Read Sehwi Edwein Nu Dwein 5 Bible Online

Edwein Nu Dwein 5 - Sehwi bible

Edwein Nu Dwein 5

¹Nniɛma brasua, m’atɔmvorɛ braa, mawa me turo ne anu, méboaboa me korobo ne m’ayirefona ne noa, médi me woɛ bɔ ɔwɔ ye nzasameɛ nu ɔne me woɛ ne, méno me nzaa ne me nyɔfonesue ne. Me mmango mɔ, ɛ́mɔdidi ná ɛ́mɔno, adɔfo mɔ, ɛ́mɔno ma ɛmɔ ko yi.

²Nnale, nakoso m’ahone nu de, né nnnale. Ndele kyɛ me kurofoɛ ne ɔbɔ kɔkɔɔkɔ kyɛ, “Bukye me, nniɛma brasua, me kurofoɛ, m’abubure, me kurofoɛ bɔ odi mu ɔ, ofikyɛ ebosue aloaloa me ti so, ɛborɔ bɔ ogua kɔngɔen ne, waloa me ti nwiaa mbɛsɛmbɛsɛ ne.”

³Mapuro m’ataadeɛ magua berɛ dadadada, ngɔyɛ sɛɛ né mawura? Manwunzi me gya bo, ngɔyɛ sɛɛ né mayɛ ye fiɛ?

⁴Me kurofoɛ ne sɔle daakoo ne anu, na me kunu yɛle me nufaa.

⁵Yeɛ ndwɔsole kyɛ mekwaabukye me kurofoɛ ne, na me sa nwo korobo ne, ɔpepe guale, me sa mmɛseka nwo korobo nzue ne, ɔpepe guale, bɛpepe beguale daakoo ne aso.

⁶Mmukyele me kurofoɛ ne, nakoso né me kurofoɛ ne akakyi ye nwo wasa wahɔ. Me wora bɔle kyɛ wahɔ ɔ, mbenane ye, nakoso mannwu ye, mvrɛle ye, nakoso wanzuro.

⁷Awɛmvoɛ mɔ bɔ bekyinikyini bɛwɛne kuro berɛ ne, beyiale me, bedufudufuli me, bepurale me; na sɔ awɛmvoɛ mɔ bɔ bɛwɛne fasue ne, belele me ngatanyunu ne.

⁸O Yerusalem ndaluwa, mesrɛ ɛmɔ kitii, sɛ ɛmɔnwu me kurofoɛ ne a, ɛmɔhã behyire ye kyɛ, ehurolɛ abɔ me anwonyerɛ.

⁹O, wɔ bɔ w’anwonyemene tra mmrasua mukoraa ɔ, nzu yeɛ wɔ kurofoɛ ne ɔfa tra kurofoɛ biemɔ, bɔ ɔmaa ɛsrɛ yɛ kitii sɔa ɔ?

¹⁰Me kurofoɛ ne, ɔte toburoo, na ɔgyegye, ɔda nzorɛ wɔ mmienzua apee buru nu.

¹¹Ye ti te sikaa kɔkorɛ paa, ye ti nwiaa mbɛsɛmbɛsɛ te pusaa, na enwiaa ne bire te kyɛ adene.

¹²Ye nye mmaa ne, ɔte kyɛ asue bɔ ɔtengyɛ ɔ ye nwo abubure bɔ wabia nyɔfonesue nu ɔ, na otuatua berɛ nyemenenyemene.

¹³Ye mvoka te kyɛ ngofie bɔ balualua ayirefona wɔ so bɔ otu fona ɔ. Ye noa te kyɛ sukooko bɔ ɔpepe korobo nzue ɔ.

¹⁴Ye sa te kyɛ sikaa kɔkorɛ pɔmaa, bɔ mbembenanneɛ tuatua nu ɔ. Ye ko te kyɛ ɛsoen gye bɔ bafa safire nyɔboɛ badwura ye nwo ɔ.

¹⁵Ye gya te kyɛ nyɔboɛ fufue mbuna bɔ ogyigyi sikaa kɔkorɛ paa nyinasoɛ so ɔ. Ye anwonyemene te kyɛ Lebanon, na ɔda nzorɛ kyɛ Lebanon sida mmakaa mɔ.

¹⁶Ye noa dwudwolɛ yɛ fɛ paa, ye nwo nekaa biala yɛ nyemene. Ao Yerusalem ndaluwa, me kurofoɛ ne, me damvo ne, ye ɛne.