Read Sehwi Yesaya 37 Bible Online

Yesaya 37 - Sehwi bible

Yesaya 37

¹Na ɔwale kyɛ, Nana Hesekia tele sɔ dwirɛ nen, osunzuale ye bɔbɔ ye ndaadeɛ nu, ɔherale ɛsɛen tena, na ɔhɔle AWURADE awuro berɛ.

²Ɔsomane Eliakim bɔ ɔnea ahemvie berɛ ne, ahyerɛlɛniɛ Sebena, yeɛ asɔfo nemɔ anu mbanyi mɔ maa bɛhɔle Amoso awa ngɔmhyɛlɛniɛ Yesaya berɛ. Bɛherale ɛsɛen tena yeɛ bɛhɔle ɔ.

³Na besele ye kyɛ, “Hesekia nwa: ‘Ɛnɛ te aworabɔlɛ kyẽa, asohwenɛ ne animguaseɛ kyẽa. Mmrasua afo aworɛ so, nakoso bennya anwoserɛ bɛmva bɛndwe bɛ nwo.

⁴Safohene ne, edwirɛ bɔ ye mene Asiria hene wafa wasoma ye, kyɛ ɔfa ɔɔgoro Nyameɛ teasefoɛ nwo ne, ebiaa AWURADE wɔ Nyameɛ wate. Na AWURADE wɔ Nyameɛ kɔhwe ye so wɔ edwirɛ bɔ wate ne anwo. Yiti bɔ mbaeɛ bɔ nu yɛ se ɔ ma yɛ bɔ yaha ne.’ ”

⁵Na Hesekia mbanyi nemɔ hɔle Yesaya berɛ ne,

⁶Yesaya sele bɛ kyɛ, “Ɛmɔhã behyire ɛmɔ mene kyɛ, ‘AWURADE nwa: Musue dwirɛ bɔ Asiria hene ye mbanyi mɔ bahã batia me maa ate ne, nnɛmaa wɔ kunu tete wɔ wɔ ye nwo.

⁷Tie, ngɔfa sunzum bie ngowura ye nu. Ngɔmaa ɔkɔte ngraa bie bɔ ɔnate so okosa ye si kɔhɔ ye kuro ɔ. Na ngɔmaa ɔkɔtɔ ngrandɛ noa wɔ ye bɔbɔ ye maen nu.’ ”

⁸Afei safohene ne tele kyɛ Asiria hene wafi Lakise. Yiti osale ye si hɔle, na onwuni kyɛ Asiria hene wafa koɛ waateta Libina.

⁹Na Asiria hene tele edwirɛ fale Yitiopia hene Tihaka nwo kyɛ, “Ɔbaafa koɛ toa wɔ.” Na ɔtele ne, otuli ɛbɔfoɛ mɔ maa bɛhɔle Hesekia berɛ besele ye kyɛ,

¹⁰“Ɛmɔhã behyire Yuda hene Hesekia kyɛ, ‘Wɔ Nyameɛ bɔ afa wɔ nwo ato ye so ne, nnɛmaa ɔlakalaka wɔ, ná ɔhyɛ wɔ bɔ kyɛ ɔngɔfa Yerusalem ngowura Asiria hene sa.

¹¹Tie! Naa ate bɔ Asiria ahemvo mɔ bafa bayɛ maen maen amukoraa ɔ? Ate kyɛ bahuhu bɛ pasaa ɔ? Aso ebie kɔpepɛ kole wɔ anaa?

¹²Maen maen mɔ bɔ me nana mɔ bɛbɔle bɛ pasaa, bɔ bɛ ole: Gosan, Haran ne Resefe ne Edenfoɛ bɔ né bɛwɔ Telasa ne, aso sɔ maen nemɔ bɛ nyameɛ mɔ bɛhora bɛpepɛ belele bɛ?

