Read Sehwi Yesaya 23 Bible Online

Yesaya 23 - Sehwi bible

Yesaya 23

¹ Tiro nwo nyekyire ɛhe: O, Tasise ɛlɛen mɔ, ɛ́mɔbɔ awuye, ofikyɛ Tiro abɔ, bɔ sua ko po wanga ɔ, yeɛ ɛlɛen agyinaleɛ koso wanga. Ngraa ne fi Kitim[10] aseɛ so yeɛ waadwu bɛ berɛ ɔ.

²O mboanoafoɛ, ɛ́mɔyɛ konn! O Sidon dwadifoɛ, bɛ bɔ bɛpɛle ɛpo ne, bɛmaa enyane wɔ nwo,

³bɛfale ɛpo tɛtrɛtɛɛ so. Né enya wɔ sikaa fi Sihɔ aburoo nu, ɔne Naele noa fieso nningyein nu, na ɛɛyɛle nekaa bɔ maen maen mɔ bedi dwaa ɔ.

⁴O Sidon, ɛpo nu anwoserɛ afealeɛ, maa ɔyɛ wɔ nya, ofikyɛ ɛpo nwa: “Mmvole aworɛ so le, yeɛ nnwole baa le, nndetele mmerandeɛ le, yeɛ nndetele ndaluwa le.”

⁵Sɛ sɔ dwirɛ ne odwu Misraim a, bekoli bɔ wato Tiro ne nwo aworabɔlɛ.

⁶O mboanoafoɛ, ɛ́mɔpɛ nu bɛhɔ Tasise! Ɛ́mɔbɔ awuye!

⁷Ɛmɔ kuro bɔ anigye wɔ nu, bɔ ɔwɔ berɛ fi daa tetetete, bɔ ye gya fale ye hɔle dedeede maa ɔɔtenane dɔ ne, aso ye ayieleɛ ɛne?

⁸Tiro bɔ osi ɛhene mɔ, bɔ ye dwadifoɛ te nnehyeɛ, bɔ ye dwadifoɛ te mmeni titire wɔ wiase ɔ, nwa yeɛ ɔyɔle sɔ nhyehyɛleɛ ne tiale wɔ ye?

⁹Asafo AWURADE yeɛ wayɔ sɔ nhyehyɛleɛ ne ɔ, kyɛ ɔkɔma animnyam amukoraa b’anwomasoɛ nyunu kogua ase, kyɛ ɔkɔbrɛ aseɛ so atitirefoɛ amukoraa ase.

¹⁰O Tasise awa brasua, yi fa w’aseɛ ne aso kyɛ asue Naele, ofikyɛ ɛlɛen agyinaleɛ biala nne berɛ ko.

¹¹Watengyɛ ye sa wahyire ɛpo so, wapusu ahennie mɔ, na AWURADE ahyɛ mmeraa wafa Kanaan nwo, kyɛ bɛsɛkye ye anwoserɛ afealeɛ nemɔ.

¹²Na wahã kyɛ, “O Sidon awa brasua, ababunu bɔ bɛhyɛ wɔ so ɔ, ɛngɔhɔ so ngoli ahurusi ko, dwɔso, pɛ nu kɔ Kitim, na dɔ po, engonya wɔ nwome ngole.”

¹³Nea, Kaldeafoɛ b’aseɛ ne! Nna Asiriafoɛ, na mmom Kaldeafoɛ yeɛ bɛmane ngaka aboyaa fale Tiro kuro ne ɔ. Kaldeafoɛ yeɛ betuale kuro ne, ná besa bebubuli ye nwo waen beguale gyirigorɔɔ maa ɔkakyili kurofoen ɔ.

¹⁴O Tasise ɛlɛen mɔ, ɛ́mɔbɔ awuye, ofikyɛ babubu ɛmɔ anwoserɛ afealeɛ ne.

¹⁵Na ɔkɔwa kyɛ, sɔ kyẽa ne, mmenia wora kofi Tiro afoɛ aburasoo, bɔ ɔte ɛhene ko ye ngoa tendenn ɔ. Na sɛ afoɛ aburasoo ne dwu a, bɔ ɔkɔto Tiro ne, ɔkɔyɛ kyɛ gyanderaniɛ edwein ne:

¹⁶Wɔ, gyanderaniɛ bɔ mmenia wora afi wɔ ɔ, fa adengum, natenate kuro ne anu! To edwein fɛfɛɛfɛ, to edwein pee, amaa ɔnate so bakaye wɔ.

¹⁷ Na ɔkɔwa kyɛ, sɛ afoɛ aburasoo ne dwu a, AWURADE kɔɔpasa Tiro nwo. Okosa kɔɔtoa ye dwaalilɛ ne aso, na ɔne ewiase ahennie amukoraa bɛkɔɔbɔ adwaman wɔ aseɛ so.

¹⁸Nakoso ye dwaa nningyein ne ye mvasoɛ ne, ɔkɔyɛ krongron kɔma AWURADE. Bɛngɔfa ngosie, yeɛ bɛngɔfa ngɔfea, na mmom ye dwaa nningyein ne kɔyɛ bɛ bɔ bɛwɔ AWURADE nyunu ɔ bɛ deɛ, na ɔkɔmaa bekonya aleɛ pee bekoli, ɔne ɛtena paa bɛkɔhera.