Read Sehwi Yesaya 13 Bible Online

Yesaya 13 - Sehwi bible

Yesaya 13

¹ Babilɔn nwo nyekyire bɔ Amoso awa Yesaya nyane ye ne, ye ɛhe:

²Ɛ́mɔfa frangaa bɛ́pena bokaa pralaa ti afia, ɛ́mɔtea nu bɛ́frɛ bɛ, ɛ́mɔbɔ bɛ ba ma beewurawura atitirefoɛ nemɔ b’anoa nu.

³Me yeɛ mafa ahyɛdeɛ mama me mmenia krongron nemɔ ɔ; masa mato me sa mafrɛ me koɛhonɛfoɛ, bɔ bedi me ngonim nwo ahurusi ne, kyɛ bégyina me yaafɛlɛ ne aso bɛ́yɔ bɔ mepena ɔ.

⁴Ɛ́mɔtie! Esebɔlɛ bie ɔkɔ so wɔ mmokaa nemɔ aso kyɛ ɛlɔen pirikua bie komvi. Ɛ́mɔtie! Ɔte ahennie mɔ b’esebɔlɛ piri, maen maen mɔ bɔ baboaboa bɛ noa ɔ! Asafo AWURADE ɔ́boaboa ye lɔen noa maa bɛkɔ koɛ.

⁵Befi dedeede aseɛ bie aso ne ewienu noa dɔ paa yeɛ bɛ́ba ɔ, AWURADE ne ye ahonehulɛ akodeɛ ne, kyɛ ɔbaasɛkye aseɛ amukoraa.

⁶ Ɛ́mɔbɔ awuye, ofikyɛ AWURADE kyẽa ne apingye; kyẽa ne kɔwa, bɔ Tuminiɛ ne kɔfa kohũhũ mmenia ɔ!

⁷Yiti asaa mukoraa nu kohodwo, ahunundetelɛ kɔtɔ sona biala so,

⁸na bɛ nwo kodwiri bɛ. Yealɛ ne aworabɔlɛ kotira bɛ, na bɛkɔte yealɛ kyɛ brasua bɔ wafo aworɛ so ɔ. Ebiala kɔfa anwodwiri kɔnea obiɛngo nyunu, na bɛ nyunu kɔyɛ bosabosaa.

⁹Tie, AWURADE kyẽa ne ɔ́ba, ɔ́ba ye atianuserɛ ne ahonehulɛ ne anyeborolɛ so, kyɛ ɔbaasɛkye aseɛ ye bɔkɔɔ, ná okũkũ so bɔnefoɛ fi so.

¹⁰ Ofikyɛ ewienu nzramaa ne nzramaa kure kure mɔ bɛngɔta, eyia pukye a, ɔkɔyɛ tunn, yeɛ ɛsraen koso ngɔta.

¹¹Mebaahwe ewiase so wɔ ye bɔne nwo, ngɔhwe bɔnefoɛ so wɔ b’amumuyɛɛ nwo, ngɔpɛ ahandaenfoɛ b’anwomasoɛ ne aso, yeɛ ngɔbrɛ atianuserɛfoɛ bɛ nduhoɛ ne ase.

¹²Ngɔma adasa mmaa bɛ nwo kɔyɛ se kɔtra kyɛbɔ sikaa kɔkorɛ paa ye nyanɛ nwo yɛ se ɔ, yeɛ kuro mmenia wora, bɛ nwo kɔyɛ se kɔtra kyɛbɔ Ofire sikaa kɔkorɛ ye nyanɛ nwo yɛ se ɔ.

¹³Yiti ngɔwoso anwuro, aseɛ kopusu kofi ye boso, wɔ Asafo AWURADE ahonehulɛ ne anu, ɔne ye ɛyaafɛlɛ piri kyẽa ne.

¹⁴Sona biala kɔhɔ ye nwo ama berɛ, bɛ mukoraa bɛkɔnwati bɛkɔhɔ bɛ maen nu, na bɛkɔyɛ kyɛ ɛwanzane bɔ bɛfoa ye ɔ, anaa mmoaen bɔ babɔ aya ɔ.

¹⁵Ebiala bɔ bekonwu ye ne, bɛkɔwɔ ye dadeɛ, yeɛ bɔ bɛkɔhye ye ne koso, ɔkɔtɔ ngrandɛ noa.

¹⁶Bɛkɔtete bɛ mma mmaa mmaa mɔ nu pasapasa bɔ bɛ nye tua ɔ. Bɛkɔfẽ b’awuro nningyein, na bɛkɔhyɛ bɛ ye mɔ bɛkɔto bɛ mmɔnaa.

¹⁷Tie, ngɔkanyane Medesefoɛ maa bekodwɔso bekotia bɛ, Medesefoɛ de, bemmu dwetɛ, yeɛ bɛ nye ngye sikaa kɔkorɛ nwo.

¹⁸B’agyaen kohũhũ mmerandeɛ nemɔ, bengonwu nnɔma mɔ anwumvoin, yeɛ ngwadaa koso ngɔyɛ bɛ anwumvo.

¹⁹ Na Babilɔn bɔ ɔte ahennie mɔ nu animnyam ne, Kaldeafoɛ b’anwohoahoa piri ne, ɔkɔyɛ kyɛ Sodom ne Gomora bɔ Nyameɛ huhuni bɛ ne.

²⁰Sona biala ngɔtena nu le, yeɛ ebiala ngɔtena nu wɔ aworɛ ndoatoasoɛ mukoraa nu. Arabofoɛ tutenafoɛ ne, bɛ nu biala ngosi ɛtena sua wɔ berɛ, yeɛ mmoaenneafoɛ biala ngɔma ye mmoaen ngɔla berɛ.

²¹ Ɛserɛ so ngaka aboyaa yeɛ bɛkɔfa berɛ bɛkɔyɛ bɛ dabea ɔ, patue mɔ koyi bɛ sua nemɔ anu tɛkyɛ, soholi mɔ kɔfa berɛ kɔyɛ b’awuro, na berɛ yeɛ eburo mbɔngye kogo abilie ɔ.

²²Kangane mɔ kopo wɔ ye abandenden nemɔ anu, ɛserɛ so ngyea kopo wɔ ye ahemvie nyemenenyemene nemɔ anu. Ye mmerɛ ne apingye, na ɔngɔhyɛ biala né wato ye.