Read Sehwi Yesaya 43 Bible Online

Yesaya 43 - Sehwi bible

Yesaya 43

¹Na afei, O Yakob, AWURADE bɔ ɔbɔle wɔ, O Yisrael, ye bɔ ɔnwone wɔ ne, ɔnwa nyoo: “Nnɛsuro, ofikyɛ maapɔ wɔ male wɔ, mabɔ wɔ dumaa mafrɛ wɔ, ɛte me deɛ.

²Sɛ ɛnate nzue nu a, me ne wɔ yeɛ yɛwɔ berɛ ɔ, sɛ ɛpɛ asue mɔ a, bɛngɔfa wɔ ngɔhɔ; sɛ ɛnate see nu a, ɔngɔyera wɔ, na ye gyelɛ wuronyiwuronyi ne, ɔngɔyera wɔ.

³Ofikyɛ me ole AWURADE wɔ Nyameɛ, Yisrael Krongronniɛ ne, wɔ Defoɛ ne, Mafa Misraim mayɛ wɔ ti nyɔboɛ mapɔ wɔ, Mafa Yitiopia ne Seba masesã wɔ.

⁴Na ɔnate kyɛ wɔ nwo le mvasoɛ wɔ me nyunu, mapagya wɔ dibea, ná mekuro wɔ dwirɛ ne ati, mafa mmenia masesã wɔ, na mafa maen maen mɔ masi wɔ gya nu male wɔ ngoa.

⁵ Nnɛsuro, ofikyɛ me ne wɔ yeɛ yɛwɔ berɛ ɔ; ngɔfa wɔ bosofoɛ ngofi eyia afiteleɛ ngɔwa, yeɛ ngɔboaboa wɔ noa ngofi eyia atɔleɛ.

⁶Ngɔhã ngohyire sorɔ dɔ kyɛ, ‘Ma bɛ ate!’ Yeɛ ngɔhã ngohyire ngwaen dɔ kyɛ, ‘Nnɛsi bɛ ate!’ Fa me mma mmienzua mɔ fi dededede bra, ná fa me mma mmrasua mɔ fi aseɛ noa dɔ paa bra;

⁷ebiala bɔ bɛfa me dumaa bɛfrɛ ye ɔ, bɔ mmɔle ye kyɛ ɔhyɛ me animnyam ɔ, bɔ nwone ye, ná nyɔle ye ɔ.”

⁸Maen bɔ bɛ nye asi, nakoso bele anyeɛ ne, bɔ bɛ so ati, nakoso bele asoɛ ne, fa bɛ bra!

⁹Ma maen maen amukoraati bɛboa bɛ noa neka horɛ, ná ma mmenia amukoraa beeyia nu. Bɛ nu nwa yeɛ ɔkɔhora kɔhã sɔ dwirɛ ne ɔ, ná okosa kohyire yɛ daa dwirɛ bɔ wasisi ne ɔ? Maa bɛfa b’adanzefoɛ bɛbra ma bɛhã bɛto bɛ deɛ ne aso, yeɛ maa bɛte, ná bɛhã kyɛ, ‘Ɔte nahorɛ.’

¹⁰AWURADE nwa nyoo, “Ɛmɔte m’adanzefoɛ, ɔne me somvoɛ bɔ maneanea nu maye ye ɔ, amaa ɔnate so ɛmɔanwu me ná ɛmɔale me bali, ná ɛmɔate ye bo kyɛ me ole Ye. Banyɔ nyameɛ biala bɔ olili me nyunu wale ɔ, yeɛ ebiala ngofi me si ngɔwa.

¹¹Me, me ole AWURADE, na defoɛ biala nne berɛ ko bɔ ɔboka me so ɔ.

¹²Me yeɛ ngane bɔ ɔbaasi ɔ, me yeɛ male ngoa ná mamaa bate ɔ, wɔ mmerɛ bɔ né nyameɛ foforɛ biala ɔnne ɛmɔ nu ɔ, na ɛmɔte m’adanzefoɛ,” AWURADE noa dwirɛ ɛne.

