Read Sehwi Yesaya 12 Bible Online

Yesaya 12 - Sehwi bible

Yesaya 12

¹Sɔ kyẽa ne, ekose kyɛ, “O AWURADE, meda wɔ ase, ɔwɔ nu kyɛ ɛfɛle me so yaa, nakoso w’ahone tɔle nzue nu, na ɛkyekyele me wora.

² Amba, Nyameɛ te me ngoalelɛ, ngɔfa me wora ngowura ye nu, na mengosuro, ofikyɛ AWURADE Nyameɛ te m’anwoserɛ ne me dwein, na wayɛ me ngoalelɛ.”

³Ɛmɔkɔfa anigye yeɛ bɛkɔto nzue bekofi ngoalelɛ abura mɔ nu ɔ.

⁴Na sɔ kyẽa ne, ɛmɔkose kyɛ, “Ɛ́mɔfa asennaa bɛ́ma AWURADE, ɛ́mɔbɔ ye dumaa, ɛ́mɔbɔ ye anwanwadeɛ ne dawure wɔ maen maen mɔ nu, ɛ́mɔbɔ ye dawure kyɛ ye dumaa ne te piri.

⁵“Ɛ́mɔto AWURADE nwo ayɛyelɛ dwein, ofikyɛ wayɔ anwanwadeɛ nningyein; ɛ́mɔma bénwu sɔ dwirɛ ne wɔ aseɛ amukoraa so.

⁶O ɛmɔ bɔ ɛmɔte Sion ɔ, ɛ́mɔbɔ ese bɛ́to dwein anigye so, ofikyɛ Yisrael Krongronniɛ bɔ ɔwɔ ɛmɔ afia ne, ɔte piri.”