Read Sehwi Yesaya 26 Bible Online

Yesaya 26 - Sehwi bible

Yesaya 26

¹Sɔ kyẽa ne, bɛkɔto sɔ dwein he wɔ Yuda aseɛ so: “Yɛle kuro bɔ ye nwo yɛ se ɔ, wafa ngoalelɛ wayɛ yɛ nwo fasue ne ɛwaen.

²Ɛ́mɔbukye pambim nemɔ bɛ́ma tenenee maen bɔ odi nahorɛ ne oowura nu.

³Na sona bɔ ye adwene atindim wɔ wɔ nu ne, ɛbɔ ye nwo waen wɔ asomdwee bɔ odi mu ɔ nu, ofikyɛ ɔfa ye wora wura wɔ nu.

⁴Ɛ́mɔfa ɛmɔ wora béwura AWURADE nu afebɔɔ, ofikyɛ AWURADE Nyameɛ ɔte afebɔɔ nyɔbotaen.

⁵Ofikyɛ ɔbrɛ bɛ bɔ betira tumi ɔ ase, kuro bɔ babɔ ye nwo waen pambee ne, ɔbrɛ ye ase, odwiri ye gua ase, obu ye gua mvuture nu.

⁶Agyirɛ tiatia so, bɛ bɔ bɛyɛ anwumvo ɔ betiatia so, yeɛ ehiafoɛ koso betiatia so.”

⁷Teneneeniɛ atee tengyɛ, ɛma teneneeniɛ atimbire da so yɔɔ.

⁸O AWURADE, yɛ nye la wɔ ate wɔ wɔ ndɛenbualɛ atee ne aso, yɛ kra wora adɔ wɔ dumaa, ɔne wɔ nwo ngayeɛ.

⁹Me kra wora dɔ wɔ kɔngɔen, amba, me sunzum bɔ ɔwɔ me nu ne, ɔpena wɔ paa, ofikyɛ sɛ wɔ ndɛenbualɛ wɔ aseɛ so a, ewiase ama besua bra bɔ ɔtengyɛ ɔ.

¹⁰Sɛ enwu amumuyɛɛniɛ anwumvoin a, amumuyɛɛniɛ ne nzua kyɛ ɔkɔbɔ bra bɔ ɔtengyɛ ɔ; na aseɛ bɔ pɛpɛɛpɛyɛlɛ wɔ so ne, sɔ sona ne de, amumuyɛɛ yeɛ ɔyɔ ɔ, na onnwu kyɛbɔ AWURADE osi te piri ɔ.

¹¹ O AWURADE, apagya wɔ sa so, nakoso bennwu ye. Maa benwu kyɛbɔ esi kuro wɔ maen dwirɛ ɔ, ná bɛ nyunu ogua ase. See bɔ asiesie ama wɔ pɔfoɛ mɔ ne, maa ɔyera bɛ.

¹²O AWURADE, wɔ yeɛ ahyehyɛ asomdwee ama yɛ ɔ, na bɔ yɛkora ye yɔ amukoraa, wɔ yeɛ ɛyɔ ma yɛ ɔ.

¹³O AWURADE yɛ Nyameɛ, meneɛ biemɔ bɔ nna wɔ ahɔ ɔ bali yɛ so, nakoso wɔ ngome wɔ dumaa yeɛ yɛde yɛto nu ɔ.

¹⁴Bawuwu, bɛngɔtena ngoa nu, bayɛ awufoɛ, bengodwɔso, ofikyɛ ahwe bɛ so ahũhũ bɛ bɔkɔɔ, na akyikyi bɛ nwo ngayeɛ amukoraa boso afi berɛ.

¹⁵Nakoso, O AWURADE, ama maen ne ayɛ piri, ama maen ne ayɛ piri, bahyɛ wɔ animnyam, aseɛ ne, atrɛ ye wɛen amukoraa nu.

¹⁶O AWURADE, bɛpenane wɔ si atee wɔ b’amaneɛnwunɛ nu, besu bɛfrɛle wɔ wɔ mmerɛ bɔ né ɛtwe bɛ so ɔ.

¹⁷Kyɛbɔ brasua ɔnwonzɛ, ɔfo aworɛ so, ná ye ko ka ye maa osũ ne, O AWURADE, sɔ ala yeɛ yɛte wɔ wɔ nyunu ɔ.

¹⁸Yɛnwonzɛle, yɛ ko hale yɛ, nakoso bɔ yɛwole ye ne, ɔte kyɛ mvrama: yangora yamva ngoalelɛ yamma aseɛ so, ná waayɛ kyɛ po yɛngɔma ewiase mmenia bengonya ngoa ɔ.

¹⁹W’awufoɛ mɔ bekonya ngoa, bɛ fuin nemɔ bekotingye. O ɛmɔ bɔ ɛmɔla nnɛterɛ nu ɔ, ɛ́mɔdwɔso bɛ́to dwein beli ahurusi! O AWURADE, wɔ bosue ne, ɔte kanea bosue, na aseɛ kɔye bɛ bɔ bawuwu ɔ kɔwa.

²⁰Me maen, bra, baawura wɔ pumbu mɔ nu, ná toto wɔ nwo anoa nu; fa wɔ nwo fea kãa kɔpem kyɛ ahonehulɛ ne kɔtɔ nzue nu ɔ.

²¹Ofikyɛ AWURADE fi ye atenaleɛ berɛ ɔ́ba, kyɛ aseɛ so ama b’amumuyɛɛ ti ɔbaahwe bɛ so. Aseɛ kɔma mogya bɔ bahã bagua so ɔ nwo kɔla ali, na ɔngɔfa bɛ bɔ bahu bɛ wɔ so ne ngɔfea ko.