Read Sehwi Yesaya 34 Bible Online

Yesaya 34 - Sehwi bible

Yesaya 34

¹O maen maen mɔ, ɛmɔhwe bepingye me beetie, O mmenia, ɛ́mɔyɛ asoɛ betie! Ma aseɛ ne so nningyein amukoraa betie, ma ewiase, yeɛ nikyee biala bɔ ofi nu ba ɔ koso betie.

²Ofikyɛ AWURADE afɛ maen maen amukoraa so yaa, ye ahone ahu b’ɛlɔen amukoraa, wanoma bɛ bɔkɔɔ, na waye bɛ wama ehunɛ.

³Bekofindi bɛ mmenia bɔ bekohu bɛ ne bekogua, bɛ fuin nemɔ kɔbo mvamva, bɛ mogya kɔtengyɛ wɔ mmokaa nemɔ aso.

⁴Anwuro abɔdeɛ amukoraa bekohuro, bɛkɔbobɔ ewienu kyɛ nwomaa, nu abɔdeɛ amukoraa bɛkɔporo bekogua, kyɛbɔ bobe nyaa poro gua ɔ, kyɛbɔ borɔdoma nyaa poro fi ye bakaa so gua ɔ.

⁵Ofikyɛ me ngrandɛ ne, wano wama ye ko ayi wɔ anwuro, na nea, ódwu ba Edom so, ódwu ba maen bɔ manoma ye ne aso ɔbabua ye ndɛen.

⁶Mogya ayɛ AWURADE ngrandɛ ne anwo takaa, ɛloe afɔrefɔre ye nwo, mmoaen mmaa mogya ne mbɔngye mogya wayɛ ngrandɛ ne anwo, mmoaen nyii mɔ, bɛ saa nwo loe wayɛ ye nwo, ofikyɛ AWURADE asiesie afɔleɛ wɔ Bosra, ɔne ehunɛ afɔleɛ kandinga wɔ Edom aseɛ so.

⁷Torɔen mɔ ne bɛ bɛkɔbɔ nu bɛkɔtotɔ, yeɛ nandwie ne nandwie nyii mbiri mɔ koso. Mogya kɔloa b’aseɛ ne aso takaa, na ɛloe kɔma bɛ nnɛterɛ ne kɔyɛ twɔfee.

⁸Ofikyɛ ɔte AWURADE wereɛtɔlɛ kyẽa, ɔne afoɛ bɔ ɔkɔma Sion kosa konya bɔ wafi ye sa ne ɔ.

⁹ Edom asue mmaa mmaa kɔkakyi amena pikaa, ye nnɛterɛ kɔkakyi sɔfe, na ye aseɛ ne kɔkakyi amena bɔ see la nu ogye ɔ.

¹⁰Kɔngɔen oo, eyia oo, ongonua, na ye nwosina kotu kɔhɔ anwuro afebɔɔ. Aseɛ ne kɔkakyi kurofoen fi aworɛ ndoatoasoɛ so kodwu aworɛ ndoatoasoɛ so, na sona biala ngɔɔpɛ nu berɛ afebɔɔ.

¹¹Ɔkɔyɛ akorɔma ne kɔtɔkɔ mɔ b’aseɛ, patue ne adene mɔ b’atenaleɛ. AWURADE kɔfa basabasayɔlɛ nyamaa kɔsã aseɛ ne aso, yeɛ ɔkɔfa kurofoen nyɔboɛ koguagua so.

¹²Na bɛkɔfrɛ berɛ kyɛ: Ahennie Biala Nne Berɛ, na ye mbanyi amukoraa bɛ boso komini.

¹³Mmowue kofifi ye ahemvie nemɔ anu, yeɛ ndetema ne ɛfone kofifi ye abandenden nemɔ anu. Ɛserɛ so ngyea kole aseɛ ne kɔfa, na ɔkɔkakyi soholi mɔ b’atenaleɛ.

¹⁴Ɛserɛ so ngaka aboyaa ne supɔ so ngaka aboyaa bekooyia berɛ, eburo abɔngye kosũ kɔfrɛ ye mmango wɔ berɛ, kɔngɔen patue kɔɔtena berɛ, na ɔkɔfa berɛ kɔyɛ ye nwomelelɛ atenaleɛ.

¹⁵Berɛ yeɛ patue kɔnwo ye saen ɔ, ɔkɔto, ɔkɔhɔ abu, ɔkɔbobɔ, ɔkɔfa ye ndaa kobutu ye mma nemɔ aso, ɛkompɛtɛ mɔ kɔboa bɛ noa berɛ, ebiala ne obiɛngo.

¹⁶Ɛ́mɔpena AWURADE nwomaa ne bɛ́kenga. Ɛhemɔ anu ko po ngomini, ebiala nne berɛ bɔ obiɛngo kɔhwere ye ɔ, ofikyɛ ahyɛdeɛ ne fi AWURADE noa nu, na ye Sunzum yeɛ waboaboa bɛ noa ɔ.

¹⁷Ye yeɛ wahyehyɛ aseɛ ne anu wafa wama bɛ ɔ, ye sa afa nyamaa wahyehyɛ nu wama bɛ, bɛkɔfa bɛkɔyɛ bɛ deɛ afebɔɔ, na bɛkɔtena so kofi aworɛ ndoatoasoɛ so kodwu aworɛ ndoatoasoɛ so.