Read Sehwi Yesaya 49 Bible Online

Yesaya 49 - Sehwi bible

Yesaya 49

¹ O supɔ mɔ, ɛ́mɔyɛ asoɛ bétie me, dededede maen mɔ, ɛ́mɔtie! AWURADE frɛle me fili me ni akunu, ofi me ni akunu yeɛ ɔtole me dumaa ɔ.

²Ɔmane me noa dwirɛ yɛle kyɛ ngrandɛ nnaennaen, ɔfale me feale ye sa bo fɔnwoo nu, ɔfale me yɛle agyaen anoa tworɔntworɔn, na ɔfale me siele ye ndokue nu.

³Na osele me kyɛ, “O Yisrael, ɛte me somvoɛ, bɔ ɔnate wɔ so yeɛ bɛkɔhyɛ me animnyam ɔ.”

⁴ Na nzele kyɛ, “Mafɛ mbaen, masɛkye m’anwoserɛ magua mbaen bɔ mvasoɛ amma so ɔ. Nakoso, nahorɛ nu, me ndɛenbualɛ wɔ AWURADE sa nu, yeɛ m’akatuaa wɔ Nyameɛ sa nu.”

⁵Na afei AWURADE adwudwo, ye bɔ ɔnwone me wɔ me ni akunu kyɛ mmanyɛ ye somvoɛ, kyɛ nza mva Yakob mmrɛ ye, amaa ɔnate so Yisrael noa waboa wɔ ye nyunu, ofikyɛ manya AWURADE nyunu animnyam, yeɛ me Nyameɛ te m’anwoserɛ.

⁶ Ɔnwa nyoo: “Kyɛ ɛkɔyɛ me somvoɛ, kyɛ ɛkɔpagya Yakob mmusua kure nemɔ, ɔne kyɛ ɛkɔfa Yisraelfoɛ bɔ banya bɛ ti badidi nu ne ekosa kɔwa ne, aso ɔte adwuma ba? Ngosa ngɔfa wɔ ngɔyɛ kanea ngɔma maen maen mɔ, amaa ɔnate so ama me ngoalelɛ waadwu aseɛ so nekaa biala.”

⁷AWURADE, Yisrael Defoɛ ne ye Krongronniɛ ne, ɔkã kyire bɔ bebu ye kra animtia, bɔ maen maen mɔ bekyi ye, bɔ ɔte maen mbanyi atianuserɛfoɛ bɛ somvoɛ ne kyɛ, “Ahemvo mɔ konwu ye bekodwɔso, atitirefoɛ koso, na bɛkɔfa bɛ nyunu bekobutu berɛ, ɔnate nahorɛniɛ AWURADE, Yisrael Krongronniɛ bɔ waneanea nu waye wɔ ne ati.”

⁸ AWURADE nwa nyoo: “Mmerɛ bɔ odi kyɛ menwu wɔ anwumvoin ne, ndiele wɔ, ngoalelɛ kyẽa ne, mmokale wɔ. Manea wɔ so mafa wɔ mayɛ apam mama maen ne, kyɛ, odi kyɛ ɛma maen ne osa si ye gya nu, kyɛ, odi kyɛ ɛmaa bɛfa agyapadeɛ bɔ ɔla berɛ mbaen ne bɛtena so;

⁹ná ɛkã kyire kukunufoɛ kyɛ, ‘Ɛ́mɔfite bɛbra!’ ɔne bɛ bɔ bɛwɔ awosii nu kyɛ, ‘Ɛmɔbra pandann nu!’ Atee nemɔ noa yeɛ bekodidi ɔ, na pambaa amukoraa bɔ so te pralaa ne, bekonya aleɛ wɔ so.

¹⁰ Ɛhɔen anaa nzuhɔen ngohũ bɛ, mvrama hyerɛhyerɛ ne eyia ngɔbɔ bɛ, ofikyɛ, bɔ onwu bɛ anwumvoin ne, ɔkɔyɛ bɛ taataa, na mbombonzue nwo yeɛ okoli bɛ nyunu kɔfa bɛ kɔhɔ ɔ.

¹¹Ngɔma me mmokaa mukoraa bɛkɔkakyi atee, na ngɔma m’atimbire mɔ kɔla so yɔɔ.

¹²Tie, ɛhemɔ kofi nziɛ nziɛ yeɛ bɛkɔwa ɔ, tie, ɛhemɔ kofi sorɔ ne eyia atɔleɛ, yeɛ ɛhemɔ kofi Sinim aseɛ so bɛkɔwa.

¹³ O anwuro, ɛ́mɔto anigye dwein! O aseɛ, di ahurusi! O mmokaa mɔ, ɛ́mɔbɔ ese! Ofikyɛ AWURADE akyekye ye maen wora, na okonwu ye mmenia bɔ bɛyɛ anwumvo ne anwumvoin.

¹⁴Nakoso Sion ahã kyɛ, “AWURADE apo me, m’AWURADE ye wora afi me.”

