Read Sehwi Yesaya 18 Bible Online

Yesaya 18 - Sehwi bible

Yesaya 18

¹ Wɔ yaakɔ oo, aseɛ bɔ bɛbɔ bɛ ndaa nu papapapa wɔ so, bɔ ɔwɔ Yitiopia asue nemɔ si dɔ ɔ.

²Wɔ bɔ etu ɛbɔfoɛ mɔ maa bɛfa ɛpo so, bɔ bɛtena elemmire ɛlɛen nu wɔ nzue so bɛkɔ ɔ! Ɛbɔfoɛ mɔ bɔ ɛmɔ nwo yɛ nyera ɔ, ɛmɔhɔ maen bɔ nu mmenia te ndendenn anwonyemenefoɛ nemɔ berɛ, maen bɔ bɛ nwo suronyi atɔ mmenia bɔ bepingye bɛ ɔ so, ɔne nziɛnziɛfoɛ so ɔ, anwoserɛ ne ngonimlilɛ maen ne, maen bɔ asue mɔ bahyehyɛ ye aseɛ nu ne.

³Ewiase mmenia mukoraa, ebiala bɔ ɔte aseɛ so ɔ, sɛ ɔfa frangaa pena mmokaa nemɔ aso a, ɛ́mɔnea! Sɛ ohu totorobɛndo a, ɛ́mɔtie!

⁴Ofikyɛ bɔ AWURADE ahã ahyire me ɛhe: “Ngɔtena nekaa bɔ nde ne konn ngɔto me nye ngɔnea, kyɛbɔ eyia bɔ a, ahuhuro ba ɔ, kyɛbɔ ɛborɔ gua pee wɔ mmerɛ bɔ bɛfa fieso aleɛ ɔ.”

⁵Ofikyɛ, anzana fieso aleɛ falɛ kodwu, mmerɛ bɔ nyerɛen nemɔ baporo bagua, bɔ nyerɛen nemɔ bati bayɛ bobe gyegyerewaa ne, ɔkɔfa asɔsɔaa kɔpepɛ mmaen bɔ wafefɛ ye nwo ne kogua, na okodwaadwaa mmaen nemɔ kogua.

⁶Na ɔkɔyakyi ye mukoraa berɛ kɔma mmokaa so nnomaa bɔ bɛkye ngaka bedi ɔ, bɛ ne aseɛ so ngaka. Ɔkɔyɛ nnomaa bɔ bɛkye ngaka bedi ɔ b’aleɛ wɔ ahuhuro mmerɛ, ná wayɛ aseɛ so ngaka aleɛ wɔ prakasua mmerɛ.

⁷Na sɔ mmerɛ ne, bɛkɔfa akyɛdeɛ bɛkɔbrɛ Asafo AWURADE, bɛkɔfa bekofi maen bɔ nu mmenia te ndendenn anwonyemenefoɛ, bɔ bɛ nwo suronyi atɔ mmenia bɔ bepingye bɛ ɔ so, ɔne nziɛnziɛfoɛ mɔ so ɔ, anwoserɛ ne ngonimlilɛ maen ne, bɔ asue mɔ ahyehyɛ b’aseɛ nu ne, bɛkɔfa bɛkɔbrɛ Asafo AWURADE wɔ Sion bokaa ne aso, nekaa bɔ AWURADE dumaa la so ne.