Read Sehwi Yesaya 27 Bible Online

Yesaya 27 - Sehwi bible

Yesaya 27

¹ Sɔ kyẽa ne, AWURADE kɔfa ye ngrandɛ serɛserɛ pirikua suronyisuronyi ne kɔhwe ɛlɛngyɛen suronyisuronyi, bɔ ɔte ewoo bɔ ye nwo yɛ nyera ne ye so. Ɔte ɛlɛngyɛen suronyisuronyi bɔ ɔbenzebenze ye nu ɔ, na AWURADE kosa kohũ sasrabɔnzam bɔ ɔwɔ ɛpo nu ne.

²Sɔ kyẽa ne, ɛ́mɔto bobe boo nyemenenyemene ne nwo dwein!

³Me, AWURADE, me yeɛ menea so ɔ, mmerɛ biala meguagua so nzue, mebɔ ye nwo waen kɔngɔen ne eyia, kyɛbɔ ebiala ngɔɔsɛkye ye ɔ.

⁴M’ahone atɔ nzue nu. Sɛ menwu agurɛ ne mmowue a, ahaa ngɔfa koɛ ngɔtoa bɛ, ahaa ngɔyera bɛ ngɔbɔ nu.

⁵Sana bɛbabɔ bɛ nwo adwaa wɔ me berɛ maa ɔnate so bɛ ne me tena asomdwee nu, maa bɛ ne me tena asomdwee nu.

⁶Mmerɛ bie baawa, Yakob kotira ndii, Yisrael kɔfefɛ kɔbɔ nyerɛen, na ɔkɔma ye mma koyi ewiase amukoraa tɛkyɛ.

⁷Aso wabo ye kyɛbɔ ɔbole bɛ bɔ bɛbole ye ne anaa? Anaakyɛ wahũ ye kyɛbɔ ohuhuni mmenia bɔ behuni ye ne anaa?

⁸Bɛ bɔne so yeɛ egyinane pɛle bɛ asue ɔ. Ɔfale ye nwomeɛ suronyisuronyi ne foane bɛ kyɛ eyia afiteleɛ mvrama anoa serɛserɛ kyẽa ne.

⁹Yiti ɔnate ɛhe aso, okokyikyi Yakob amumuyɛɛ kofi berɛ, na ye bɔne bɔ baye bafi berɛ ne, so mmaa mukoraa bɔ okosu ɛhe: Okobubu afɔleɛ bokyea nyɔboɛ ne amukoraa, okofurofuro bɛ koti bɛ muhumuhu kyɛ nnɛterɛ, bɔ Asera dosii ne ɛyɛɛ bokyea biala ngogyinagyina berɛ ko ɔ.

¹⁰Ofikyɛ kuro bɔ bato ye nwo fasue ne, ɔkɔkakyi kurofoen, kyɛ kuro bɔ batu bafi so, bɔ bayakyi ye maa wayɛ kyɛ ɛserɛ so ɔ; na berɛ yeɛ nandwie mmaa bekodidi ɔ, berɛ yeɛ bekobutubutu bɛkɔpomba ye mmaen nemɔ bekoli ye nyaa ɔ.

¹¹Sɛ ye mmaen frɔmfrɔm nemɔ bewu a, bebubu begua, na mmrasua basesa bɛfa bɛyɛ eyein. Ofikyɛ bɛte maen bɔ ndeaseɛ abɔ bɛ ɔ; ye sɔ ne ati, bɔ ɔbɔle bɛ ne ngonwu bɛ anwumvoin, bɔ ɔnwone bɛ ne ɔngɔlo bɛ.

¹²Na ɔkɔwa kyɛ, sɔ kyẽa ne, ofi asue Yufreti kodwu Misraim bɔnza ne, AWURADE kɔboro ye aburoo, na ɛmɔ Yisraelfoɛ, ɔkɔpa nu kɔyeye ɛmɔ ngoko ngoko.

¹³ Sɔ kyẽa ne, bekohu totorobɛndo pirikua ne, na bɛ bɔ beminini bɛhɔle Asiria aseɛ so, bɛ ne bɛ bɔ bɛsesale bɛ bɛhɔle Misraim aseɛ so ne, bɛkɔwa bɛkɔɔsɔne AWURADE wɔ bokaa krongron ne aso, wɔ Yerusalem.