Read Sehwi Yesaya 17 Bible Online

Yesaya 17 - Sehwi bible

Yesaya 17

¹ Damasko nwo nyekyire. Tie, Damasko ngɔyɛ kuro ko, ɔkɔkakyi esire.

²Aroye nguro nemɔ kɔkakyi kurofoen, bɛkɔyɛ nyɛmmoa mɔ deɛ, na bɛkɔlela berɛ bɔ ebiala ngɔma bengosuro ɔ.

³Bɛkɔsɛkye Efraim abandenden ne, bɛkɔbɔ Damasko ahennie ne tɔɔ, na Siriafoɛ bɔ bɛkɔha ne, b’animnyam kɔhɔ ase kyɛ Yisraelfoɛ deɛ ne ala, Asafo AWURADE noa dwirɛ ɛne.

⁴Na ɔkɔwa kyɛ, sɔ kyẽa ne, Yakob animnyam kɔhɔ ase, na ye nwo naen bɔ walɔ ɛloe ne, ɔkɔfɔ.

⁵Ɔkɔyɛ kyɛ aburoo bɔ ogyi berɛ bɔ kuaniɛ ɔfa ye sa pomba ye aleɛ ne ɔ, ɔkɔyɛ kyɛ ɛmo bɔ kuaniɛ ɔte ye si ne wɔ Refaim bɔnza nu ɔ.

⁶Nakoso ɛte bobe a ebie ka nu, kyɛbɔ bɛwoso olive bakaa a ebie ka so ne, mmaa nyɔ anaa nza ka bakaa mmaen frɔmfrɔm ne aso anwuro, bɔ nna anaa nnu ka ye mmaen bɔ wasu dɔsɔɔ ne aso ɔ, AWURADE Yisrael Nyameɛ noa dwirɛ ɛne.

⁷Na sɔ kyẽa ne, kuro sona kɔfa ye nwo kɔto Nyameɛ bɔ ɔbɔle ye ne aso, na ɔkɔma ye nye kɔla Yisrael Krongronniɛ ne so.

⁸Ɔngɔfa ye nwo ngɔto afɔleɛ mmokyea bɔ ɔte ye sa noa adwuma ne aso. Yeɛ Asera dosii anaa ɛyɛɛ afɔleɛ mmokyea bɔ wafa ye sa mmaa wayɔ ne koso, ɔngɔfa ye nye ngɔto so.

⁹Sɔ kyẽa ne, ye nguro bɔ bɛ nwo yɛ se nemɔ, bɛkɔyɛ kyɛ Hiwifoɛ ne Amorifoɛ nguro bɔ ɔnate Yisraelfoɛ ti bɛnwati bɛyakyili bɛ berɛ ne. Bɛkɔkakyi kurofoen.

¹⁰Ofikyɛ wɔ ngoalelɛ Nyameɛ ne, wɔ wora afi ye, na angaye Nyɔbotaen bɔ ɔbɔ wɔ nwo waen ne. Ye sɔ ne ati, ɔwɔ nu kyɛ edua nningyein paa paa de, edua nningyein bɔ ofi maen bie aso de,

¹¹ɔwɔ nu kyɛ ɛmaa befifi kyẽa bɔ edua ne ala de, ɛmaa bɛbɔ nyerɛen ngyerɛmɔ ne ala bɔ edua ne de, nakoso aworabɔlɛ ne anwonyerɛ koangɔ kyẽa ne, ye mmaa bɔ wasu ne kotu komini.

¹²Bɛ yaakɔ! Maen maen mɔ so mmenia pee bɔ bɛyɛ dede ɔ, bɔ bɛyɛ dede kyɛ ɛpo bɔ obu fa so ɔ! Aa, maen maen mɔ bɛteatea nu, bɛyɛ dede kyɛ asue piri bɔ ɔse wuruwuru ɔ!

¹³Maen maen mɔ bɛyɛ dede kyɛ asue mɔ bɔ bɛse wuruwuru ɔ, nakoso Nyameɛ twi bɛ nyunu, na bɛnwati bɛkɔ dede, ɔfoa bɛ kyɛ afafu bɔ mvrama bɔ ye fi bokaa so ɔ, kyɛ mvuture bɔ ɔpɛ ye nwo wɔ mvrama piri nu ɔ.

¹⁴Tie, odwu nɔsoa a, ahunundetelɛ! Anzana aleɛ baahye ne, né bɛnne berɛ ko. Bɛ bɔ bɛfa koɛ bɛtoa yɛ ne, ɔne bɛ bɔ bɛbɔ yɛ so apaa ne, b’ayieleɛ ɛne.