Read Sehwi Yesaya 45 Bible Online

Yesaya 45 - Sehwi bible

Yesaya 45

¹Ɛhe yeɛ AWURADE hã hyirele Karose bɔ wapopa ye ngoo ne ɔ, ye bɔ masɔ ye sa famaa nu kyɛ ngoli maen maen mɔ so ngonim wɔ ye nyunu, kyɛ ngɔsangyesangye ahemvo mɔ b’abrako nu, kyɛ ngobukyebukye anoa mɔ wɔ ye nyunu, bɔ bɛngɔtoto pambim mɔ nu ɔ:

²“Ngoli wɔ nyunu, ná madwa mmokaa mɔ maa bahã ase; ngobubu kɔɔbere anoa nemɔ anu, ná mapepɛ mmuralɛ bɔ bɛbrambram pambim mɔ si ne anu.

³Ngɔfa anwonyadeɛ bɔ ɔwɔ awosii nu, ɔne agyapadeɛ bɔ ɔwɔ mvealeɛ nu ɔ ngɔma wɔ, amaa ɔnate so anwu kyɛ me, AWURADE Yisrael Nyameɛ, me yeɛ mmɔle wɔ dumaa mvrɛle wɔ ɔ.

⁴Me somvoɛ Yakob ne Yisrael bɔ maneanea nu maye ye ne ati yeɛ mabɔ wɔ dumaa mafrɛ wɔ ɔ; na mabɔ wɔ abodin, ɔwɔ nu kyɛ ɛnze me de.

⁵Me ole AWURADE, Nyameɛ biala nne berɛ ko, Nyameɛ biala nne berɛ kyɛ me ala, mamo wɔ abrako, ɔwɔ nu kyɛ ɛnze me de;

⁶na ɔnate so mmenia konwu ye kofi eyia afiteleɛ ne eyia atɔleɛ, kyɛ ebiala nne berɛ, sana me ngome. Me ole AWURADE, na ebiala nne berɛ ko.

⁷Me yeɛ mebɔ kanea, ná mesa mebɔ awosii ɔ, me yeɛ mefa asomdwee meba, ná mesa mema amaneɛ ba ɔ. Me, AWURADE, me yeɛ meyɔ ɛhemɔ amukoraa ɔ.

⁸“O anwuro, tɔ gua ase, ma munungum ɔtɔ tenenee gua ase, ma aseɛ nu odwa, ná ngoalelɛ fi nu bra, ma tenenee fifi bra; me AWURADE, me yeɛ mmɔle ye ɔ.

⁹ “Sona bɔ ɔne Nyameɛ bɔ ɔbɔle ye ɔ bɛpere so ne, ye yaakɔ! Bua bɔ ɔne sona bɔ ɔnwone ye ɔ bɛpere so ne, ye yaakɔ! Aso ɛfaa obisa sona bɔ ɔfa ye nwo nikyee ne kyɛ, ‘Nzikyɛ yeɛ ɛyɔ e’? Anaakyɛ: ‘Bɔ anwo ne, olle asaa?’

¹⁰Sona bɔ okobisa ɔse kyɛ, ‘Nzikyɛ yeɛ ɛbaawo ye e?’ ne, ye yaakɔ! Anaa bɔ okose brasua kyɛ, ‘Nzikyɛ yeɛ awo ye e?’ ne, ye yaakɔ!

¹¹AWURADE, Yisrael Krongronniɛ ne, bɔ ɔbɔle Yisrael ne, ɔnwa nyoo: “Bɔ ngɔyɔ ngɔfa me mma nwo ne, aso odi kyɛ ɛmɔbisa me hɔ ɔ? Anaa, odi kyɛ ɛmɔhyɛ me wɔ me sa noa adwuma nwo?

¹²Me yeɛ mmɔle aseɛ ɔ, yeɛ mmɔle sona ndole so ɔ; me bɔbɔ me sa yeɛ ɔtrɛtrɛle ewienu nu ɔ, na mvale ahyɛdeɛ mane b’asafo amukoraa.

¹³Me yeɛ makanyane ye[12] wɔ tenenee nu ɔ, na ngɔtengyɛtengyɛ ye atee amukoraa, ye yeɛ ɔkɔkyekye me kuro ne ɔ, na ye yeɛ ɔkɔyakyi me mmenia bɔ bahye bɛ nnure ne ate maa bekosa bɛkɔhɔ, bɔ ongole bɛ ti nyɔboɛ anaa akyɛdeɛ biala ɔ,” Asafo AWURADE noa dwirɛ ɛne.

