Read Sehwi Yesaya 50 Bible Online

Yesaya 50 - Sehwi bible

Yesaya 50

¹AWURADE nwa nyoo: “Ɛmɔ maame agyaayiralɛ krataa bɔ mva nyirale ye ne, ɔwɔ nisua? Anaa, nwa yeɛ mema ye kerɛ bɔ yiti mayɛ ɛmɔ atɔen mama ye ɔ? Ɛ́mɔtie, ɛmɔ amumuyɛɛ ti yeɛ nyɛle ɛmɔ atɔen ɔ, ɛmɔ mmeraatolɛ ti yeɛ nyirale ɛmɔ maame ɔ.

²Mmale ne, nzu ati yeɛ né sona biala nne berɛ ɔ? Mvrɛle ne, aso né sona biala nne berɛ bɔ okosuro ɔ? Aso me sa te tikaape bɔ ɔngɔhora ngɔpepɛ ngole ɛmɔ ɔ? Anaakyɛ, nnne tumi bɔ mefa mepepɛ mede ɛmɔ anaa? Ɛ́mɔtie, metwi ɛpo nyunu maa ɔwewe, mema asue mɔ bɛkakyi aseɛ pralaa, na ɔnate kyɛ bɛ nu naen bennya nzue ti, nzuhɔen ku bɛ maa bewu bɛporɔ.

³Mefa awosii tunn mekata anwuro nwo, na mefa ɛsɛen tena mekera bɛ.”

⁴AWURADE Nyameɛ ama me suaniɛ ye noa bɔ bɛfa bedwudwo ɔ, kyɛ nwu edwirɛ bɔ ɔfata ɔ, bɔ ngɔhã ngɔkyekye sona bɔ wafɛ ɔ ye wora ɔ. Ngyerɛmɔ biala, otingye me maa me so te dwirɛ, kyɛ mva ndie, kyɛ bɛ bɔ banya nimdeɛ ne ala.

⁵AWURADE Nyameɛ abukye me so, manyɛ lɔen, yeɛ mangakyi me si mamma ye.

⁶ Mvale me si mane bɛ bɔ befi me mbire ne, mvale me so taa nu mane bɛ bɔ betutu kanza ne. Beguale me nyunu ase, bɛfefele nwɔserɛ beguale me nyunu, nakoso mamva me nyunu mamvea.

⁷Ofikyɛ AWURADE Nyameɛ gyi me si, yiti ɔnyɛ me nya, yiti matindim berɛ serɛserɛ kyɛ nyɔbotaen, na mese kyɛ me nyunu ngogua ase.

⁸ Bɔ obua me be ne, opingye me, nwa yeɛ ɔne me kɔbɔ kuro ɔ? Maa ɔne me yɛdwɔso yɛgyina yɛbɔ yɛ kuro e! Nwa yeɛ ɔne me anya dwirɛ ɔ? Maa opingye me e!

⁹Tie, AWURADE Nyameɛ gyi me si, nwa yeɛ okobua me foɛ ɔ? Tie, bɛ mukoraa bɛkɔtete kyɛ ɛtena, na mvrɔlɔ koli.

¹⁰Ɛmɔ nu nwa yeɛ osuro AWURADE, ná ɔyɛ ye somvoɛ dwirɛ nwo sotie ɔ? Sona bɔ ɔnate awosii nu, bɔ onnya kanea ne, maa ɔfa ye wora wura AWURADE dumaa nu, ná ɔfa ye nwo to ye Nyameɛ so.

¹¹Ɛ́mɔtie, ɛmɔ bɔ ɛmɔkua see, bɔ ɛmɔfa gyetia bɛpɛ bɛ nwo bɛbra beyia ɔ! Ɛmɔ see wuronyiwuronyi ne, ɔne gyetia bɔ ɛmɔasɔ ne, ɛ́mɔnate nu! Bɔ ɛmɔkonya bekofi me berɛ hɔ ɛne: amaneɛnwunɛ nu yeɛ ɛmɔkɔlela berɛ ɔ.