Read Sehwi Yesaya 10 Bible Online

Yesaya 10 - Sehwi bible

Yesaya 10

¹Bɛ yaakɔ! Bɛ bɔ bɛhyɛ mmeraa tɛɛ ɔ, ɔne ahyerɛlɛfoɛ bɔ bɛkyerɛ nhyɛsoɛ mmeraa ɔ,

²kyɛ bɛfa bebua ehiafoɛ ndɛengyea, kyɛ bɛfa bedi me mmenia bɔ bɛyɛ anwumvo ɔ aminɛ, bɔ ɔnate so bɛfa akunafoɛ mmrasua bɛkakyi bɛ koɛ nu nzesadeɛ, ɔne kyɛ bedi nyisiaa aminɛ ɔ.

³Nzu yeɛ ɛmɔkɔyɔ ye wɔ asohwenɛ kyẽa ne ɔne amaneɛnwunɛ bɔ okofi dedeede kɔwa ne anu ɔ? Nwa berɛ yeɛ ɛmɔkɔnwati bɛkɔɔpena mmokalɛ ɔ, nisua yeɛ ɛmɔkɔyakyi ɛmɔ anwonya ne ɔ?

⁴Ɛmɔkokundukundu berɛ wɔ kukunufoɛ nemɔ anu, anaakyɛ bekohu ɛmɔ bɛkɔfra bɛ bɔ batotɔ ne. Na ɛhemɔ amukoraa nu ne, AWURADE ahone ngɔtɔ nzue nu, na okodwɔso kotia bɛ.

⁵ Aa, Asiria, me yaafɛlɛ mbire, pɔmaa bɔ otira bɛ sa nu ne, ɔte m’ahonehulɛ piri!

⁶Maen bɔ benzuro Nyameɛ yeɛ masoma ye kyɛ ɔɔhwe bɛ so ɔ, mahyɛ ye kyɛ ɔɔhwe maen bɔ mafɛ ye so yaa piri paa ne so, kyɛ ɔɔfẽ ye nningyein ɔfa yɛ koɛ nu nzesadeɛ, ná otiatia bɛ so te kyɛ dwaaso nnɛterɛ.

⁷Nakoso Asiria hene de, nna sɔ yeɛ ɔwɔ ye ti anu ɔ, nna sɔ yeɛ ɔdwene ɔ, na mmom, wayɛ ye adwene kyɛ okohũhũ mmenia, ná wasa wasɛkye maen maen pee.

⁸Ofikyɛ ɔnwa: “Me safohene mɔ, aso bɛtte hene hɔ ɔ?

⁹Bɔ mva nnili Kalno ne, aso nna ye ala yeɛ mva nnili Kakemise ɔ? Bɔ mva nnili Hamate ne, aso nna ye ala yeɛ mva nnili Apade ɔ? Bɔ mva nnili Samaria ne, aso nna ye ala yeɛ mva nnili Damasko ɔ?

¹⁰Ngonim bɔ mali ye wɔ ahennie mɔ bɔ bɛ wora wura mmosoen nu bɔ b’amoen mɔ yɛ se tra bɛ bɔ bɛwɔ Yerusalem ne Samaria ne,

¹¹aso mengɔfa sɔ mengoli Yerusalem ne ye mmosoen, kyɛbɔ mafa mali Samaria ne ye amoen mɔ ne?”

¹²Sɛ AWURADE yɔ ye adwuma mukoraa wɔ Sion bokaa so ne Yerusalem yie a, ɔkɔhwe[6] Asiria hene so wɔ ye anwomasoɛ mvamva ne ye dwɛɛ ne anwo.

¹³Ofikyɛ Asiria hene nwa: “Me bɔbɔ m’anwoserɛ ne me nworɛ yeɛ mafa mayɔ ɛhe ɔ, ofikyɛ m’adwene nu pi; matutu maen maen nemɔ bɛ wɛen magua, mafẽ bɛ nningyein mafa; mayɛ kyɛ katakyie bɔ mapemo bɛ hene mɔ maa batete bagua ase ɔ.

¹⁴Me sa ahã maen maen mɔ b’agyapadeɛ mɔ, kyɛbɔ sona ye sa kã anomaa saen ɔ. Na kyɛbɔ sona sesa saen nu ngyiremvua bɔ anomaa atu ayakyi ye berɛ ne, sɔ ala yeɛ masesa aseɛ amukoraa mabɔ so ɔ; ebiala angora ye ndaa nu bɔ, wangora ye noa nu bukye, anaa wangora sũ kyee kyee.”

¹⁵Aso odi kyɛ akumaa ɔyɛ sona bɔ ɔfa ye bu bakaa ne so anwomasoɛ, anaakyɛ sralaa ɔmoma ye nwo so kyire sona bɔ ɔfa ye pakye mmakaa ɔ? Aso mbire kɔhora kɔhyɛ sona bɔ otira ye ne so, anaa pɔmaa kɔhora kɔpagya ye nwo kyɛ ye de nna bakaa ahɔ ɔ.