¹³“Me ole Nyameɛ. Ofi tetetete, Me ole Ye, ebiala ngɔhora ngofoti nikyee ngofi me sa nu, sɛ meyɔ nikyee a, nwa yeɛ ɔkɔhora kɔsesã ye ɔ?”

¹⁴AWURADE, ɛmɔ Defoɛ, Yisrael Krongronniɛ ne, ɔnwa nyoo: “Ɔnate ɛmɔ ti, masoma maa bahɔ Babilɔn, kyɛ beebubu mmuralɛ bɔ ɔbrambram pambim nemɔ asi ne anu, na Kaldeafoɛ anigye esebɔlɛ ne, ɔkɔkakyi awuyebɔlɛ.

¹⁵Me ole AWURADE, ɛmɔ Krongronniɛ ne, ɛmɔ Hene ne, bɔ ɔbɔle Yisrael ne.”

¹⁶AWURADE bɔ ɔpakye atee to ɛpo nu, bɔ ɔpɛ esaa to asue mbiri mɔ anu,

¹⁷bɔ ɔmane teaseɛnam mɔ ne mbɔngɔ, ɛlɔen ne koɛhonɛfoɛ fite wale ne, ye noa dwirɛ ɛne. Bɛtete beguale, na bangora dwɔso ko, onuane bɛ boso, na bɛ boso minini kyɛ kanea nyamaa.

¹⁸Nnɛma ɛmɔkaye edwirɛ bɔ wasisi daa ne, yeɛ nnɛma ɛmɔdwenedwene daa tete dwirɛ nemɔ anwo.

¹⁹Ɛ́mɔnea, mebaayɔ nikyee foforɛ bie, kyɛ ɔ́ba ɔ, aso ɛmɔnnwu ye? Ngɔpakye atee ngɔto ɛserɛ so, ná mama asue mɔ balela aseɛ pralaa so.

²⁰Eburo ngaka kɔhyɛ me animnyam, ɛserɛ so ngyea ne soholi koso bɛkɔyɔ sɔ ala, ofikyɛ mema nzue ba ɛserɛ so, yeɛ mema asue mɔ bɛba aseɛ pralaa so, kyɛ mefa mema me maen bɔ maneanea nu maye ye ne maa ɔno,

²¹maen he, mabɔ ye mama me nwo, kyɛ bɛ́bɔ me nwo ayɛyelɛ dawure.

²²“Nakoso, O Yakob, anzɔne me, na mmom, me nwo afono wɔ, O Yisrael!

²³Amva wɔ mmoaen amma ammɔ naen yeralɛ afɔleɛ amma me, yeɛ amva w’afɔleɛ mɔ anhyɛ me animnyam. Mamva afɔleɛ mɔ manyɛ wɔ so adesoa, yeɛ mammisa wɔ ɛyɛɛ mamva manha w’adwene.

²⁴Amva sikaa andɔ ayirefona amma me, yeɛ w’afɔleɛ ɛloe nemɔ, amva amma me amma me ko anyi. Na mmom, ama wɔ bɔne ne ayɛ me so adesoa, yeɛ afa w’amumuyɛɛ ne agyegye me.

²⁵“Me, me ole bɔ ɔnate me bɔbɔ me ti mekyikyi wɔ mmeraatolɛ ɔ, na mengɔkaye wɔ bɔne.

²⁶Kaye me, maa yɛsu aporowaa; bɔ wɔ kuro ma bebua wɔ be.

²⁷Wɔ nana bɔ oli moa ne, ɔyɔle bɔne, yeɛ wɔ kamafoɛ nemɔ koso, bɛyɔle mvomsoɛ betiale me.

²⁸Yiti, magua nekaa krongron berɛ mbanyi nemɔ nyunu ase, maye Yakob mama kyɛ musue ɔto ye, yeɛ maye Yisrael mama kyɛ bɛgoro ye nwo.