¹⁴ AWURADE nwa nyoo: “Misraim anwonya ne Yitiopia dwaa nningyein, Sabeafoɛ, mmienzua ndendenn, bɛkɔwa wɔ berɛ bɛkɔɔyɛ wɔ deɛ, bekoli wɔ si, bɛkɔwa wɔ berɛ bɔ ngɔnzɔngɔnzɔ gua bɛ ɔ. Bɛkɔkoto wɔ, ná basrɛ wɔ bahã kyɛ, ‘Amba, Nyameɛ gyi wɔ si, ebiala nne berɛ ko, nyameɛ biala nne berɛ bɔ ɔboka ye so ɔ.’ ”

¹⁵O Yisrael Nyameɛ, Defoɛ ne, amba, wɔ ole Nyameɛ bɔ ɛfa wɔ nwo fea ɔ.

¹⁶Bɛ mukoraa bɛkɔfɛre, na bɛ nyunu kogua ase, Bɛ bɔ bɛyɔ amoen ne, animguaseɛ kɔto bɛ kɔbɔ nu.

¹⁷ Nakoso Yisrael de, AWURADE fa ngoalelɛ afebɔɔ ode ye. Ɛfɛrelɛ ngɔhã ɛmɔ, yeɛ ɛmɔ nyunu ngogua ase le afebɔɔ.

¹⁸Ofikyɛ AWURADE bɔ ɔbɔle anwuro, Nyameɛ bɔ ɔhyehyɛle aseɛ ná ɔyɔle ne, ye bɔ ɔbɔle aseɛ tole berɛ ne, ye bɔ wammɔ ye sesakaa wando berɛ, na mmom ɔbɔle ye kyɛ bɛtena so ne, ɔnwa nyoo: “Me ole AWURADE bɔ ebiala nne berɛ bɔ ɔboka me so ɔ.

¹⁹Nna mvealeɛ nu yeɛ ndwudwole ɔ, nna aseɛ so nekaa bie bɔ ɔte awosii ɔ; manga mangyire Yakob boso ama kyɛ, ‘Odi kyɛ ɛmɔpena me si atee wɔ basabasayɔlɛ nu.’ Me ole AWURADE bɔ medwudwo nahorɛ nu ɔ, edwirɛ bɔ ɔtengyɛ yeɛ mekã ɔ.

²⁰“Amaen maen mɔ nu ama bɔ ɛmɔanya ɛmɔ ti badidi nu ɔ, ɛ́mɔboaboa ɛmɔ noa bɛ́bra, ɛ́mɔbɔ nu bépingye wa! Bɛ mmakaa amoen nemɔ, mmenia bɔ bɛsoa bɛnate, bɔ bɛtɛbɔ mbaeɛ bekyire mmosoen bɔ bɛngora ngoa de ne, nimdeɛ biala nne bɛ ti anu.

²¹ Ɛ́mɔdwudwo, ɛ́mɔbɔ ɛmɔ nguro; maa bɛbɔ nu bɛhɔ agyina! Nwa yeɛ ɔhane sɔ dwirɛ ne tole berɛ fili tetetete ɔ? Nwa yeɛ ofi daa tete ne ɔfa tole dwaa ɔ? Aso nna me, AWURADE ɔ? Nyameɛ biala nne berɛ, sana me ngome, nde Nyameɛ bɔ ɔtengyɛ bɔ ode ngoa ɔ, ebiala nne berɛ, sana me ngome.

²²“Aseɛ so maen maen amukoraa, ɛ́mɔsa bɛ si bɛ́bra me berɛ beenya ngoa! Ofikyɛ me yeɛ nde Nyameɛ ɔ, na ebiala nne berɛ ko.

²³ Mata me bɔbɔ me nwo ndaen, tenenee dwirɛ yeɛ ofi me noa nu wawa ɔ, edwirɛ bɔ mengɔhwe ngosa ɔ, kyɛ, ‘Nangoroma mukoraa bɛkɔkoto me, ná noa amukoraa bafa me bata ndaen.’

²⁴“Amba, bɛkɔhã bɛkɔfa me nwo kyɛ, AWURADE ngome nu yeɛ menya tenenee ne anwoserɛ ɔ, na bɛ bɔ bafɛ ye so yaa ne, bɛkɔfa animguaseɛ yeɛ bɛkɔwa ye nyunu ɔ.

²⁵AWURADE nu yeɛ Yisrael boso ama mukoraa bekoli ngonim bekonya animnyam ɔ.”