Read Sehwi Yesaya 25 Bible Online

Yesaya 25 - Sehwi bible

Yesaya 25

¹O AWURADE, wɔ yeɛ ɛte me Nyameɛ ɔ, ngɔkamvo wɔ, ngɔye wɔ dumaa ayɛ, ofikyɛ ayɔ anwanwadeɛ nningyein, ofi tetetetetete yeɛ ɛyɔle sɔ nhyehyɛleɛ ne ɔ, na ali so nahorɛ nu.

²Ofikyɛ akakyi kuro maa wayɛ esire, ama kuro bɔ bato ye nwo fasue ɔ wakakyi kurofoen, maen maen mɔ b’ahemvie ne, nna kuro ahɔ ko, na bengosi ye ko le.

³Yiti maen maen anwoserɛfoɛ bɛkɔhyɛ wɔ animnyam, na maen maen atianuserɛfoɛ, bɛ kuro ne kosuro wɔ.

⁴Ofikyɛ ɛte bɛ bɔ bɛyɛ anwumvo ɔ b’anwoserɛ afealeɛ, ehiafoɛ b’anwoserɛ afealeɛ wɔ b’anwokyere nu, afealeɛ wɔ mvrama piri nu, ɔne nekaa fɔnwoo wɔ eyia gyireingyirein nu, ofikyɛ atianuserɛfoɛ b’anyandimlilɛ ne, ɔte kyɛ mvrama bɔ otu kofĩ fasue ɔ,

⁵kyɛ aseɛ wosee so ahuhuro. Ɛbrɛ ɛwɔfoɛ maen mɔ bɛ dede ne ase, kyɛbɔ munungum ma ahuhuro noa brɛ ase ɔ, na sɔ ala yeɛ apɛ anyandimlilɛfoɛ bɛ dwein so ɔ.

⁶Bokaa he aso yeɛ Asafo AWURADE kɔto poen kɔma maen amukoraa ɔ: Ɔkɔma bɛ aleɛ paa, nzaa paa, naen bɔ bowue nu fonyi wɔ nu, yeɛ nzaa bɔ basongyi so ɔ.

⁷Sɔ bokaa he aso ala yeɛ ɔkɔsɛkye ɛtena bɔ ɔkyekye maen amukoraa bɛ nyunu ne, ɔne ngatanyunu bɔ ɔkata maen mukoraa bɛ so ne.

⁸ Okonunu ewue boso kofi berɛ afebɔɔ. AWURADE Nyameɛ kokyikyi ebiala nye moen, na ɔkɔye ye maen animguaseɛ kofi aseɛ so amukoraa; ofikyɛ AWURADE noa dwirɛ ɛne!

⁹Na sɔ kyẽa ne, mmenia kose kyɛ, “Ɛ́mɔnea, yɛ Nyameɛ bɔ yɛ nye la ye so kyɛ okole yɛ ne, ye ɛhe! AWURADE bɔ yafa yɛ nye yato ye so ne, ye ɛne. Ɛ́mɔma yɛ nye gye, ná yɛli ahurusi wɔ ye ngoalelɛ ne anu.”

¹⁰AWURADE tumi asaa ne kɔtena bokaa he aso, nakoso Moabo de, okotiatia ye so kɔbɛtɛ ye, kyɛbɔ betiatia ewura so wɔ fofoɛ so ɔ.

¹¹Ɔwɔ nu kyɛ ɔkɔtrɛtrɛ ye sa nu wɔ bokaa ne anu, kyɛbɔ sona trɛtrɛ ye sa nu obia asue nu ɔ, nakoso ye anwomasoɛ ne ye yɔleɛ ne, AWURADE kɔbrɛ ye ase.

¹²Na wɔ fasue ndendenn pindinn nemɔ, okobu kogua, na okodwiri ye kogua ase kogua mvuture nu.