Read Sehwi Yesaya 11 Bible Online

Yesaya 11 - Sehwi bible

Yesaya 11

¹ Bakaa ye nye bie kopukye kofi Yese dosii ne anu, na mmaen bie kofifi kofi ye ndii nemɔ anu kosu mmaa.

² AWURADE Sunzum kɔwa ye so, nworɛ ne ndeaseɛ sunzum, foɛtulɛ ne tumi sunzum, nimdeɛ ne AWURADE surolɛ sunzum.

³Ye nye kɔgye AWURADE surolɛ nwo. Nna bɔ ye nye nwu ye ɔ yeɛ okogyina so kobua ndɛen ɔ, yeɛ nna bɔ ye so te ɔ so yeɛ okogyina kɔyɛ ye adwene ɔ,

⁴ na mmom tenenee yeɛ ɔkɔfa kobua anwumvoinfoɛ ndɛen ɔ, na pɛpɛɛpɛyɛlɛ yeɛ ɔkɔfa koli anwobrɛaseɛfoɛ bɛ dwirɛ kɔma bɛ ɔ. Ye noa nu dwirɛ yeɛ ɔkɔfa kɔyɛ mbire kofi aseɛ ɔ, na ɔkɔfa ye noa nu nwomeɛ kohũhũ bɔnefoɛ.

⁵ Tenenee kɔyɛ abɔsoɛ bɔ ɔkɔfa kɔbɔ ye nu ɔ, yeɛ nahorɛlilɛ kɔyɛ abɔsoɛ kɔbɔ ye yaase.

⁶ Pataku ne boaen ba bɛkɔtena, aboa ne abɔngye ba bɛkɔla neka horɛ, nandwie ba ne gyata ne nandwie bɔ walɔ ɔ bɛkɔla neka horɛ, na akwadaa ba yeɛ okoli bɛ nyunu ɔ.

⁷Nandwie beleɛ ne kwabrafo bɛkɔbɔ nu bekodidi, bɛ mma mɔ kɔla neka horɛ, na gyata koli ndire kyɛ nandwie ala.

⁸Akwadaa bɔ otua nyɔfone noa ne, okoli angorɛ wɔ ɛkyenebene bɔen noa, yeɛ bɔ wapɛ nyɔfone ne wora, ɔkɔfa ye sa kowura ewobire bɔen nu.

⁹Ebiala ngohũ anaa ongopura ebiala wɔ me bokaa krongron ne aso amukoraa; ofikyɛ AWURADE nwo nimdeɛ koyi aseɛ so tɛkyɛ, kyɛbɔ nzue ayi ɛpo nu tɛkyɛ ne.

¹⁰ Sɔ kyẽa ne, Yese ndii ne kogyina berɛ kɔyɛ frangaa kɔma maen ne; maen maen kɔpena ye si atee, na nekaa bɔ ɔte ne kɔyɛ animnyam nekaa.

¹¹Na ɔkɔwa kyɛ, sɔ kyẽa ne, AWURADE kɔtengyɛ ye sa ye pɛen nyɔ so kole ye mmenia bɔ baha ne kofi Asiria, Misraim, Patrose, Yitiopia, Elam, Sinari, Hamate nu, yeɛ mboanoa supɔ mɔ so.

¹²Ɔkɔfa frangaa kɔpena berɛ kɔma maen maen mɔ, bɛ bɔ bapɛ b’asue bafi Yisrael ne, ɔkɔboaboa bɛ noa, yeɛ bɛ bɔ babɔ aya bafi Yuda ne, ɔkɔboaboa bɛ noa kofi aseɛ ndweasoɛ nna ne aso.

¹³Efraim anyeboroborolɛ ne bo kɔpɛ, Yuda pɔfoɛ mɔ bɛ boso komini, Efraim nye ngɔboro Yuda ko, yeɛ Yuda ngɔpɔ Efraim ko.

¹⁴Na mmom bɛkɔhɔ Filistifoɛ so wɔ eyia atɔleɛ bue nu dɔ, bɛkɔbɔ nu bɛkɔfẽ eyia afiteleɛ maen maen mɔ bɛ nningyein. Bekoli Edom ne Moabo so ngonim, na Amonfoɛ kɔbrɛ bɛ nwo ase bekowura bɛ bo.

¹⁵ Misraim ɛpo ne noa bɔ wadidi wahɔ nu ne, AWURADE kɔwewe ye bɔkɔɔ. Ɔkɔfa ye mvrama hyerɛhyerɛ ne kɔnwaha ye sa wɔ asue Yufreti so, ɔkɔpakyepakye nu maa ɔkɔyɛ asue mmaa mmaa nzoo, bɔ sona pɛ ye a ye gya bo ngɔloa ɔ.

¹⁶Yiti ye mmenia ngaa bɔ baha ne, atimbire kɔla berɛ kofi Asiria kɔma bɛ, kyɛbɔ ɔlale berɛ mane Yisrael mmerɛ bɔ ofili Misraim aseɛ so wale ne.