Read Sehwi Yesaya 35 Bible Online

Yesaya 35 - Sehwi bible

Yesaya 35

¹Ɛserɛ so ne aseɛ katerepee ne, bɛ nye kɔgye, aseɛ pralaa ne koli ahurusi, na ɔkɔbɔ nyerɛen kyɛ sukooko.

²Ɔkɔbɔ nyerɛen pee, na ɔkɔfa anika kɔto dwein koli ahurusi. Bɛkɔfa Lebanon animnyam ne bɛkɔma ye, Kamɛl ne Saron nyemene ne, bɛ yeɛ bekonwu AWURADE animnyam ne, yɛ Nyameɛ tumi ne ɔ.

³ Asaa bɔ nu ayɛ bɛtɛɛ ne, ɛ́mɔma nu yɛ se, yeɛ nangoroma bɔ nu ayɛ hodwoo ne, ɛ́mɔmiamia nu.

⁴Ɛmɔhã behyire bɛ bɔ ahunundetelɛ atɔ bɛ so ne kyɛ, “Ɛ́mɔgyina pindinn, nnɛma ɛmɔsuro! Ɛ́mɔtie, ɛmɔ Nyameɛ ɔ́ba batɔ wereɛ! Nyameɛ bɔ ɔma ɛmɔ sa kã bɔ wafi ɛmɔ sa ne, ɔbaapepɛ de ɛmɔ ngoa.”

⁵ Na ɛhe kɔma anyesiniwaafoɛ bɛ nye kɔte, asotiniwaafoɛ bɛ so kɔte dwirɛ;

⁶bubuafoɛ bekohuruhuru kyɛ dabɔɔ, na emumu temverema kɔto ahurusi dwein. Ofikyɛ asue mɔ kopu kofi ɛserɛ so, yeɛ asue mmaa mmaa kopu kofi aseɛ pralaa so;

⁷anweaa futuu hyerɛhyerɛ kɔkakyi ɛkwaa, mbombonzue kopu kofi aseɛ katerepee so, na ɛserɛ so kyea ye atenaleɛ bɔ ɔda berɛ ne, nzenzaen ne elemmire ne ngyɛngyɛma kofifi berɛ.

⁸Atimbire kɔɔla berɛ, na bɛkɔto ye dumaa Atee Krongron. Sona bɔ ye nwo nde ne, ɔngɔfa so bie, atee ne kɔyɛ Nyameɛ mmenia bɛ deɛ, na ngwaseafoɛ po bengomini wɔ atee ne aso.

⁹Gyata biala ngɔwa berɛ, yeɛ kaka aboyaa biala ngɔpe so, bengonwu bie wɔ berɛ, na mmom bɛ bɔ Nyameɛ apepɛ ale bɛ ne yeɛ bɛkɔfa so ɔ.

¹⁰Bɛ bɔ AWURADE apɔ bɛ wafi ngoaasolɛ nu ne, bekosa bɛkɔwa, bɛkɔfa edweintolɛ yeɛ bɛkɔwa Sion ɔ, bekonya anigye bɔ olle ayieleɛ ɔ, bɛ nye kɔgye, bekoli ahurusi, na aworabɔlɛ ne yealɛlilɛ kotu komini.