Read Sehwi Yesaya 41 Bible Online

Yesaya 41 - Sehwi bible

Yesaya 41

¹Supɔ mɔ, ɛ́mɔyɛ dinn bétie me! Odi kyɛ maen maen mɔ bɛkanyane b’anwoserɛ, odi kyɛ bepingye wa bɛbɔ bɛ nguro, odi kyɛ yɛyia nu yɛdi dwirɛ ne.

²Sona bɔ tenenee li ye si wɔ nekaa biala bɔ otia ne, nwa yeɛ wakanyane ye wafi eyia afiteleɛ ɔ? Nwa yeɛ wafa maen maen mɔ wawura ye sa, ɔne ahemvo mɔ wawura ye bo ɔ? Ye ngrandɛ maa bɛkakyi kyɛ mvuture, na ye agyaen to bɛ pete kyɛ afafu.

³Ɔfoa bɛ ɔpɛ nu kɔ bɔ ye nwo sonn ɔ, wɔ atee bɔ ye gya baa ottiale so le ɔ so.

⁴Nwa yeɛ ɔyɔle sɔ ɔ, ná wamaa ɛhe awa nu ɔ, bɔ ɔfrɛ aworɛ ndoatoasoɛ fi tetetete ɔ? Me ɔ. Me AWURADE bɔ nde ahyɛaseɛ, bɔ nza nde ayieleɛ ne, me ɔ.

⁵Supɔ mɔ banwu bɔ mayɔ ɔ, na besuro, aseɛ noa dɔ paa nwo wosowoso ye, bapingye wa, bawa.

⁶Ebiala boka obiɛngo, na ose oliɛma kyɛ, “Ma w’ahone yɛ se!”

⁷Dwumvoɛ hyɛ sikaa kɔkorɛ dwumvoɛ nguraen, yeɛ bɔ ɔfa bɔsobaka tengyɛtengyɛ buralɛ ne koso, ɔhyɛ sona bɔ ɔbobɔ buralɛ so ne nguraen, na ɔkã kyɛ, “Mmuralɛ sosɔlɛ ne, ye mmerɛ ne adwu”, na bɛfa mberɛgoo bemiamia nu bɔ ondutu ɔ.

⁸ Nakoso wɔ, me somvoɛ Yisrael, Yakob bɔ maneanea nu maye wɔ ɔ, me damvo Abraham bosoniɛ;

⁹wɔ bɔ maye wɔ mafi aseɛ noa dɔ paa, bɔ mafrɛ wɔ mafi ye wɛen so dɔ dedeede mawa ɔ, wɔ bɔ nzele wɔ kyɛ, “Ɛte me somvoɛ, maneanea nu maye wɔ, na mengɔye me sa mengofi wɔ bo.”

¹⁰ Nnɛsuro, ofikyɛ ngyi wɔ si, nnɛma ɛserɛ kã wɔ, ofikyɛ me ole wɔ Nyameɛ. Ngɔmaa ekogyina pindinn, ngɔboka wɔ, ngɔfa me tenenee asaa famaa ne ngotira wɔ nu.

¹¹Tie, bɛ bɔ bafɛ wɔ so yaa ne amukoraa, bɛ nyunu kogua ase, na bɛkɔfɛre; na bɛ bɔ bɛko betia wɔ ne, b’ayieleɛ koyie bɛ, na bekowuwu.

¹²Ɛkɔpena bɛ bɔ bɛmbena wɔ yé ne, nakoso engonwu bɛ, na bɛ bɔ bɛfa koɛ bɛtoa wɔ ne, b’ayieleɛ koyie bɛ pasaa.

¹³Ofikyɛ me, AWURADE wɔ Nyameɛ, ndira wɔ sa famaa, na me yeɛ mekã mekyire wɔ kyɛ, ‘Nnɛsuro, na ngɔboka wɔ.’

¹⁴Nnɛsuro, wɔ, esuronyi (pɛkyɛpɛkyɛ) Yakob, ɔne ɛmɔ, Yisraelfoɛ! Ofikyɛ me yeɛ ngɔboka wɔ ɔ. AWURADE noa dwirɛ ɛne; na wɔ Defoɛ ne ole Yisrael Krongronniɛ ne.

¹⁵Tie, ngɔfa wɔ ngɔyɛ ngaen bɔ bɛboro so aburoo, bɔ ɔte monɛ, ɔyɛ nna, bɔ ye gye tuatua nu ɔ. Ɛkɔfa kodwiri mmokaa ekoti bɛ nyokonyoko, na ɛkɔyɛ pambaa mɔ kyɛ afafu.