¹⁵“Aso brasua ye wora kɔhora kofi ɔwa bɔ otua nyɔfone noa, bɔ yeɛ ongonwu ye kunu ba anwumvoin ɔ? Yoo, sɛ sɔ mmrasua nemɔ bɛ wora fi po a, me de, me wora ngofi wɔ.

¹⁶Nea, makurukyire wɔ magua me sa kunu; na wɔ fasue nemɔ gyigyi me nyunu daa.

¹⁷Bɛ bɔ bɛkyekye wɔ nguro nemɔ ne, bɛ nwo yɛ nyera tra bɛ bɔ bɛbɔ wɔ nguro nemɔ ɔ, na bɛ bɔ bɛsɛkye wɔ ne, bekofi wɔ nu bɛkɔhɔ.

¹⁸To wɔ nye anwuro nea bra yia, ɛhemɔ amukoraa baboa bɛ noa bɔ bɛ́ba wɔ berɛ ɔ. AWURADE nwa nyoo, kyɛ nde ase ye de, ɛkɔfa bɛ mukoraa ɛkɔhyehyɛ wɔ nwo kyɛ mbembenanneɛ, ɛkɔfa ekosiesie wɔ nwo kyɛbɔ atɔmvorɛ braa ɔyɔ ne ala.

¹⁹“Nahorɛ nu, wɔ nguro ne wɔ maen bɔ babɔ ye ne, ɔne w’aseɛ bɔ wakakyi kurofoen ne, afei de, ɔkɔyɛ kaaba kɔma wɔ mmenia bɔ bɛbaatena wɔ nu ne, na bɛ bɔ bɛbɔle wɔ tɔɔ ne de, bɛkɔhɔ dedeede.

²⁰Na ngwadaa bɔ ɛwole bɛ wɔ mmerɛ bɔ wɔ mma fili wɔ sa ne anu ne, bɛkɔhã bekogua wɔ so anu bieku kyɛ, ‘Ɛwa te kãa ma me, trɛ nu maa nya nekaa ndena.’

²¹Na afei ɛkɔhã ye wɔ wɔ ti anu kyɛ, ‘Mmaa hemɔ, nwa yeɛ ɔwole bɛ mane me ɔ? Ofikyɛ me mma fili me sa, na nyɛle angonam, bɛhyele me nnure bɛhɔle, bɛpole me, na ɛhemɔ de, nwa yeɛ ɔtetele bɛ ɔ? Nahorɛ nu, ɔhale me ngome, na ɛhemɔ de, befi nisua yeɛ bɛwale ɔ?’ ”

²²AWURADE Nyameɛ nwa nyoo: “Ɛ́mɔtie, mebaama me sa so mekyire maen maen mɔ, ngɔfa me frangaa ngɔpena berɛ ngohyire maen maen mɔ, na bɛkɔfa wɔ mma mmienzua mɔ bɛkɔbɔ bɛ hue so bɛkɔwa, yeɛ wɔ mma mmrasua mɔ koso, bɛkɔfa bɛ bekosie bɛ kɔme anwo bɛkɔwa.

²³Ahemvo mɔ, bɛkɔyɛ wɔ baba mɔ bɔ bɛtete wɔ ɔ, yeɛ bɛ hemmaa mɔ kɔyɛ wɔ maame mɔ bɔ bɛma wɔ nyɔfone ɔ. Bɛkɔfa bɛ nyunu bekobutu ase bekobu ndwerɛ wɔ wɔ nyunu, ná batafe wɔ gya bo mvuture. Na afei ekonwu kyɛ me ole AWURADE, na bɛ bɔ bɛfa bɛ nye bɛto me so ne, bɛ nyunu ngogua ase.”

²⁴Bɔ anwoserɛniɛ ahye ye ne, aso ebie kɔhora kole ye kofi ye sa nu, anaakyɛ, bɔ bahye ye wɔ mmeraa atee so ne, aso ebie kɔhora kɔpepɛ kole ye?

²⁵Nahorɛ nu, AWURADE nwa nyoo: “Bɛ bɔ anwoserɛniɛ wahye bɛ nnure ne po, bekole bɛ bekofi ye sa nu, yeɛ bɔ atianuserɛniɛ wahye ye ne koso, bɛkɔpepɛ bekole ye, ofikyɛ ngɔfa koɛ ngɔtoa bɛ bɔ bɛfa koɛ bɛtoa wɔ ɔ, yeɛ ngɔpepɛ ngole wɔ mma mɔ.

²⁶Bɛ bɔ bɛhyɛ wɔ so ne, ngɔfa bɛ bɔbɔ bɛ nwonaen maa bekoli, na bɛ bɔbɔ bɛ mogya kɔbo bɛ kyɛ nzaa. Na afei anwoɔnaen amukoraa konwu ye kyɛ me, AWURADE, me ole wɔ Ngoadefoɛ ne wɔ Defoɛ, Yakob ye Tuminiɛ ne.”