Read Sehwi Yesaya 40 Bible Online

Yesaya 40 - Sehwi bible

Yesaya 40

¹Ɛmɔ Nyameɛ nwa nyoo, “Ɛ́mɔkyekye, ɛ́mɔkyekye me maen wora.

²Kã aworakyekyerɛ dwirɛ kyire Yerusalem, ná bɔ ye dawure kyire ye, kyɛ ye ngoaasolɛ mmerɛ ne wawa ayieleɛ, kyɛ mafa ye amumuyɛɛ ne mahyɛ ye; ofikyɛ ye bɔne ne, wanya ye mukoraa nwo akatuaa mmɔhoɛ nyɔ wafi AWURADE berɛ.”

³ Ebie tea nu wɔ ɛserɛ so kyɛ, “Ɛ́mɔbɔ AWURADE atee bɛ́to berɛ, ɛ́mɔpakye atimbire bɔ ɔtengyɛ ɔ wɔ aseɛ pralaa so bɛ́ma yɛ Nyameɛ.

⁴ Ɛ́mɔtuatua bɔnza biala, ɛ́mɔdwiri mmokaa ne pambaa biala maa ɔbra ase, ɛ́mɔtengyɛ atee kondonowaa ne ma ɔtengyɛ, ná ɛ́mɔtuatua mmɔnga mmɔnga nemɔ ma ɔla so.

⁵Na AWURADE animnyam ne kɔla ali, na anwoɔnaen amukoraa kɔbɔ nu konwu ye, ofikyɛ AWURADE noa dwirɛ ɛne.”

⁶ Komviɛ bie nwa, “Tea nu kã!” Na mmisale kyɛ, “Nzikyɛ yeɛ ndea nu nga ɔ?” Anwoɔnaen biala te ndire, na ye anwonyemene amukoraa te kyɛ nyerɛen bɔ ɔwɔ eburo ɔ.

⁷Ndire kese, yeɛ nyerɛen ye nyemene koso otu, ofikyɛ AWURADE nwomeɛ otu fa so. Amba, sona te ndire.

⁸Ndire kese, yeɛ nyerɛen nyemene koso otu, nakoso yɛ Nyameɛ dwirɛ de, otimu berɛ afebɔɔ.

⁹ O Sion bɔ ɛso ndɛenvɛen ɔ, fo kɔ bokaa tendenn ne aso; O Yerusalem bɔ ɛso ndɛenvɛen ɔ, tea nu kã ye serɛserɛ, tea nu kã, na nnɛsuro. Kã kyire Yuda nguro nemɔ kyɛ, “Ɛ́mɔtie, ɛmɔ Nyameɛ ne ɛhe!”

¹⁰ Nea, AWURADE Nyameɛ le tumi ɔ́ba, ye tumi asaa ne yeɛ ɔfa di hene ɔ, tie, otira ye akatuaa, yoo, ye akatuaa li ye nyunu.

¹¹Ɔkɔma ye mmoaen nemɔ aleɛ kyɛ mmoaenneafoɛ, ɔkɔfa ye sa kɔboaboa ye mmoaen mmaa nemɔ noa, ɔkɔfa bɛ kɔbɔ ye hue so, na okoli mmoaen mmrataen nemɔ anyunu ngaka ngaka.

¹²Nwa yeɛ wabɔ ye sa nonongu wasusu ɛpo nzue ɔ, anaa wafa ye sa mmɛseka wasusu ewienu ɔ, anaa wafa kwangoa wasusu aseɛ so mvuture ɔ, anaa wafa tonyi wahari mmokaa mɔ ɔ, anaa wafa asusudeɛ wahari pambaa mɔ ɔ?

¹³ Aso ebie ahyire bɔ odi kyɛ AWURADE Sunzum yɔ ɔ, anaa nwa yeɛ ɔte ye foɛtulɛniɛ bɔ otu ye foɛ ɔ?

¹⁴Nwa yeɛ Nyameɛ ne ye baatu agyina wapena adwene ɔ, nwa yeɛ ohyirele ye pɛpɛɛpɛyɛlɛ atee ne ɔ? Nwa yeɛ ohyirele ye nimdeɛ ɔ, nwa yeɛ ohyirele ye ndeaseɛ atee ne ɔ?

¹⁵Tie, maen maen mɔ bɛte kyɛ nzue bɔ wape bokiti nu ko ɔ, bɛte kyɛ mvuture kaaba bie bɔ ɔla tonyi so ɔ. Tie, otira supɔ mɔ wɔ ye sa nu kyɛ mvuture kaaba bie.

