Read Sehwi Edwein Nu Dwein 8 Bible Online

Edwein Nu Dwein 8 - Sehwi bible

Edwein Nu Dwein 8

¹Me kunu a, ahaa ɛte nniɛma bienzua, bɔ ɔnone me ni nyɔfone ɔ! Sɛ meyia wɔ dwaaso a, ahaa ngɔfe wɔ noa, bɔ ebiala ngosobi ye noa ngogua me so ɔ.

²Ahaa ngoli wɔ nyunu ngɔfa wɔ ngɔwa me ni awuro maa ekohyire me ehurolɛ. Ahaa ngɔmaa ɛkɔno nzaa bɔ nningyein fonafona wɔ nu ɔ bɔ ɔte m’akengaa nzue bɔ bahwi ɔ.

³Me ti la ye sa bɛen so, wafa ye sa famaa wato wabra me.

⁴O Yerusalem ndaluwa, mesrɛ ɛmɔ kitii, kyɛ nnɛma ɛmɔtingye ehurolɛ, yeɛ nnɛma ɛmɔperepere ye nwo kɔpem mmerɛ bɔ ye bɔbɔ okuro ɔ.

⁵Brasua beni yeɛ ofi ɛserɛ so dɔ ɔba e, bɔ wate wamata ye kurofoɛ ye? Ndingyele wɔ wɔ aprɛ ne abo, nekaa bɔ wɔ maame wole wɔ ne, bɔ ɔwole wɔ ne, berɛ yeɛ aworɛ hane ye ɔ.

⁶Fa me yɛ w’ahone nwo nzɔanoɛ, fa me yɛ wɔ sa nwo nzɔanoɛ, ofikyɛ ehurolɛ nu yɛ se te kyɛ ewue, nungunɛ ti anu yɛ se te kyɛ asieleɛ kumaa. Ehurolɛ nzramaa te see nzramaa bɔ ɔsɔ wuronyiwuronyi ɔ.

⁷Nzue pee ngɔhora ngonua ehurolɛ, yeɛ asue mɔ ngɔhora ngɔma ɔngɔmono. Sɛ sona fa ye anwonya mukoraa po kyɛ ɔfa tɔ ehurolɛ a, bekosobi bɛ noa bekogua ye so.

⁸Yɛle aliɛmaa brasua bie bɔ ɔte kãa ɔ, onnya ɔbbobɔle nyɔfone. Kyẽa bɔ bienzua bie kɔɔsrɛ ye agyaa ne, nzu yeɛ yɛkɔyɔ yɛkɔma y’eliɛma brasua ye ɔ?

⁹Sɛ y’eliɛma ne ɔte fasue a, ahaa yɛkɔto ɛdwetɛ abandenden yɛkosie so, yeɛ sɛ ɔte anoa a, ahaa yɛkɔfa sida yɛkɔma ye nwo yɛkoyia.

¹⁰Nde fasue, na me nyɔfone te kyɛ abandenden, na mayɛ kyɛ sona bɔ ɔne asomdwee yeɛ bɛnate ɔ wɔ me kurofoɛ n’anye so.

¹¹Né Solomon le bobe boo wɔ Baal Hamon; ɔfale bobe boo ne wurale hwɛsofoɛ sa, bɛ nu biala te bobe mmaa ne a, né odi kyɛ ɔbrɛ ye ɛdwetɛ apee ko.

¹²Me bobe boo bɔ me bɔbɔ me deɛ ahɔ ne, me bɔbɔ yeɛ menea so ɔ. O Solomon, ɛdwetɛ apee ko ne, ɔte wɔ deɛ, yeɛ bobe mmaa so hwɛsofoɛ nemɔ bɛ deɛ ɛyaa nyɔ.

¹³O, wɔ bɔ ɛte turo nemɔ anu ɔ, wɔ mmango mɔ bɛnwondɛ kyɛ bɛkɔte wɔ komvi ɔ, maa nde wɔ komvi e.

¹⁴Me kurofoɛ, bra ndɛndɛ, yɛ kyɛ ɛwanzane, anaakyɛ dabɔɔ akrɔngrɔma wɔ ayirefona mmokaa nemɔ aso.