Read Sehwi Yesaya 47 Bible Online

Yesaya 47 - Sehwi bible

Yesaya 47

¹ Dwu bra baatena asefuo nu, O, Babilɔn awa brasua ababunu, tena aseɛnwo berɛ bɔ engonya ahennie bia ngɔtena so ɔ, O Kaldeafoɛ bɛ wa brasua, ofikyɛ bɛngɔfrɛ wɔ brasua nomenome ne sokoo ko.

²Fa nyɔboɛ mɔ bɔ beti so ɔ ná ti atokoɔ, ye wɔ ngatanyunu ne, dwa wɔ tena aguasoɛ ne gua berɛ, ma wɔ sɔ nwo gua berɛ, pɛ asue nemɔ.

³Wɔ nwo kɔla so, na bekonwu w’animguaseɛ. Ngɔtɔ wereɛ, na mengonwu sona biala anwumvoin.

⁴Yɛ Defoɛ ne, ye dumaa ole Asafo AWURADE, Yisrael Krongronniɛ ne.

⁵O Kaldeafoɛ awa brasua, tena ase mua wɔ noa, kɔ ná kowura awosii nu, ofikyɛ bɛngɔfrɛ wɔ ahennie mɔ bɛ hemmaa ko.

⁶Mvɛle me maen so yaa, nguale m’agyapadeɛ nwo fiɛ, mvale bɛ nwurale wɔ sa, na annwu bɛ anwumvoin, na nworowaa po, ɛhyɛle bɛ so maa benwuni amaneɛ piri paa.

⁷Ɛhane kyɛ, ‘Ngoli hemmaa afebɔɔ,’ amaa ɔnate so andwene sɔ dwirɛ nemɔ anwo, yeɛ angaye b’ayieleɛ koso.

⁸ Yiti afei tie sɔ dwirɛ ɛhe, wɔ bɔ ekuro anigye ɔ, bɔ wɔ so anu atɔ wɔ wɔ asetena nu ɔ, bɔ ɛkã ye wɔ wɔ ti anu kyɛ, ‘Me ɛne! Ebiala nne berɛ bɔ ɔte kyɛ me ɔ; mengɔyɛ kunaniɛ, yeɛ mengoli abawuo.’

⁹Nakoso sɔ dwirɛ nyɔ ne kɔto wɔ, bɛkɔto wɔ mvum nu, ɛlɛhomapɛ, na abawuo ne kunalilɛ kɔto wɔ kandinga paa, ɔmva ye nwo kyɛ wɔ musueyelɛ sone pee ɔ, ɔmva ye nwo kyɛ abe paa wɔ ngonyaayelɛ nu ɔ.

¹⁰“Ɛfale wɔ wora wurale w’amumuyɛɛyɔlɛ nu, na ɛhane kyɛ, ‘Sona biala nnwu me.’ Wɔ nworɛ ne wɔ nimdeɛ yeɛ bamaa amini ɔ, na ɛhane ye wɔ wɔ ti anu kyɛ, ‘Me ɛne! Ebiala nne berɛ bɔ ɔte kyɛ me ɔ.’

¹¹Yiti musue kɔto wɔ bɔ engonya ye sɔbea ɔ; abue kobu wɔ bɔ engonya ye noa mbata biala ɔ; na asane kɔto wɔ mvum nu bɔ engonwu ye nwo hwee ɔ.

¹²“Wɔ ngonyaayelɛ ne wɔ musueyelɛ worawora bɔ afi wɔ ngwadaa nu aye ne, kɔ so gyina pindinn wɔ nu e! Ebiaa okoyie wɔ yé wɔ nu, ebiaa ɔkɔma wɔ nwo kɔyɛ suro.

¹³Foɛ pee bɔ batu wɔ ne, wama w’adwene ayɛ wɔ nwunyaenn, bɛ bɔ bɛnea nzramaa nu bɛkã nu dwirɛ ne, bɛ bɔ bedi nzramaa nwo ahɔen, bɛ bɔ ɛsraen fi a bɛkã bɔ okosi ɔ ne, maa bedwɔso bɛpepɛ bele wɔ e!

¹⁴Tie, bɛte kyɛ ɛserɛ worowaa, see kɔyera bɛ, bɛngɔhora ngole bɛ nwo ngofi see wuronyiwuronyi ne sa nu, na ɛhe de, nna see bɔ otu sona nwo ɛyerɛ ɛne, yeɛ nna see bɔ bɛtena ye nwo bɛto hɔ ɛne!

¹⁵Na bɛ bɔ ɛne bɛ babɔ nu bayɔ adwuma, bɔ ɛne bɛ bali dwaa fite wɔ ngwadaa nu ne, sɔ yeɛ bɛte bɛma wɔ ɔ. Ebiala ali makyebu wafa ye atee, na ebiala nne berɛ bɔ ɔkɔpepɛ kole wɔ ɔ.