Read Sehwi Yesaya 30 Bible Online

Yesaya 30 - Sehwi bible

Yesaya 30

¹AWURADE nwa nyoo, “Mmaa bɔ bayɛ lɔen, bɛ yaakɔ, bɛbɔ porɛ bɔ nna me nhyehyɛleɛ ahɔ ɔ, bɛyɛ apam bɔ me sunzum mvoa so ɔ, bɛyɔ bɔne bɛtoatoa bɔne so.

²Besi nu bɛkɔ Misraim bɔ bemmisa me bennwu m’adwene ɔ, kyɛ bɛkɔ Faro berɛ maa ɔbɔ bɛ nwo waen, kyɛ bɛkwaapena Misraim fɔnwoo nu bewura.

³Nakoso Faro berɛ waenbɔlɛ ne, ɔkɔkakyi ɛmɔ animguaseɛ, yeɛ Misraim fɔnwoo nu wuralɛ ne, ɔkɔkakyi ɛmɔ nyanzoen.

⁴Yuda hene safohene mɔ baadwu Soan, yeɛ ye somafoɛ mɔ koso baadwu Hanese de,

⁵nakoso bɛ mukoraa bɛ nyunu agua ase, ɔnate maen bɔ bɛ nwo ngɔwa mvasoɛ ngɔma bɛ ne ati, bɔ bengonya bɛ berɛ mmokalɛ anaa mvasoɛ biala, na mmom animguaseɛ ne nyanzoen yeɛ bekonya ye ne.”

⁶Ngwaen dɔ aseɛ ne aso ngaka nwo nyekyire ɛhe: Bɛfa amaneɛ ne yealɛ aseɛ so, aseɛ bɔ gyata beleɛ ne gyata nyii wɔ so ɔ, bɔ ɛbɔnaa ne ewoo bɔ otu ɔ wɔ so ɔ, bɛfa b’anwonyadeɛ bɛsoa afunum mɔ, yeɛ bɛfa b’agyapadeɛ bɛteta afupɔngɔ mɔ si akyakya ne aso, kyɛ bɛkwaafa bɛma maen bɔ bengonya ye so mvasoɛ biala ɔ.

⁷Ofikyɛ Misraim mmokalɛ ne ɔte mbaen bɔ mvasoɛ nne so ɔ. Yiti mato ye dumaa “Rahabo bɔ ɔngora huu yɔ ɔ.”

⁸Afei kɔ, kyerɛ edwirɛ ne nyɔboɛ so wɔ bɛ nyunu, ná kyerɛ gua nwomaa nu maa kyẽa bie ɔyɛ adanzeɛ afebɔɔ.

⁹Ofikyɛ bɛte maen bɔ bɛyɛ lɔen ɔ, mmaa nnakannakafoɛ, mmaa bɔ bɛnyɛ sotie bɛmma AWURADE mmeraa ɔ.

¹⁰Na bese mmenia bɔ bɛse ase ne kyɛ, “Nnɛma ɛmɔnwu nikye”; yeɛ bese ngɔmhyɛlɛfoɛ koso kyɛ, “Nnɛma ɛmɔhyɛ edwirɛ nahorɛ nwo ngɔm bekyire yɛ; na mmom ɛmɔhã edwirɛ bɔ ɔyɛ yɛ so anu fɛ ɔ behyire yɛ, ɛ́mɔli ngɔndorɔ,

¹¹ɛ́mɔmakye béfi atimbire ne aso, ɛ́mɔfi atee ne aso, nnɛmɔmaa yɛte Yisrael Krongronniɛ ne nwo dwirɛ ko.”

