Read Sehwi Yesaya 51 Bible Online

Yesaya 51 - Sehwi bible

Yesaya 51

¹“Ɛ́mɔtie me, ɛmɔ bɔ ɛmɔbɔ tenenee bra ɔ, ɛmɔ bɔ ɛmɔpena AWURADE si atee ɔ; ɛ́mɔnea nyɔbotaen bɔ bedwale ɛmɔ befili nu ne, ɔne kumaa bɔ nu yeɛ betuli ɛmɔ befili ne.

²Ɛ́mɔnea ɛmɔ nana Abraham ne Sara bɔ bɛwole ɛmɔ ne; ofikyɛ mvrɛle Abraham ne, né ɔte sona horɛ, nyirale ye, na mmaa ɔtale pee.

³AWURADE kɔkyekye Sion wora, ɔkɔkyekye ye kurofoen amukoraa wora, ye ɛserɛ ne, ɔkɔkakyi ye maa ɔkɔyɛ kyɛ Eden, ɔne ye aseɛ pralaa ne kyɛ AWURADE turo, na bekonwu anika ne anigye wɔ nu, yeɛ asennaa ne edweintolɛ.

⁴“Me mmenia, ɛ́mɔtie me yé, me maen, yɛ asoɛ tie me; ofikyɛ mmeraa kofi me berɛ kɔwa, na me ndɛenbualɛ kɔyɛ kanea kɔma maen maen mɔ.

⁵Me tenenee ne apingye, me ngoalelɛ ne kɔye ye nwo ali, na me tumi kobua maen mɔ ndɛen; supɔ mɔ bɛ́nea me ate, na bɛ nye la me tumi ne aso.

⁶ Ɛ́mɔma ɛmɔ nye so bɛ́nea anwuro, ná ɛ́mɔhu bɛ nye ase bɛ́nea aseɛ; ofikyɛ anwuro kotu komini kyɛ nwosina, aseɛ kɔtete kyɛ ɛtena, na so ama kowuwu sɔ ala;[15] nakoso me ngoalelɛ ne de, ɔkɔyɛ afebɔɔ, yeɛ me tenenee ne wora, ye bo ngɔpɛ le.

⁷“Ɛ́mɔtie me, ɛmɔ bɔ ɛmɔse tenenee ɔ, maen bɔ me mmeraa wɔ b’ahone nu ɔ; nnɛma ɛmɔsuro mmenia animguaseɛ bɔ begua ɛmɔ ɔ, yeɛ nnɛmɔma bɛ nzoaapepɛlɛ ne obu ɛmɔ abasa nu.

⁸Ofikyɛ mvrɔlɔ koli bɛ kyɛ ɛtena, yeɛ alɔponɛ koli bɛ kyɛ gyese; nakoso me tenenee de, ɔkɔyɛ afebɔɔ, na me ngoalelɛ kɔtena berɛ kɔma aworɛ ndoatoasoɛ amukoraa.”

⁹O AWURADE tumi, kanyane wɔ nwo, kanyane wɔ nwo, kyire w’anwoserɛ! Kanyane wɔ nwo kyɛbɔ ɛyɔle ye daa daa ne, kyɛbɔ ɛyɔle ye daa tetetete aworɛ ndoatoasoɛ nu ne. Aso nna wɔ yeɛ ɛpepɛle Rahabo[16] nu ahuronzi ahuronzi ná ɛfale nikyee sinane ɛpo nu sasrabɔnzam ne ɔ?

¹⁰Ɛpo bɔ ɔte buma kandinga ne anu nzue ne, aso nna wɔ yeɛ ɛmaa ɔwewele ɔ? Aso nna wɔ yeɛ ɛmane ɛpo buma ne abo dɔ kakyili atimbire mane bɛ bɔ aapɔ bɛ ne kyɛ bɛpɛ ye ɔ?

¹¹Na bɛ bɔ AWURADE aapɔ bɛ ne, bekosa bɛkɔwa, bɛkɔfa ahurusililɛ bɛkɔwa Sion, anigye afebɔɔ kɔyɛ b’abotire; bekonya anika ne anwosɛpɛ, na aworabɔlɛ ne yealɛlilɛ kotu kofi bɛ so.