¹⁶Lebanon mmakaa ngɔso afɔleɛ see sɔ, yeɛ nu ngaka koso ngɔso naen yeralɛ afɔleɛ bɔ.

¹⁷AWURADE nyunu de, maen maen mukoraa bɛtte huu, obu bɛ kyɛ nikyee mbaen bie bɔ bɛtte hwee ɔ.

¹⁸ Nwa nwo yeɛ ɛmɔkɔfa Nyameɛ bɛkɔto ɔ, anaakyɛ nzikyɛ sue yeɛ ɛmɔkɔfa bɛkɔtoto ye nwo ɔ?

¹⁹Amoen de, adwiililɛniɛ yeɛ ɔyɔ ɔ, yeɛ sikaa kɔkorɛ dwumvoɛ fa sikaa kɔkorɛ boro ye nwo ɔ, na ɔfa ɛdwetɛ ndweaban ɔyɛ ye nwo nyemenenyemene.

²⁰Ehianiɛ de, ɔfa bakaa serɛserɛ bɔ ɔmborɔ ɔ yeɛ ogyina amoen ne ɔ; na ɔpena sona bɔ ɔse adwii di paa ɔ maa ogyina amoen bɔ ɔngekã ye nwo ɔ.

²¹Aso ɛmɔnze? Aso ɛmɔttele? Aso banga bangyire ɛmɔ fi tetetete? Aso ɛmɔttele ye bo ofi mmerɛ bɔ Ɛdangama bɔle aleɛ?

²²Aseɛ noa dɔ kango ne, ye yeɛ ɔte so ɔ, bɔ aseɛ so ama bɛte kyɛ torɔka ɔ. Ye yeɛ ɔtrɛtrɛ anwuro nu kyɛ mbɛmuɛ tena ɔ, na ɔbayebaye nu kyɛ ɛtena sua bɔ bɛtena nu ɔ.

²³Ye yeɛ ɔbrɛ atitirefoɛ ase maa bɛyɛ mmenia mbaen ɔ, na ɔma aseɛ so maenbulɛfoɛ bɛkakyi kwahweabaa mɔ.

²⁴Betu bɛ bɛtɛ ala a, bedua bɛ ala a, bɛ bakaa tira ndii wɔ aseɛnwo ala a, ohu mvrama gua bɛ so maa bɛkese, na mvrama piri pia bɛ kɔ kyɛ afafu.

²⁵Nwa nwo yeɛ ɛmɔkɔfa me bɛkɔtoto ɔ, anaa, nwa yeɛ ɔne me bɛsɛ ɔ? Krongronniɛ ne, ye noa dwirɛ ɛne.

²⁶Ɛ́mɔto ɛmɔ nye anwuro bɛ́nea, nwa yeɛ ɔbɔle sɔ nningyein nemɔ ɔ? Ye bɔ ɔye b’ɛlɔen ne fite ɔka bɛ ɔ, bɔ ɔfa bɛ mukoraa bɛ dumaa frɛ bɛ ɔ; na ɔnate ye anwoserɛ piri ne ye tumi totohyia ne ati, bɛ nu biala mmini.

²⁷O Yakob, nzu ati yeɛ ɛnwa, O Yisrael, nzu ati yeɛ ɛkã kyɛ, “Atee bɔ nnate so ne, ɔmva AWURADE nwo, yeɛ me Nyameɛ abu ye nye wagua so bɔ onni me dwirɛ mma me ɔ”?

²⁸Aso ɛnze? Aso ɛttele? AWURADE te Ɛdangama Nyameɛ, bɔ ɔbɔle aseɛ fi ye ti kɔkã ye ti ɔ. Ɔmvɛ, yeɛ ye nwo nyɛ ye bɛtɛɛ, na ye nworɛ bo sona ndeaseɛ so.

²⁹Ye yeɛ ɔma bɔ wafɛ anwoserɛ ɔ, na bɔ ye nwo ayɛ ye bɛtɛɛ ne koso, ɔma ye anwoserɛ pee.

³⁰Mmabunu po bɛfɛ, na bɛ nwo yɛ bɛ bɛtɛɛ, yeɛ mmerandeɛ wora befi ase buramm,

³¹nakoso bɛ bɔ bɛnwondɛ AWURADE ne de, bekonya anwoserɛ foforɛ; bɛkɔfa ndaa bekotu kyɛ kɔleɛ, bekotu amirika, na bɛngɔfɛ, bɛkɔnate, na bɛ nwo ngɔyɛ bɛ bɛtɛɛ.