Read Sehwi Yesaya 53 Bible Online

Yesaya 53 - Sehwi bible

Yesaya 53

¹ Edwirɛ bɔ yahã ne, nwa yeɛ wale wali ɔ? Nwa yeɛ AWURADE tumi ne wala ali wahyire ye ɔ?

²Ofikyɛ ofifili kyɛ bakaa horɔhorɔ bie wɔ ye nyunu, kyɛ ndii bɔ wafifi wɔ aseɛ wosee nu ɔ. Wannya sue anaa animnyam bɔ ɔkɔmaa yɛkɔnea ye ɔ, yeɛ wannya anwonyemene bɔ ɔkɔmaa yɛkohuro ye dwirɛ ɔ.

³Mmenia buli ye animtia, na bɛpole ye; ɔte sona bɔ ɔfale aworabɔlɛ nu ná onwuni yealɛ ɔ, bebuli ye animtia kyɛ sona bɔ mmenia nwu ye a bɛye bɛ nye bɛto buro ɔ, yeɛ yamva ye yanyɛ huu.

⁴ Nakoso, nahorɛ nu, wafa yɛ yealɛ mɔ wato ye nwo so, na wasoa yɛ amaneɛnwunɛ; nakoso yɛbuli ye kyɛ ebie bɔ Nyameɛ ahwe ye so ɔ, kyɛ ebie bɔ wapura ye waprapra amaneɛ wagua ye so ɔ.

⁵ Nakoso, yɛ mmeraatolɛ ti yeɛ bepurale ye ɔ, yɛ amumuyɛɛ ti yeɛ bedwiridwirili ye nwo ɔ; yɛ asomdwee nwo asohwenɛ lale ye so, na ye nwo beabealɛ ne yeɛ ɔmaa yɛnya anwonyerɛsalɛ ɔ.

⁶Yɛ mukoraa yali makyebu kyɛ mmoaen, yɛ nu biala wamakye wafa ye bɔbɔ ye atee deɛ so, na AWURADE aprapra yɛ mukoraa yɛ amumuyɛɛ wagua ye so.

⁷ Bɛfale ye bɛfale yealɛ nu, yeɛ bepurapurale ye, nakoso wammukye ye noa, kyɛ boaen bɔ bɛ ne ye kɔ akumyɛɛ ɔ, kyɛ boaen bɔ watɔ mumu wɔ bɛ bɔ bɛpepɛ ye nwiaa bɛ nyunu ɔ, sɔ ala yeɛ wammukye ye noa ɔ.

⁸Bɛnate nhyɛsoɛ ne ndɛengyea so bɛfale ye bɛhɔle, na ye aberɛso ama mɔ, nwa yeɛ ɔdwene ye nwo kyɛ bapɛ ye ngoa so bafi ateasefoɛ aseɛ so ɔ, kyɛ me maen mmeraatolɛ ti yeɛ bepurale ye ɔ?

⁹ Bɛpɛle ye asieleɛ bɛfrale bɔnefoɛ mɔ deɛ, ɔne sikafoɛ mɔ deɛ wɔ ye wue nu, ɔwɔ nu kyɛ wanni nzɛmmɔne biala, yeɛ nnakannaka biala wamvi ye noa.

¹⁰Nakoso né AWURADE kuro kyɛ odwiridwiri ye nwo ɔ, na ɔfale ye fale yealɛ nu. Na ɔnate kyɛ ɔfale ye kra bɔle bɔne nwo afɔleɛ ne ati, okonwu ye bosofoɛ, okonya ngoa tendenn, na ɔnate ye so yeɛ bɔ AWURADE kuro ne, ɔkɔwa nu ɔ.

¹¹Okonwu ye kra amaneɛnwunɛ ne aso mvasoɛ maa ye ahone kɔtɔ ye kunu, na m’akoaa teneneeniɛ ne, ye nimdeɛ yeɛ ɔkɔfa kobua mmeni pee be ɔ, ofikyɛ ye yeɛ ɔkɔsoa b’amumuyɛɛ ɔ.

¹² Yiti ngɔfa ye kyɛfa ngɔma ye wɔ atitirefoɛ nu,[17] na ɔne anwoserɛfoɛ bɛkɔhyɛ koɛ nu nzesadeɛ ne, ofikyɛ ɔfale ye kra tole berɛ mane ewue, bɛhale ye bɛfrale mmeraatolɛfoɛ; nakoso ɔfale menni pee bɛ bɔne tole ye nwo so, na olili mmeraatolɛfoɛ bɛ ti dwirɛ mane bɛ.