¹²“Me, me yeɛ mekyekye ɛmɔ wora ɔ, na wɔ, nzikyɛ sona ole wɔ, bɔ esuro kuro sona bɔ owu ɔ, ɔne sona awa bɔ bɛyɔle ye kyɛ ndire ɔ;

¹³bɔ yeɛ ama wɔ wora afi AWURADE bɔ ɔbɔle wɔ ne, ye bɔ ɔtrɛtrɛle ewienu nu sinzele berɛ, bɔ ɔtole aseɛ fapem ne ɔ? Nhyɛsoɛniɛ ne, nzu ati yeɛ ye yaafɛlɛ bɔ osoma kyɛ onya wɔ a okohu wɔ ne ati, ɛma ɛserɛ tɔ wɔ so daa biala ɔ? Nhyɛsoɛniɛ ne, ye yaafɛlɛ ne odwu nisua?

¹⁴Sona bɔ babɔ ye panwu ne, bɛkɔye ye bekofi nu ndɛndɛ; ongowu wɔ ɛborɔ kumaa nu, yeɛ ye noa aleɛ ngɔbɔ ye.

¹⁵Ofikyɛ me ole AWURADE, wɔ Nyameɛ, bɔ ɔkã ɛpo nu ma ye asorɔkye bɔ wuruwuru ne, ye dumaa li Asafo AWURADE.

¹⁶Mafa me dwirɛ matua wɔ noa, mafa wɔ mafea me sa bo fɔnwoo nu, matrɛtrɛ ewienu nu, yeɛ mato aseɛ fapem, na mahã mahyire Sion kyɛ, ‘Ɛte me maen.’ ”

¹⁷ Kanyane wɔ nwo, kanyane wɔ nwo! O Yerusalem, dwɔso! Wɔ bɔ ano AWURADE sa nu ɛyaafɛlɛ kulie ne noa, kulie bɔ ɔmaa bɛbo tendaenn ne, wɔ bɔ ano nu atu ye bo ne.

¹⁸Ye mma mukoraa bɔ wawo bɛ ne, nu biala anyɛ ye taataa; ye mma mukoraa bɔ watete bɛ ne, nu biala anzɔ ye sa.

¹⁹Sɔ dwirɛ nyɔ hemɔ yeɛ bato wɔ ɔ: nwa yeɛ ɔkɔyɛ wɔ yaakɔ ɔ? Apaabɔlɛ ne amaneɛ, yeɛ ɛhɔen piri ne ngrandɛ, nwa yeɛ mva ye so ngyekye wɔ wora ɔ?

²⁰Wɔ mma mɔ bɛ nye so aburu bɛ, beguagua mmorɔnoɛ mukoraa ngwandaa kyɛ kɛtɛbɔɔ bɔ owura ngaen nu ɔ, AWURADE ahone ahu bɛ so paa, wɔ Nyameɛ ahwi bɛ nyunu paa.

²¹Yiti wɔ bɔ ɛyɛ anwumvo ɔ, tie sɔ dwirɛ he e, wɔ bɔ abo, nakoso nna nzaa yeɛ wabo wɔ ɔ:

²²wɔ Mene, AWURADE wɔ Nyameɛ bɔ odi ye maen dwirɛ ma ye ne, ɔnwa nyoo: “Tie, kulie bɔ ɔmaa bɛbo sesɛsesɛ ne, bɔ ɔte me yaafɛlɛ kulie ne, male mafi wɔ sa nu, ɛngɔno ye ko.

²³Na ngɔfa ngowura bɛ bɔ bɛhyɛ wɔ so nemɔ bɛ sa nu, bɛ bɔ bahã bahyire wɔ kyɛ, ‘Da berɛ ma yɛtiatia wɔ so yɛhɔ’ ne; na ɛfale wɔ si yɛle kyɛ aseɛnwo, yeɛ ɛfa yɛle kyɛ atee maa bɛfale so.”