¹⁶Yiti AWURADE, Asafo AWURADE ɔkɔte ɛfɔen anwonyerɛ kogua ye koɛhonɛfoɛ pindipindinn nemɔ aso, na ɔkɔsɔ see wɔ Asiria hene animnyam ne abo kyɛ see bɔ ogye ɔ.

¹⁷Yisrael kanea ne kɔkakyi see, ye Krongronniɛ ne kɔkakyi see wuronyiwuronyi; na okogye kɔyera ye agurɛ ne ye mmowue nemɔ ɛlɛhomapɛ.

¹⁸Ɔkɔsɛkye ye hɔayeɛ nyemene ne ɔne ye aseɛ bɔ ɔkye aleɛ ɔ, okohu ɛkra ne anwoɔnaen bɔkɔɔ, na ɔkɔyɛ kyɛ yarefoɛ bɔ ɛfɔen ala yeɛ ɔfɔ ɔ.

¹⁹Ye hɔayeɛ ne anu mmakaa bɔ bɛkɔha ne, ɔkɔyɛ kaaba bie bɔ akwadaa po ɔkɔhora kɔha kɔhyerɛ ye somaa ɔ.

²⁰Sɔ kyẽa ne, Yisraelfoɛ ngaa ne, bɛ ne Yakob awuro ama bɔ banya bɛ ti badidi nu ne, bɛngɔfa bɛ nwo bɛngɔto bɔ ɔbole bɛ ne aso ko, na mmom bɛkɔfa bɛ nwo bɛkɔto AWURADE, Yisrael Krongronniɛ ne aso nahorɛ nu.

²¹Bɛ ngaa ne kosa kɔwa, Yakob bosofoɛ ngaa ne, bekosa bɛkɔwa tuminiɛ Nyameɛ ne berɛ.

²² Ɔwɔ nu kyɛ wɔ maen Yisrael bɛsone pee kyɛ mboanoa anweaa de, nakoso bɛ nu kaaba bie yeɛ bekosa bɛkɔwa ɔ. Nyameɛ ahyehyɛ bɔ ɔbaato bɛ ne wato berɛ, na ɔnate pɛpɛɛpɛyɛlɛ mmorosoɛ so yeɛ ɔkɔwa ɔ.

²³Ofikyɛ AWURADE, Asafo Nyameɛ nhyehyɛleɛ bɔ wahyehyɛ wato berɛ kyɛ ɔkɔsɛkye aseɛ amukoraa ne, ɔkɔmaa ɔkɔwa nu.

²⁴Yiti AWURADE, Asafo Nyameɛ nwa nyoo, “O me maen bɔ ɛte Sion ɔ, nnɛsuro Asiria. Ɔkɔfa bakaa kɔbo wɔ, yeɛ ɔkɔfa pɔmaa kɔwa wɔ so kyɛbɔ Misraim yɔle ne.

²⁵Ɔngɔhyɛ biala, ɛyaafɛlɛ ne bo kɔpɛ, na m’ahone kohu bɛ so kohũhũ bɛ.

²⁶Asafo AWURADE kofi ye mbire, kyɛbɔ ohuni Midian wɔ Orebo nyɔbotaen ne anwo ne, na ɔkɔma ye pɔmaa ne aso kohyire ɛpo ne aso, kyɛbɔ ɔyɔle ye Misraim ne.

²⁷Na ɔkɔwa kyɛ, sɔ mmerɛ ne, ye adesoa bɔ ɔfa tole wɔ kɔme anwo ne ɔkɔye kofi berɛ, na ye kɔnnua ne anu kobubu kɔye kofi wɔ kɔme. Na ɔnate nomenome bɔ ɛkɔyɛ ne ati, kɔnnua ne anu kobubu.”

²⁸Wawa Ayate, waapɛ nu wɔ Migron, wayakyi ye nningyein wɔ Mikimase.

²⁹Baafa kongonyi ne anu dɔ, baasikye kɔngɔen wɔ Geba. Ahunundetelɛ atɔ Rama so, Sɔɔlo kuro Gibea so ama banwati.

³⁰O Galim awa brasua, sũ serɛserɛ! O Laisa, tie! O Anatote, bua ye!

³¹Mademena anwati, Gebimfoɛ banwati bɛkwaabɔ bɛ nwo adwaa.

³²Ɛnɛ kyẽa ye, Asiria koogyina wɔ Nɔbo, ɔkɔkoakoa twɔleɛ kohyire Sion awa brasua bokaa ne, Yerusalem pambaa ne.

³³Tie, AWURADE, Asafo AWURADE kɔfa tumi bɔ ɔyɛ suro ɔ kɔpomba bakaa mmaen ne kogua, okobubu mmakaa ndendenn nemɔ kogua, na ɔkɔbrɛ bɔ wama ye nwo so ne ase.

³⁴Ɔkɔfa akumaa kobu ɛhɔayeɛ too kogua, na tumi piri kɔma Lebanon ɛhɔayeɛ nu mmakaa kobubu.