Read Sehwi Yesaya 44 Bible Online

Yesaya 44 - Sehwi bible

Yesaya 44

¹“Afei tie, O me somvoɛ Yakob, Yisrael bɔ maneanea nu maye ye ɔ!

²AWURADE bɔ ɔbɔle wɔ, bɔ ɔnwone wɔ wɔ eni akunu, bɔ ɔboka wɔ ne, ɔnwa nyoo: Nnɛsuro, O, me somvoɛ Yakob, wɔ, Yesurun bɔ maneanea nu maye wɔ ɔ.

³Ofikyɛ ngohwie nzue ngogua aseɛ bɔ nzuhɔen ku ye ne aso, yeɛ ngɔma asue mmaa mmaa kɔwa aseɛ wosee ne aso; ngohwie me Sunzum ngogua wɔ boso ama so, ná mahwie me saleɛ magua wɔ mma so.

⁴Bekofifi kyɛ asue nwo ɛserɛ, kyɛ asue noa gyaka.

⁵Sona ko kɔhã kyɛ, ‘Nde AWURADE deɛ,’ né ko wora wafa Yakob dumaa wato ye nwo; yeɛ ko koso kɔhyerɛ ye sa nwo kyɛ, ‘AWURADE deɛ ɔ,’ na ɔkɔfa Yisrael dumaa kɔsɔ ye dumaa so.”

⁶ AWURADE, Yisrael Hene, bɔ ɔte ye Defoɛ ne, Asafo AWURADE ye noa dwirɛ ɛhe: “Me ole Ahyɛaseɛ, yeɛ me ole Ayieleɛ; nyameɛ biala nne berɛ bɔ ɔboka me so ɔ.

⁷Nwa yeɛ ɔte kyɛ me ɔ? Maa ɔhã e! Maa ɔfa to dwaa, ná ɔfa to me nyunu. Nwa yeɛ ofi tetetete wahyire maen bɔ ngyekyele ye afebɔɔ ne, ɔne kyẽa bie nningyein bɔ bekosi ɔ? Maa ohyire yɛ bɔ ɔbaasisi ɔ.

⁸Nnɛma ɛmɔsuro, yeɛ nnɛma ɛmɔ kunu tete ɛmɔ! Aso manga mangyire ɛmɔ mammɔ ye nwo dawure fi tetetete? Na ɛmɔte m’adanzefoɛ. Aso nyameɛ bie wɔ berɛ boka me so hɔ ɔ? Nyɔbotaen biala nne berɛ; ebie nne berɛ bɔ mese ɔ.”

⁹Bɛ bɔ bɛyɔ amoen ne, bɛ mukoraa bɛte mmenia mbaen, yeɛ sɔ nningyein ne bɔ bɛ nye gye ye nwo ne, mvasoɛ nne so. B’adanzefoɛ nemɔ, bennwu nikye, yeɛ bɛnze, yiti bɛ nyunu kogua ase.

¹⁰Nwa yeɛ wayɔ bosoen anaa wayɔ amoen bɔ mvasoɛ biala nne so ɔ?

¹¹Tie! Bɛ bɔ bɛsɔne ye ne amukoraa bɛ nyunu kogua ase, ofikyɛ bɛ bɔ belili adwii bɛyɔle ne, bɛte mmenia. Ma bɛ mukoraa beyia, maa beegyina berɛ, ɛserɛ kɔtɔ bɛ so, na bɛ nyunu kogua ase kɔbɔ nu.

¹²Buralɛ dwumvoɛ fa buralɛ wura see nu, ɔfa bɔsobaka boro, na ɔfa ye sa bɔ nu ɔyɛ se ne siesie ye. Ɛhɔen ku ye ma ye anwoserɛ yie, ɔnno nzue, na ɔyɛ bɛtɛɛ.

¹³Bakaa dwumvoɛ fa nyamaa susu bakaa kundunzii, ɔfa pɛnzere sesãsesã bakaa ne anwo, ɔfa buralɛ odi adwii ose bakaa ne, ɔfa asusudeɛ susu, na ose maa osoma sona, maa ɔyɛ nyemene kyɛ sona, kyɛ ogyina ye wɔ awuro.

¹⁴Obu sida bakaa to, anaakyɛ ɔneanea nu pena ɛmee anaa eluii, na ɔyakyi ye maa ɔne ɛhɔayeɛ nu mmakaa begyina berɛ benyi; anaakyɛ odua sida, na esue tɔ gua so maa onyi.

¹⁵Sɔ bakaa ne kakyi eyein ma sona fa sɔ see, ɔfa ebie kua see ɔto, ɔfa sɔ see ɔto paanoo, ɔfa ebie koso ɔyɛ bosoen ɔsɔne ye; na ɔfa bakaa ne ose amoen ɔkoto ye.