¹²Yiti Yisrael Krongronniɛ ne nwa: “Ɔnate kyɛ ɛmɔapo sɔ dwirɛ he, ná ɛmɔafa ɛmɔ wora bawura nhyɛsoɛ ne nnakannaka nu, ná ɛmɔafa bɛ nwo bato so ne ati,

¹³musue he kɔwa ɛmɔ so, kyɛ, terɛ tendenn bɔ wapakye, bɔ wabukye hanwuu bɔ ɔpena bu ɔ, bɔ ye bugualɛ ne, ɔba mvum nu, ɔne berɛ ne ala ɔ.

¹⁴Okobubu ye kyɛ ngukuenwonɛniɛ ye bua bɔ babobɔ ye nyokonyoko bɔ ebie nga mma bennya ye bue ne bie bɔ bɛkɔfa bekosuso bokyea nu see ɔ, anaakyɛ bɔ bɛkɔfa bɛkɔsa abura nu nzue ɔ.”

¹⁵Na AWURADE Nyameɛ, Yisrael Krongronniɛ ne, ɔnwa: “Sɛ ɛmɔsa bɛba me berɛ, ɔne kyɛ ɛmɔde bɛ nwome wɔ me nu a, yeɛ ɛmɔkonya ngoa ɔ; konnyɛlɛ ne anyelasoɛ nu yeɛ ɛmɔ anwoserɛ wɔ ɔ.” Nakoso ɛmɔanguro ye sɔ,

¹⁶na mmom ɛmɔhane kyɛ, “Daabi, yɛkɔtena mbɔngɔ so yɛkɔnwati yɛkɔhɔ.” Amba, ɛnwatilɛ ala yeɛ ɛmɔkɔnwati ɔ! (Ɛmɔnwa:) “Mbɔngɔ bɔ bɛ nwo yɛ nyera ɔ yeɛ yɛkɔtena so yɛkɔhɔ ɔ.” Na ɔnate sɔ ati, bɛ bɔ bɛfoa ɛmɔ ne, bɛ nwo kɔyɛ nyera.

¹⁷Bɛ nu ko nwo suronyi ɔkɔma mmenia apee kɔnwati, bɛ nu nnu nwo suronyi ɔkɔma ɛmɔkɔnwati, kɔpem kyɛ ɛmɔ ayieleɛ kɔyɛ kyɛ frangaa bɔ ogyi bokaa ti afia ɔ, kyɛ sɛngyerɛnneɛ bɔ ogyi pambaa so ɔ.

¹⁸Ye sɔ ne ati, AWURADE ɔnwondɛ kyɛ ɔkɔlo ɛmɔ ɔ, na waboaboa ye nwo kyɛ okonwu ɛmɔ anwumvoin ɔ, ofikyɛ AWURADE te pɛpɛɛpɛyɛlɛ Nyameɛ, na ebiala bɔ ɔfa ye wora wura ye nu ne, onya saleɛ.

¹⁹Amba, maen ne kɔtena Sion wɔ Yerusalem, engosũ ko. Sɛ esũ frɛ ye a, okonwu wɔ anwumvoin paa; ɔte ala a, ɔkɔtɛ wɔ so.

²⁰Ɔwɔ nu kyɛ AWURADE ma ɛmɔ amaneɛnwunɛ aleɛ ne yealɛ nzue de, nakoso wɔ Kyerɛkyerɛniɛ ne ɔngɔfa ye nwo ngɔfea wɔ ko, na mmom wɔ nye konwu wɔ Kyerɛkyerɛniɛ ne.

²¹Na sɛ ɛmɔdi makyebu bɛkɔfa famaa anaa bɛen a, wɔ so kɔte edwirɛ bie wɔ wɔ si dɔ kyɛ, “Atee ne ɛhe, ɛ́mɔfa so!”

²²Na w’amoen mɔ bɔ bafa ɛdwetɛ baboro bɛ nwo, ɔne bɔ bafa sikaa kɔkorɛ baboro bɛ nwo ne, ɛkɔfa efiɛ kɔhã bɛ, ekofindi bɛ kogua kyɛ manzaa asiaa, na ekose bɛ kyɛ, “Ɛ́mɔfi me so bɛhɔ!”