¹⁶Ekohuhu bɛ so, mvrama kɔbɔ bɛ kɔhɔ, na mvrama bɔ ɔpɛ ye nwo ɔ kɔto bɛ kɔsande. Na afei ekoli ahurusi wɔ AWURADE nu, na ɛkɔhoahoa wɔ nwo wɔ Yisrael Krongronniɛ ne anu.

¹⁷Sɛ ehiafoɛ ne bɛ bɔ bɛyɛ anwumvo ɔ bɛpena nzue, ná ebie nne berɛ, bɔ nzuhɔen ama bɛ komvi awo ne, me AWURADE, ngotie bɛ sufrɛ, me, Yisrael Nyameɛ, mengɔpo bɛ.

¹⁸Ngɔma asue mɔ kɔtengyɛ wɔ pambaa pralaa mɔ aso, ná mama asue mmaa mmaa atengyɛ wɔ bɔnza nemɔ anu. Ngɔma ɛkwaa kɔwa ɛserɛ so, ná mama mbombonzue apu afi aseɛ wosee so.

¹⁹Ngolua sida, bɔsema, sesea ne olive mmakaa wɔ ɛserɛ so, ngɔma ɛframmire, pataboɛ ne dɔma kɔbɔ nu kogyina aseɛ wosee so,

²⁰amaa ɔnate so mmenia anwu ye bate ye bo, ná badwene ye nwo banya ye nwo ndeaseɛ, kyɛ AWURADE tumi yeɛ wayɔ ɛhe ɔ, kyɛ Yisrael Krongronniɛ ne yeɛ ɔbɔle ye ɔ.

²¹AWURADE nwa nyoo: Ɛ́mɔbɔ bɛ nguro, Yakob Hene nwa nyoo: ɛ́mɔhyire edwirɛ ne anu.

²²Ɛ́mɔfa ɛmɔ amoen nemɔ bɛbra ma behyire yɛ bɔ ɔbaasi ɔ. Ɛ́mɔma bɛhã bɔ daa bie osisili ne nwo dwirɛ behyire yɛ, amaa ɔnate so yadwenedwene bɛ nwo yanwu b’ayieleɛ; anaa ɛ́mɔhã bɔ ɔbaasi ne behyire yɛ.

²³Bɔ kyẽa bie okosi ne, ɛmɔhã behyire yɛ maa yɛnwu kyɛ ɛmɔte nyameɛ mɔ; ɛ́mɔyɔ paa anaa bɔne, amaa ɔnate so yɛ kunu atete yɛ ná yasuro.

²⁴Ɛ́mɔtie! Ɛmɔtte huu, yeɛ bɔ ɛmɔyɔ ne ɔte mbaen, na sona bɔ ɔkɔneanea nu kɔye ɛmɔ ne, ɔte akyiwadeɛ.

²⁵Makanyane ebie mafi sorɔ dɔ maa wawa, okofi eyia afiteleɛ dɔ ɔkɔye me dumaa ayɛ. Okoti ahemvo mɔ kyɛ oti nnɛterɛ ɔ, kyɛbɔ ngukuenwonɛniɛ dɔne ɛfaa ɔ.

²⁶Nwa yeɛ ɔhã tole berɛ fili tetetete, kyɛbɔ yɛkonwu ye ɔ, anaa wahã wato berɛ dadadada, kyɛbɔ yɛkɔhã kyɛ, “Ɔte nahorɛniɛ” ɔ? Amba, ebiala nne berɛ bɔ ɔhane ɔ, amba, ebiala nne berɛ bɔ ɔbɔle ye dawure ɔ, amba, ebiala nne berɛ bɔ ɔtele ɛmɔ noa dwirɛ ɔ.

²⁷Me yeɛ nnili moa nga ngyirele Sion kyɛ, Tie, bɛ ɛhe, ngɔsoma sona bɔ ɔso ndɛenvɛen ɔ maa ɔkɔhɔ Yerusalem.

²⁸Nakoso ndotole me nye ne, nne sona biala nne berɛ, bɛ nu biala nne berɛ bɔ ɔte foɛtulɛniɛ ɔ, bɔ mebisa a, ɔkɔma me mmuayɛɛ ɔ.

²⁹Tie, bɛ mukoraa bɛte mbaen, bɔ bɛyɔ ne, ɔtte huu, b’amoen mɔ bɔ bahuro nikyee bafa bayɔ ne, bɛte mvrama ne nikyee mbaen.