɛ ɔfo kɔ anwuro oo, anaakyɛ kaka sunzum, sɛ odwu kɔ aseɛ bo dɔ oo, nwa yeɛ ɔse ɔ?

²²Yiti nwuni kyɛ, nikye paa biala nne berɛ ndra kyɛ sona kɔfa bɔ wafɛ wanya ye ɔ ɔkɔgye ye nye ɔ; ofikyɛ ye bue nu deɛ ɛne. Ofi wa kɔ a, nwa yeɛ ɔkɔhora kɔɔfa ye kɔwa maa ɔkɔnea bɔ okosi ye si ɔ?