¹³Hamate hene, Apade hene, kuro Sefawim hene, Hena hene, yeɛ Yiwa hene, bɛwɔ nisua?’ ”

¹⁴Hesekia sa hane krataa ne fili ɛbɔfoɛ nemɔ berɛ, na ɔkengale. Afei ɔfo hɔle AWURADE awuro berɛ, na ɔtrɛle krataa ne anu wɔ AWURADE nyunu.

¹⁵Yeɛ Hesekia bɔle mbaeɛ hyirele AWURADE kyɛ,

¹⁶ “Ao Asafo AWURADE, Yisrael Nyameɛ bɔ ɛte kɛrubim mɔ b’afia ɔ, aseɛ so ahennie amukoraati nu, wɔ ngome yeɛ ɛte Nyameɛ ɔ. Wɔ yeɛ ɛbɔle anwuro ne aseɛ ɔ.

¹⁷AWURADE, mesrɛ wɔ, yɛ asoɛ tie me! AWURADE, mesrɛ wɔ, nea, ná tie! Tie edwirɛ amukoraa bɔ Senakeribo ɔkekã ɔ, bɔ wafa wasoma kyɛ bɛfa bɛɛgoro Nyameɛ teasefoɛ nwo ɔ.

¹⁸Ao AWURADE, ɔte amba kyɛ Asiria ahemvo mɔ basɛkye maen maen mɔ ne b’aseɛ bɔkɔɔ,

¹⁹bagyi maen maen mɔ bɛ nyameɛ mɔ bagua see nu, ofikyɛ bɛ de bɛtte nyameɛ huu, na mmom bɛte kuro sona ye sa noa adwuma bɔ wafa bakaa ne nyɔboɛ wayɔ ɔ. Na ɔnate sɔ ati yeɛ basɛkye bɛ ɔ.

²⁰Yiti afei, ao AWURADE yɛ Nyameɛ, mesrɛ wɔ, pepɛ de yɛ fi ye sa nu, amaa ɔnate so aseɛ ye aso ahennie amukoraa banwu ye kyɛ wɔ ngome twe yeɛ ɛte AWURADE ɔ.”

²¹Yeɛ Amoso awa Yesaya somane maa beesele Hesekia kyɛ, “AWURADE Yisrael Nyameɛ nwa: Mbaeɛ bɔ abɔ ahyire me afa Asiria hene Senakeribo nwo ne,

²²edwirɛ bɔ AWURADE ahã afa ye nwo ɛhe: “ ‘Sion awa brasua ababunu ne, obu wɔ animtia, yeɛ ɔgoro wɔ nwo; Yerusalem awa brasua ne, ɔsere wɔ ɔbɔ wɔ tutue odi wɔ si.

²³“ ‘Nwa yeɛ agoro ye nwo ná abɔ ye alapaa ne? Nwa yeɛ adwudwo atia ye, bɔ ama wɔ nye atra wɔ ndo nwiaa wɔ ye so e? Yisrael Krongronniɛ ne yeɛ ayɔ sɔ atia ye ɔ!

²⁴Ɛnate wɔ somvoɛ mɔ so agoro AWURADE nwo, na ahã kyɛ, Mafa me teaseɛnam pee nemɔ mafo mahɔ mmokaa nemɔ bɛ ti afia, mahɔ Lebanon ɛhɔayeɛ ne anu dɔ paa. Ye sida ndendenn paa nemɔ, ɔne ye ɛframmire nyemenenyemene nemɔ, mabubu bɛ magua. Mahɔ bokaa ne ti afia dɔ paa, ɔne ye ɛhɔayeɛ too ne anu.

²⁵Matutu abura mɔ, na mano bɛ nu nzue, Misraim asue amukoraa bɔ me gya atia nu ne, mamaa bawewe.

²⁶“ ‘Aso ande, kyɛ sɔ dwirɛ ne, ndwenene ye nwo ahyɛ ɔ? Ofi tetetete yeɛ nikyee bɔ meyɔ ye kekesaala ye ne nhyehyɛ ndole berɛ ɔ, kyɛ nguro bɔ bato bɛ nwo fasue nemɔ, odi kyɛ ɛsɛkye bɛ maa bɛkakyi kurofoen ɔ.

