Read Sehwi Yesaya 33 Bible Online

Yesaya 33 - Sehwi bible

Yesaya 33

¹Sɛkyefoɛ, wɔ yaakɔ, wɔ bɔ wɔ de, bɛssɛkyele wɔ ɔ; wɔ, nnakannakaniɛ, bɔ wɔ de ebiala ɔllakalakale wɔ ɔ! Sɛ enya yie ye sɛkyelɛ a, wɔ koso bɛkɔsɛkye wɔ, yeɛ sɛ eyie wɔ nnakannaka ne a, wɔ koso bɛkɔlakalaka wɔ.

²O AWURADE, do yɛ, wɔ yeɛ yɛ nye la wɔ so ɔ. Maa yɛnya w’anwoserɛ ne ngyerɛmɔ biala, yeɛ wɔ ngoalelɛ ne wɔ anwokyere mmerɛ nu.

³Ɛbɔ nu kurududududu a, maen maen mɔ bɛnwati, sɛ ekyire wɔ tumi a, maen maen mɔ bɛbɔ aya.

⁴Na mmenia bɛfẽ ɛmɔ nningyein bɛyɛ koɛ nu nzesadeɛ kyɛbɔ ɛsaa di ndire ɔ; na kyɛbɔ mmɛbɛ mbiri behuru bɛpepe ne, sɔ ala yeɛ mmenia behuru bɛpepe so ɔ.

⁵AWURADE te totohyia, ofikyɛ ɔte anwuro anwuro dɔ paa, wama pɛpɛɛpɛyɛlɛ ne tenenee bayi Sion tɛkyɛ.

⁶Ɔkɔyɛ wɔ mmerɛ so nyinasoɛ pindinn, ɔte ngoalelɛ, nworɛ ne nimdeɛ mmorosoɛ, na AWURADE surolɛ yeɛ ɔte ye agyapadeɛ ɔ.

⁷Tie, bɛ kwabranoa nemɔ bɛteatea nu wɔ mmorɔnoɛ nemɔ aso, asomdwee ɛbɔfoɛ nemɔ besu hahii.

⁸Atimbire nemɔ aso ayɛ kenananana, mmenia mva so bendu atee ko, bɛpepɛ apam mɔ nu, bebu adanzefoɛ animtia, na bɛmva sona bɛnyɛ huu.

⁹Aseɛ di aworabɔlɛ, na wayɛ katerepee, Lebanon nyunu agua ase, na watwindwam; Saron ayɛ kyɛ ɛserɛ so; na Basan ne Kamɛl so mmakaa nyaa baporo.

¹⁰AWURADE nwa nyoo, “Afei ngodwɔso, afei ngohyire me tumi, afei ngɔmaa bekonwu me tumi.

¹¹Ɛmɔkɔnwonzɛ afafu, na ɛmɔkɔwo ngyɛngyɛma; ɛmɔ nwomeɛ te see bɔ ɔkɔyera ɛmɔ ɔ.

¹²Maen maen mɔ bɛkɔyera bɛkɔtɔ nzoen kyɛ mmakaa mmowue bɔ bapepɛ, bɔ bɛkɔyera ye see nu ɔ.”

¹³Ɛmɔ bɔ ɛmɔwɔ dedeede ne, ɛ́mɔtie bɔ mayɔ ɔ, yeɛ ɛmɔ bɔ ɛmɔpingye ne koso, ɛ́mɔle me tumi ne bɛ́to nu.

¹⁴Ɛserɛ ahã bɔnefoɛ bɔ bɛwɔ Sion ɔ, ahunundetelɛ atɔ bɛ bɔ benzuro Nyameɛ ɔ so. (Bɛnwa:) “Yɛ nu nwa yeɛ ɔkɔhora ɔne see bɔ ogye wuronyiwuronyi ne bɛkɔtena ɔ? Yɛ nu nwa yeɛ ɔkɔhora ɔne see wuronyiwuronyi bɔ ogye afebɔɔ ne bɛkɔtena ɔ?”

¹⁵Sana teneneeniɛ bɔ ɔkã nahorɛ, bɔ okyi aminɛlilɛ nu mvasoɛ, bɔ ɔnwaha ye sa kyɛ ongole fea-ase-ma, bɔ otuatua ye so kyɛ ongotie sona hunɛ nwo porɛ bɔ babɔ ɔ, bɔ omuamua ye nye kyɛ ɔngɔma ongonwu bɔne ɔ;

¹⁶ye yeɛ ɔkɔtena anwuro anwuro ɔ, nyɔbotaen afealeɛ nu kɔyɛ ye nwo waenbɔlɛ, ɔkɔmaa okonya ye noa aleɛ, na ye nzue ngɔbɔ ye.

¹⁷Wɔ nye konwu ɛhene ne wɔ ye anwonyemene nu, anyeɛ ne konwu aseɛ bɔ ɔtrɛ kɔ dedeede ɔ.

¹⁸Na w’adwene kɔdwene nningyein suronyisuronyi nwo kyɛ, “Sona bɔ odide ndɔ ne, ɔwɔ nisua? Sona bɔ né ɔkari ɛtoɔ sikaa ne, ɔwɔ nisua? Sona bɔ né ɔka abandenden nemɔ ne, ɔwɔ nisua?”

¹⁹Engonwu atianuserɛfoɛ nemɔ ko, mmenia bɔ bɛ dwudwolɛ te boborɔboborɔ bɔ ɛnde ye bo, bɔ bɛpɔtɔ bɔ ɛngɔhora ngɔte ye bo ɔ.

²⁰To wɔ nye nea Sion, kuro bɔ yɛdi yɛ aluolue nemɔ wɔ so ne! Wɔ nye konwu Yerusalem, bɔ ɔte asomdwee atenaleɛ, ɛtena sua bɔ bendutu ye bo, bɔ bengotutu ye pɛmbɛen nemɔ bo le ne, bɔ ye nyamaa ne anu biala ngɔtete ne.

²¹Amba, animnyam AWURADE ne, berɛ yeɛ ɔkɔyɛ yɛ kuro bɔ asue mbiri mbiri ne asue mmaa mmaa bɛwɔ ɔ, nekaa bɔ ɛlɛen bɔ bɛfa tabɔnga bɛkã ɔ ngora berɛ kɔ ɔ, nekaa bɔ ɛlɛen mbiri koso bɛngora nu berɛ pɛ ɔ.

²²Ofikyɛ AWURADE yeɛ ɔte yɛ ndɛenbualɛniɛ ɔ, AWURADE yeɛ ɔte yɛ mmeraahyɛlɛniɛ ɔ, AWURADE yeɛ ɔte yɛ hene ɔ, na ye yeɛ ɔkɔpepɛ kole yɛ ɔ.

²³Wɔ nyamaa ne anu agoho, ɔngora nzosɔ ɛlɛen bakaa ne anu pindinn, yeɛ ɔngora ndrɛtrɛ ɛlɛen frangaa ne anu. Bɛkɔhyɛ koɛ nu nzesadeɛ pee bɔ banya ye ɔ, bubuafoɛ kɔfẽ nningyein bɛkɔfa.

²⁴Maen baa biala ngɔhã kyɛ, “Mafokyɛ.” Na bɛ bɔ bɛte maen ne anu ne, bɛkɔfa b’amumuyɛɛ bɛkɔhyɛ bɛ.