²³Na afei ɔkɔtɔ esue kogua nningyein bɔ edua ye wɔ aseɛ so ɔ so, ɔne aseɛ ne aso aleɛ bɔ ɔkɔwa ɔ so, na bɛkɔyɛ mbiri mbiri ne pee. Sɔ mmerɛ ne, wɔ nyɛmmoa kodidi wɔ aseɛ pirikua bɔ ngaka aleɛ wɔ so ɔ so.

²⁴Na nandwie mɔ ne afunum mɔ bɔ bɛyɔ fieso adwuma ne, bekoli aleɛ paa bɔ bafa ɛkorɛ ne kɛndɛen bahuhu so ɔ.

²⁵Na mmenia hunɛ kyẽa piri ne, bɔ abandenden mɔ kobubu kogua ne, asue mɔ ne asue ba mɔ bɛkɔtengyɛ wɔ bokaa tendenn biala ne pambaa tendenn biala so.

²⁶Asa koso, ɛsraen talɛ ne kɔyɛ kyɛ eyia talɛ, yeɛ eyia talɛ ne kɔyɛ mmɔhoɛ nzoo kyɛ bafa ye talɛ ɛlɛsoo babɔ nu ɔ, wɔ kyẽa bɔ AWURADE kɔkyekye ye maen ngena so, bɔ ɔkɔma bɛ nwo pakyepakyelɛ ne kɔhɔ ɔ.

²⁷Tie, AWURADE dumaa fi dedeede yeɛ ɔ́ba ɔ, ye ahone ahu piri paa, wɔ nwosina munguu bɔ otu kɔ anwuro ɔ nu, ɛyaafɛlɛ ayi ye noa nu to, na ye temverema te kyɛ see bɔ ɔ́yera nikye ɔ.

²⁸Ye nwomeɛ te kyɛ asue bɔ wayi wabu wafa so bɔ odwu bɛ kɔme anu ɔ, kyɛ ɔfa ɛsɛkyelɛ huhuamoa ohuhu maen mɔ so, ná ɔfa nyamaa bɔ ɔkɔma maen mɔ bekoli makyebu ɔ ɔsosɔ bɛ noa.

²⁹Ɛmɔkɔto dwein bɔ ɔte kyɛ aluolue krongron dwein bɔ ɛmɔto ye kɔngɔen ne; na ɛmɔ nye kɔgye kyɛbɔ ɛmɔhu aweɛn besi nu bɛkɔ AWURADE bokaa ne aso, Yisrael Nyɔbotaen ne aso ɔ.

³⁰AWURADE kɔmaa bɛkɔte ye komvi totohyia ne, na ɔkɔmaa bekonwu ye tumi asaa bɔ odwu ba ase ne, wɔ ɛyaafɛlɛ pirikua ne see bɔ ogye wuronyiwuronyi nu, wɔ esue titititi ne mvrama piri ne asukɔtwea kungumaboɔ nu.

³¹Na AWURADE komvi ne ati, Asiria nwo kɔwoso ye tɛtɛtɛtɛ, mmerɛ bɔ ɔkɔfa ye mbire ne kofi ye ne.

³²Na ɔkɔwa kyɛ, asotwe mbire bɔ AWURADE kɔfa kofi ye biala ne, ɔkɔgyegye kyɛ akasaa ne sangoo, na ɔkɔfa ye tumi piri ne ɔne ye bɛkɔho.

³³Ofikyɛ, ofi tetetete yeɛ wasiesie kumaa bɔ bɛyera fofoɛ nu ɔ, wasiesie wama Asiria hene, nu te kuronn, ɔtrɛ, na see ne eyein pee wɔ nu. Na AWURADE nwomeɛ bɔ ɔte kyɛ sɔfe bɔ ɔtengyɛ kɔ ne yeɛ ɔmaa ɔsɔ ɔ.