²⁷Ye sɔ ne ati, so ama nemɔ b’anwoserɛ te kãa, besuro, na bɛ nyunu agua ase; bakakyi kyɛ eburo ndire, bɛyɛ mmerɛ kyɛ ɛserɛ bɔ wafifi foforɛ ɔ, bayɛ kyɛ ndire bɔ wafifi wɔ sua so anwuro, bɔ ɔkese ná onnyi ɔ.

²⁸“ ‘Mese w’asetena nu dwirɛ, wɔ hɔlɛ ne wɔ walɛ, ɔne wɔ yaa piri bɔ afɛ ye me so ne.

²⁹Ɔnate wɔ yaa piri bɔ afɛ ye me so, ɔne w’anwomasoɛ bɔ mate ne ati, ngɔfa me koaa ne ngosina wɔ bonyi anu, ná matofi wɔ noa nu mafa me nyamaa mawura nu; na atee bɔ ɛfale so wale ne, ngɔmaa ɛkɔkakyi wɔ nwo ɛkɔfa so ekosa kɔhɔ.’

³⁰“Na ɛhe yeɛ ɔkɔyɛ sɛngyerɛnneɛ kɔma wɔ ɔ: Afoɛ he, ɛmɔkoli aleɛ bɔ ye bɔbɔ wafifi wɔ aseɛ ne aso ɔ. Afoɛ bɔ ɔtɔ so nyɔ ne, ɛmɔkoli aleɛ bɔ okofifi ye si ne. Na afoɛ bɔ ɔtɔ so nza ne, ɛmɔkolua nningyein, ná ɛmɔafa so aleɛ; ɛmɔkolua bobe, na ɛmɔkoli so mmaa.

³¹Na Yuda awuro ama bɔ banya bɛ ti badidi nu ne, bɛ bo kosa kotira ndii, ná basu mmaa wɔ anwuro.

³²Bɛ bɔ baha ne bie, bɛ boso kɔtrɛ kofi Yerusalem, na bɛ bɔ banya bɛ ti badidi nu ne, bɛ boso kɔtrɛ kofi Sion bokaa ne aso. Asafo AWURADE ye nungunɛhwenɛ ne yeɛ ɔkɔyɔ ɛhe ɔ.

³³“Yiti bɔ AWURADE kã fa Asiria hene nwo ɛhe: Ongowura kuro he anu, ɔngɔto agyaen wɔ nu, ɔngɔfa akokyɛm ngɔwa kuro ne nyunu, yeɛ ongotua kuro ye.

³⁴Atee bɔ ɔfale so wale ne, sɔ atee ne ala yeɛ okosa kɔfa so kɔhɔ ɔ. AWURADE nwa Asiria hene ngowura kuro ne anu.

³⁵Ofikyɛ ngɔbɔ kuro he anwo waen ngɔpepɛ ngole ye, ɔnate me bɔbɔ me ti, ɔne me somvoɛ Dawide ti.”

³⁶Na AWURADE abɔfo hɔle Asiria asikyeleɛ ne anu oohuhuni koɛhonɛfoɛ apee ɛyaa ko aburawɔtwɛ ne nnu. Na bedwɔsole ngyerɛmɔ tutututu ne, yieee, né efuin ngome yeɛ begua berɛ ɔ.

³⁷Yeɛ Asiria hene Senakeribo fili berɛ hɔle. Osa hɔle ɔɔtenane Ninewe.

³⁸Na ɔwale kyɛ, mmerɛ bɔ ɔsɔne wɔ ye nyameɛ Nisroke asɔneyɛɛ so ne, ye mma mmienzua Adramelɛke ne Saresa bɛfale ngrandɛ behuni ye, na bɛnwati bɛhɔle Ararate aseɛ so. Na ɔwa bienzua Esa Hadon lili ye bia.