Read Sehwi Yesaya 48 Bible Online

Yesaya 48 - Sehwi bible

Yesaya 48

¹O Yakob boso ama, ɛ́mɔtie dwirɛ he, ɛmɔ bɔ bɛfa Yisrael dumaa bɛfrɛ ɛmɔ ɔ, bɔ ɛmɔte Yuda bosofoɛ, bɔ ɛmɔfa AWURADE dumaa bɛta ndaen, bɔ ɛmɔbɔ Yisrael Nyameɛ dumaa, nakoso ɛmɔnyɔ sɔ nahorɛ ne tenenee nu ɔ.

²Ofikyɛ bɛfrɛ bɛ nwo kyɛ bɛte kuro krongron ne anu ama, bɔ bɛfa bɛ nwo bɛto Yisrael Nyameɛ so ɔ; ye dumaa ole Asafo AWURADE.

³“Mvili tetetete yeɛ ngane nningyein bɔ osisi ne anwo dwirɛ ɔ, ɔte me noa dwirɛ, na mva ndole dwaa; nyɔle bɛ mvum nu, na besisili.

⁴Ofikyɛ, mese kyɛ wɔ so yɛ se, ayɛ wɔ kɔme kyeinn kyɛ buralɛ, ɔne wɔ nwoma so kyɛ ayaa.

⁵Ye sɔ ne ati, yeɛ nga ngyirele wɔ fi tetetete, anzana bɛbaasi ne, mmɔle ye nwo dawure ngyirele wɔ, amaa anga kyɛ, ‘M’amoen ne yeɛ ɔyɔle ɔ, m’amoen bɔ base ne, ɔne bɔ bahuro buralɛ bayɔ ne yeɛ bɛhyɛle bɛ maa bɛwale ɔ.’

⁶“Ate dwirɛ ne, afei nea ye mukoraa; aso ɛmɔngɔbɔ ye dawure anaa? Ofi ɛnɛ bɔ ɔkɔ ɔ, méma ɛte dwirɛ foforɛ, mvealeɛ nu dwirɛ mɔ bɔ ɛnze ɔ.

⁷Kekesaala ye ala yeɛ mabɔ bɛ ɔ, nna tetetete ɔ, ɔbaadwu ɛnɛ ye, né ɛttele bɛ nwo dwirɛ le, amaa anga kyɛ, ‘Yoo, né mese ye dada.’

⁸Ɛttele ye le, yeɛ ennwuni ye le, ofi tetetete yeɛ wɔ so ne, tokuro nne nu ɔ; ofikyɛ né mese kyɛ ɛte kanda, na ofi eni akunu yeɛ bɛfrɛ wɔ mmeraatolɛniɛ ɔ.

⁹“Me dumaa ne ati, mafa me yaafɛlɛ ne makongɔm berɛ, na m’ayɛyelɛ ne ati, manya wɔ nwo aboterɛ, amaa ɔnate so mannua wɔ boso.

¹⁰Tie, mapɔ wɔ nwo, nakoso nna kyɛbɔ bɛpɔ ɛdwetɛ nwo ne ɔ, maso wɔ manea wɔ amaneɛ foonoo nu.

¹¹Me bɔbɔ me ti, me bɔbɔ me ti yeɛ meyɔ sɔ ɔ, ofikyɛ, ɔwale ye sɛ bɔ begua me dumaa nwo fiɛ ɔ? Mengɔfa m’animnyam mengɔma ebie.

¹² “Yɛ asoɛ tie me, O Yakob ne Yisrael bɔ mafrɛ wɔ ɔ! Me ole Ye, me ole bɔ oli moa ne, yeɛ me ala koso ole ayieleɛ ne.

¹³Me sa yeɛ ɔtole aseɛ fapem ɔ, yeɛ me sa famaa trɛtrɛle ewienu nu ɔ; na sɛ meto me sa mefrɛ bɛ a, bɛ mukoraa bɛbagyinagyina me nyunu.

¹⁴“Ɛmɔ amukoraa, ɛ́mɔboaboa ɛmɔ noa bétie! Bɛ nu nwa yeɛ wafa sɔ dwirɛ nemɔ wato dwaa ɔ? Na bɔ AWURADE kuro ye dwirɛ ne, ye yeɛ ɔkɔyɔ bɔ AWURADE ahyehyɛ atia Babilɔn ɔ, na ye tumi ne kɔho kotia Kaldeafoɛ.

¹⁵Me, me yeɛ mahã ɔ, mafrɛ ye. Mafa ye mawa, na okoyie ye yé wɔ ye atee biala so.

¹⁶Ɛmɔhwe bepingye me, ɛ́mɔtie sɔ dwirɛ he: Ofi ahyɛaseɛ ne, nndwudwole mvealeɛ nu, ofi mmerɛ bɔ osili ne, né nwɔ berɛ.” Na afei de, AWURADE Nyameɛ ɔne ye Sunzum basoma me.

¹⁷AWURADE, wɔ Defoɛ, Yisrael Krongronniɛ ne, ɔnwa nyoo: “Me ole AWURADE, wɔ Nyameɛ, bɔ ɔte paa ma wɔ ne, me yeɛ mekyirekyire wɔ ɔ, atee bɔ odi kyɛ ɛfa so ne, me yeɛ mefa wɔ mefa so ɔ.

¹⁸O, sɛ ahaa ɛyɛle asoɛ tiele me mmeraa dwirɛ a! Ahaa w’asomdwee kɔyɛ kyɛ asue, ahaa wɔ tenenee kɔyɛ kyɛ ɛpo asorɔkye;

¹⁹ahaa wɔ boso ama kɔyɛ pee kyɛ anweaa, ahaa wɔ boso ama kɔyɛ pee kyɛ nyɔboseka. Ahaa mengokyikyi bɛ dumaa, anaa mengohu bɛ ngofi me nyunu.”

²⁰ Ɛ́mɔfi Babilɔn béfite bɛhɔ, ɛ́mɔnwati béfi Kaldeafoɛ nu, ɛ́mɔfa ahurusililɛ bɛ́bɔ ye nwo ese, ɛ́mɔbɔ ye nwo dawure, ɛ́mɔma odwu aseɛ so nekaa biala. Ɛ́mɔhã kyɛ, “AWURADE apɔ ye somvoɛ Yakob wale ye!”

²¹Olili bɛ nyunu fale ɛserɛ so ne, nzuhɔen angu bɛ, ɔmane nzue pu fili nyɔbotaen ne anu mane bɛ, odwale nyɔbotaen ne anu, na nzue tengyɛ fili nu.

²² AWURADE nwa nyoo, “Bɔnefoɛ ye so anu ngodwo ye.”