Read Sehwi Nworɛ Dwirɛhanɛniɛ 7 Bible Online

Nworɛ Dwirɛhanɛniɛ 7 - Sehwi bible

Nworɛ Dwirɛhanɛniɛ 7

¹Dumaa paa te paa tra ayirefona bɔ ye nyɔboɛ yɛ se ɔ, yeɛ ewue kyẽa te paa tra aworɛ kyẽa.

²Ɔte paa kyɛ ɛkɔhɔ awuro bɔ bɛyɛ sɛen wɔ nu tra kyɛ ɛkɔhɔ awuro bɔ bato poen bedidi wɔ nu ɔ nu; ofikyɛ sona biala ye ayieleɛ ɛne, na ateasefoɛ fa sɔ dwirɛ ne sie bɛ ti anu.

³Aworabɔlɛ te paa tra ɛserelɛ, wɔ nyunu yɛ anwumvoin anwumvoin de, nakoso wɔ wora kyekye.

⁴Awuro bɔ bɛyɛ sɛen wɔ nu ne, berɛ yeɛ nworɛfoɛ b’adwene kɔ ɔ, nakoso ngwaseafoɛ de, b’adwene kɔ awuro bɔ bɛgye bɛ nye wɔ nu ɔ nu.

⁵Nworɛniɛ twi wɔ nyunu a, ɔte paa kyɛ ekotie tra kyɛ ekotie ngwaseafoɛ edweintolɛ ɔ.

⁶Ɛfa agurɛ gua see nu a, kyɛbɔ osi yɛ titetite ne, sɔ ala yeɛ kwaseaa serelɛ te ɔ; na ɛhe koso ɔte mbaen.

⁷Nahorɛ nu, nhyɛsoɛ ma nworɛfoɛ bɛbɔ laen, yeɛ fea-ase-ma koso ɔma sona bu ye nye gua nahorɛ so.

⁸Edwirɛ ayieleɛ te paa tra ye bohyɛlɛ; aboterɛ nyanɛ te paa tra anwomasoɛ.

⁹ Nnɛma w’ahone hu ndɛndɛ, ofikyɛ ngwaseafoɛ yeɛ ahonehulɛ wɔ bɛ so ɔ.

¹⁰Nnɛbisa kyɛ, “Mmerɛ bɔ wapɛ nu wahɔ ne, nzu ati yeɛ ɔte paa tra ɛnɛ mmerɛ ye ɔ?” Ofikyɛ nworɛ biala nne nu kyɛ ekobisa ɛhe ɔ.

¹¹Nworɛ te paa kyɛ agyapadeɛ bɔ bafa bayakyi wɔ ɔ, ɔte mvasoɛ ma bɛ bɔ bɛte ngoa nu ɔ.

¹²Ofikyɛ nworɛ ɔbɔ wɔ nwo waen kyɛbɔ sikaa ɔbɔ wɔ nwo waen ne, na nimdeɛ nwo mvasoɛ ole kyɛ, nworɛniɛ ye nworɛ maa onya ngoa.

¹³Bɔ Nyameɛ ayɔ ne, fa kɔ adwenedwene nu: Nikyee bɔ wakondo nu ne, nwa yeɛ ɔkɔhora ye tengyɛ ɔ?

¹⁴Mmerɛ bɔ okoyie wɔ yé ne, ma wɔ nye gye, nakoso sɛ mmerɛ tɛɛ to wɔ a, fa kɔ adwenedwene nu. Nyameɛ bɔ ɔmane sɔ tebea ne wale ne, ye ala yeɛ wama ɛhe koso wawa ɔ, amaa ɔnate so kuro sona wannwu nikyee biala bɔ okosi wɔ ye si ɔ.

¹⁵M’asetena mbaen ye anu, manwu nikyee biala: Teneneeniɛ bɔ owu wɔ ye tenenee nu, yeɛ bɔnefoɛ koso bɔ onya ngoa tendenn wɔ ye bɔne nu ɔ.

¹⁶Nnɛyɛ wɔ nwo kyɛ wɔ de ɛtengyɛ tra so, yeɛ nnɛyɛ wɔ nwo kyɛ wɔ de ɛse nworɛ tra so. Nzu ati yeɛ ɛpɛna kyɛ eku wɔ nwo ɔ?

¹⁷Nnɛma awosii ba wɔ ti anu tra so, yeɛ nnɛyɛ kwaseaa. Nzu ati yeɛ ɛpena kyɛ ɛpe wu ɔ?

¹⁸Ɔte paa kyɛ ɛkɔsɔ foɛtulɛ bɔ oli moa ne anu, bɔ ɛngɔyakyi bɔ ɔtɔ so nyɔ ne koso anu ɔ. Ofikyɛ sona bɔ osuro Nyameɛ ne, ɔkɔhwe ye nwo kofi ye mukoraa nwo.

¹⁹Nworɛ ma nworɛniɛ nya tumi tra mbanyi buru bɔ bɛnea kuro so ɔ.

²⁰Nahorɛ nu, sona biala nne aseɛ ye aso bɔ ye de ɔtengyɛ, ɔyɔ paa ngome, bɔ ɔnyɔ bɔne ɔ.

²¹Nnɛma w’adwene kɔ edwirɛ amukoraa bɔ mmenia kekã ɔ so, amaa ɔnate so ande kyɛ wɔ somvoɛ ɔnoma wɔ ɔ.

²²Ofikyɛ, ɛse kyɛ mmerɛ pee ne ala yeɛ wɔ koso anoma ebiemɔ ɔ.

²³Mafa nworɛ mapɛnzɛpɛnzɛ ɛhemɔ amukoraa nu manea; na ngane kyɛ, “Ngonwu nworɛ,” nakoso ɔne m’afia atee wale.

²⁴Sɔ nikyee ne bɔ ɔwɔ dededede, nziɛ nziɛ, kumaa kuronguronn nu ne, nwa yeɛ okonwu ye ɔ?

²⁵Mvale m’adwene nziele so kyɛ ngonwu nworɛ, ɔne kyɛ ngɔfeefee nu ngɔpena nworɛ ne nningyein bɛ bo telɛ ɔ, ɔne kyɛ ngonwu amumuyɛɛ kyɛ ɔte ngwaseasɛm, ná ngonwu ngwaseasɛm kyɛ ɔte ɛlaenbɔlɛ ɔ.

²⁶Na nwuni bɔ ye nwo yɛ suro tra ewue ɔ: Ye ole brasua bɔ ye adwene te ngaen ne ɛtɛen ɔ, bɔ ye sa te ngɔnzɔngɔnzɔ ɔ. Sona bɔ ɔsɔ Nyameɛ nye ne, ode ye nwo fi sɔ braa ne sa nu, nakoso bɔnefoɛ de, ɔtɔ braa ne ngaen nu.

²⁷Tie, bɔ manwu ye hɔ ɛhe: Nworɛ Dwirɛhanɛniɛ ne, ye noa dwirɛ ɛne. Mvale edwirɛ ne ndotole ye nwo ngoko ngoko kyɛ ngonya ye nwo ndeaseɛ ɔ.

²⁸Ngɔle so alaa mbenane ndeaseɛ ne, nakoso mannwu bɔ mepena ne. Nwuni bienzua ko wɔ mmienzua apee ko nu, nakoso mmrasua mɔ nu de, mannwu brasua.

²⁹Tie, ɛhe angome yeɛ manwu ye ɔ: Nyameɛ bɔle kuro sona ferengyemm, nakoso kuro sona ama nningyein pee bo telɛ ali ye ti.