¹⁶Ɔfa bakaa ne bue ɔsɔ see; ɔto naen wɔ ye bue sɔ ne aso, ɔtoto naen koso wɔ so, na odi ma ye ko yi. Osa to see ne, na ɔkã kyɛ, “Hmmm! Me nwo ɛyerɛ atu, see ne bɔ me nnedɛɛnnedɛɛ!”

¹⁷Na bakaa ne bɔ ɔkɔha ne, ɔfa ose nyameɛ bɔ ɔte ye amoen ɔ. Ɔkoto ye sɔne ye, ɔbɔ mbaeɛ kyire ye, na ɔkã kyɛ, “Pepɛ de me, ofikyɛ ɛte me nyameɛ!”

¹⁸Mmenia sɔ ne, nimdeɛ abɔ bɛ, yeɛ b’adwene te nganga; ofikyɛ wama bɛ nye ne wamata, bɔ bennwu nikye ɔ; yeɛ wato b’adwene nu, bɔ bɛngora bennya ndeaseɛ ɔ.

¹⁹Na bɛ nu biala mva ngɔ adwenedwene nu, yeɛ olle nimdeɛ, anaa adwene biala bɔ ɔkɔmaa okobisa kyɛ, “Bakaa ne bue ne, nyerale ye see nu, nzusole see ne ndone paanoo, matoto naen wɔ so mali, aso odi kyɛ mefa ye ngaa ne meyɛ akyiwadeɛ nikyee anaa? Aso odi kyɛ mekoto bakaa kundunzii anaa?”

²⁰Nzoen yeɛ odi ɔ; ye adwene bɔ ɔte kãa ne amaa wamini, ɔngora mbepɛ nnne ye kra, yeɛ ɔngora mmisa ye nwo kyɛ, “Bɔ me sa famaa tira nu ye, aso nna nnakannaka nikyee ɔ?”

²¹O Yakob ne Yisrael, kaye sɔ dwirɛ hemɔ, ofikyɛ ɛte me somvoɛ; me yeɛ nwone wɔ ɔ, ɛte me somvoɛ. O Yisrael, me wora ngofi wɔ.

²²Makyikyi wɔ mmeraatolɛ ne mafi berɛ kyɛ munungum kabii, ɔne wɔ bɔne mafi berɛ kyɛ munungum. Sa bra me berɛ, ofikyɛ maapɔ wɔ male wɔ.

²³ O anwuro anwuro, ɛ́mɔto anigye dwein, ofikyɛ AWURADE yeɛ wayɔ sɔ ɔ; O aseɛ bo dɔ, ɛ́mɔbɔ ese; O mmokaa mɔ, ɛ́mɔto anigye dwein serɛserɛ; O ɛhɔayeɛ mɔ ne nu mmakaa koso, ɛ́mɔyɔ sɔ! Ofikyɛ AWURADE apɔ Yakob wale ye, na wama ye animnyam wala ali wɔ Yisrael.

²⁴AWURADE bɔ ɔte wɔ Defoɛ, bɔ ɔnwone wɔ wɔ eni akunu ne, ɔnwa nyoo: “Me, AWURADE, me yeɛ nyɔle nningyein amukoraa ɔ, me ngome yeɛ ndrɛtrɛle ewienu nu ɔ, me yeɛ me ngome mmayebayele aseɛ nu ndole berɛ ɔ.

²⁵ Kyẽa bie dwirɛ nwo musue bɔ ahɔmeɛ bɛye ne, me yeɛ memaa ɔyɛ mbaen ɔ, mema ngonyaayelɛfoɛ bɛyɛ ngwaseaa, mema nworɛfoɛ bɛ nworɛ ka nziɛ, na mekakyi bɛ nimdeɛ ngwaseasɛm.

²⁶Me yeɛ mema me somvoɛ ye noa dwirɛ osi pi, ná mema me bɔfoɛ mɔ bɛ ngɔmhyɛlɛ ɔba nu ɔ. Me yeɛ mekã mekyire Yerusalem kyɛ, ‘Mmenia kɔtena wɔ nu,’ yeɛ mekã mekyire Yuda nguro kyɛ, ‘Bɛkɔkyekye wɔ bieku, na ngosa ngɔkyekye wɔ kurofoen nemɔ bieku.’

²⁷Me yeɛ mekã mekyire buma kyɛ, ‘Wewe, ngɔma w’asue mɔ kɔwewe’.

²⁸ Me yeɛ mekã mefa Karose nwo kyɛ, ‘Ɔte me mmoaenneafoɛ, na ɔkɔma me botaeɛ amukoraati kɔwa nu’; yeɛ mekã mekyire Yerusalem kyɛ, ‘Bɛkɔkyekye wɔ bieku,’ yeɛ mekã mekyire asɔneyɛɛ sua ne kyɛ, ‘Bekosa bɛkɔto wɔ fapem ne.’ ”