Read Sehwi Yesaya 36 Bible Online

Yesaya 36 - Sehwi bible

Yesaya 36

¹Na ɔwale kyɛ, Nana Hesekia lili afoɛ buru ne nna wɔ bia ne aso ne, Asiria hene Senakeribo fale koɛ ɔɔtoale Yuda nguro bɔ bato bɛ nwo fasue ne amukoraa, na olili bɛ so ngonim.

²Yeɛ Asiria hene somane ye safohene ne koɛhonɛfoɛ pee fili Lakise maa bɛhɔle Nana Hesekia berɛ wɔ Yerusalem. Na safohene ne, oogyinane dodobɛen bɔ nzue tengyɛ fa nu kogua sorɔ dɔ ɛkwaa bɔ ɔwɔ atapoɛ atee so ne anwo.

³Na Hilkia awa Eliakim bɔ ɔnea ahemvie berɛ ne, ɔne ahyerɛlɛniɛ Sebena, yeɛ Asafe awa Yoa bɔ ɔte abakɔsɛm ahyerɛlɛniɛ ne, beeyiale ye.

⁴Yeɛ safohene ne sele bɛ kyɛ, “Ɛmɔhã behyire Hesekia kyɛ, Asiria hene bɔ ɔte ɛhene bɔ odi mu paa ne, obisa wɔ kyɛ: Nzikyɛ yeɛ afa wɔ nwo ato so bɔ wamaa asi wɔ hue sɔaa e?

⁵Ɛnwa nzɛ bɛ noa mbaen yeɛ bɛfa bɛko koɛ ɔ? Nwa yeɛ afa wɔ nwo ato ye so bɔ yiti ayɛ me nwo lɔen e?

⁶ Tie, Misraim bɔ afa wɔ nwo ato ye so ne, ɔte pɔmaa bɔ onzo ɔ, na ebiala bɔ okokisa ye ne, okobu kɔwɔ ye sa nu. Sɔ yeɛ Misraim hene Faro ɔfa di ebiala bɔ ɔkɔfa ye nwo kɔto ye so ɔ.

⁷Nakoso sɛ ɛmɔkã bekyire me kyɛ: Yafa yɛ nwo yato AWURADE yɛ Nyameɛ so a, aso nna ye asɔneyɛɛ mɔ ne afɔleɛ mmokyea yeɛ Hesekia wabubu bɛ ye? Aso Hesekia wanga wangyire Yuda ne Yerusalem kyɛ, ‘Afɔleɛ bokyea he, so yeɛ ɔsɛ kyɛ ɛmɔsɔne ɔ’?

⁸Yiti bra ná ɛne me mene Asiria hene bɛyɛ nhyehyɛleɛ. Sɛ ekonya mbɔngɔ mɔ nwo pɔngɔhanɛfoɛ a, ahaa ngɔma wɔ mbɔngɔ apee nyɔ.

⁹Me mene ye safohene mmaa mmaa nemɔ po, ɛyɛ sɛɛ né ahora agyina bɛ nu ko po nyunu, wɔ aberɛ bɔ Misraim teaseɛnam mɔ ne pɔngɔhanɛfoɛ yeɛ afa wɔ nwo ato bɛ so ɔ?

¹⁰Afei koso, aso nna AWURADE yeɛ wagyina me si kyɛ mva koɛ mandoa maen ye ná nzɛkye ye ɔ? AWURADE sele me kyɛ, ‘Fa koɛ kɔteta maen he ná sɛkye ye.’ ”

¹¹Yeɛ Eliakim, Sebena ne Yoa besele safohene ne kyɛ, “Wɔ ngoaa, yɛsrɛ wɔ, kã edwirɛ ne kyire yɛ wɔ Aramaeke dwudwolɛ nu, ofikyɛ yɛte Aramaeke. Nnɛdwudwo kyire yɛ wɔ Yuda dwudwolɛ nu, ofikyɛ mmenia bɔ bɛwɔ fasue ne aso ne, bɛkɔte bɔ ɛkã ne.”

¹² Nakoso safohene ne sele kyɛ, “Aso ɛne wɔ mene angome ti yeɛ me mene somane me kyɛ mmra manga edwirɛ he ɔ? Mmenia bɔ bɛtete fasue ne aso ne, bɛboka so, ofikyɛ bɛ koso edwirɛ kɔto bɛ maa bekoli bɛ bɔbɔ bɛ bondua ná bano bɛ bɔbɔ bɛ mmien kyɛ ɛmɔ ala.”

¹³Yeɛ safohene ne dwɔsole teane nu serɛserɛ wɔ Yuda dwudwolɛ nu kyɛ, “Asiria hene bɔ ɔte ɛhene bɔ odi mu paa ne, ɛ́mɔtie ye noa dwirɛ oo!

¹⁴Nana nwa nyoo: Nnɛmɔma Hesekia lakalaka ɛmɔ, ofikyɛ ɔngɔhora ngɔpepɛ ngole ɛmɔ.

¹⁵Nnɛmɔma Hesekia lakalaka ɛmɔ maa ɛmɔfa bɛ nwo bɛto AWURADE so, maa ɛmɔkã kyɛ, ‘Amba, AWURADE kɔpepɛ kole yɛ, na ɔngɔfa sɔ kuro ye ngowura Asiria hene sa.’

¹⁶Nnɛma ɛmɔtɛ Hesekia so, ofikyɛ Asiria hene nwa: Ɛ́mɔfite bɛbra beeli ɛmɔ ti dwirɛ wɔ me berɛ. Ɔba ye sɔ a, ɛmɔ nu biala konya ye bɔbɔ ye bobe ne ye borɔdoma koli, na okonya ye bɔbɔ ye abura nu nzue kɔno,

¹⁷kɔpem kyɛ ngɔwa ngɔɔsesa ɛmɔ ngɔhɔ aseɛ bɔ ɔte kyɛ ɛmɔ deɛ ye ala so ɔ. Aseɛ bɔ aburoo ne nzaa, aleɛ ne bobe boo mɔ bɛwɔ so ɔ.

¹⁸Nnɛmɔma Hesekia lakalaka ɛmɔ kyɛ, ‘AWURADE kɔpepɛ kole yɛ!’ Maen maen mɔ bɛ nyameɛ nemɔ, aso bɛ nu bie wahora wale ye aseɛ wafi Asiria hene sa nu le?

¹⁹Hamate ne Apade nyameɛ nemɔ, bɛwɔ ni? Sefawim nyameɛ nemɔ, bɛwɔ ni? Bahora bapepɛ bale Samaria bafi me sa nu anaa?

²⁰Maen maen hemɔ bɛ nyameɛ nemɔ amukoraa, bɛ nu beni yeɛ wahora wapepɛ wale ye maen wafi me sa nu, bɔ yiti yeɛ AWURADE kɔpepɛ kole Yerusalem kofi me sa nu ɔ.”

²¹Nakoso bɛyɛle konn bɔ bammua ye ɔ, ofikyɛ Hesekia bɔle bɛ kɔkɔ kyɛ, “Nnɛma ɛmɔtɛ ye so.”

²²Yeɛ Hilkia awa Eliakim bɔ ɔnea ahemvie berɛ ne, ahyerɛlɛniɛ Sebena, yeɛ Asafe awa Yoa bɔ ɔte abakɔsɛm ahyerɛlɛniɛ ne, besunzuale bɛ ndaadeɛ nu, na bɛhɔle Hesekia berɛ bɛɛfale safohene ne dwirɛ ne bɛbɔle ye amaneɛ.