Read Sehwi Yesaya 54 Bible Online

Yesaya 54 - Sehwi bible

Yesaya 54

¹ “To dwein, wɔ, mmotaen bɔ anwo ɔ, ma wɔ komvi so to ahurusi dwein, wɔ bɔ ennwuni aworɛ yealɛ le ɔ! Ofikyɛ brasua bɔ bɛpole ye ne, ye mma kɔyɛ pee kɔtra brasua bɔ ogya biaa ne,” AWURADE noa dwirɛ ɛne.

²Wɔ tena sua ne, trɛ nu, w’atenaleɛ nemɔ, trɛtrɛ berɛ mbɛmuɛ tena nemɔ anu; nnɛyakyi, ma wɔ nyamaa nemɔ bɛyɛ ndendenn, ná ma wɔ pɛmbɛen nemɔ betimu ase.

³Ofikyɛ ɛkɔtrɛtrɛ nu kɔhɔ wɔ sa famaa so ne bɛen so, wɔ boso ama kɔfa maen maen mɔ bekoli so, na bɛkɔma mmenia kɔtenatena kurofoen nemɔ aso.

⁴“Nnɛsuro, ofikyɛ wɔ nyunu ngogua ase, nnɛmaa ɔyɛ wɔ nya, ofikyɛ animguaseɛ ngɔhã wɔ, ofikyɛ wɔ wora kofi wɔ ndaluwa nu nyanzoen ne, yeɛ wɔ kunalilɛ nu animguaseɛ ne, ɛngɔkaye ye ko.

⁵Ofikyɛ Nyameɛ bɔ ɔbɔle wɔ ne, ɔte ehu, ye dumaa li Asafo AWURADE, wɔ Defoɛ ole Yisrael Krongronniɛ ne, na bɛfrɛ ye ewiase amukoraa Nyameɛ.

⁶Amba, AWURADE ato ye sa wafrɛ wɔ, kyɛ braa bɔ bayira ye, bɔ odi aworabɔlɛ ɔ, kyɛ mmerandeɛ nu braa bɔ biaa ne apo ye ɔ, wɔ Nyameɛ noa dwirɛ ɛne.

⁷Mbole wɔ mmerɛ kãa bie, nakoso ngogyina anwumvoinnwunɛ piri so ngɔfa wɔ ngɔbata me nwo.

⁸Mvɛle ɛyaa piri paa, na mvale me nyunu mveale wɔ mmerɛ kãa bie, nakoso ngɔfa ɔdɔ bɔ olle ayieleɛ ɔ ngonwu wɔ anwumvoin, AWURADE, wɔ Defoɛ ne, ye noa dwirɛ ɛne.

⁹ “Na ɛhe te kyɛ Nowa mmerɛ ne ala: kyɛbɔ ndale ndaen kyɛ nnɛma Nowa nzueyilɛ ne oyi fa aseɛ so ko ne, sɔ ala yeɛ mata ndaen kyɛ mengɔfɛ wɔ so yaa ɔ, yeɛ mengohwi wɔ nyunu.

¹⁰Ofikyɛ, mmokaa kotutu kofi bɛ boso, yeɛ pambaa mɔ kɔwoso, nakoso me dɔ bɔ onni ngasi ne de, mengɔye mengofi wɔ so, na m’asomdwee apam ne, ongogu, AWURADE bɔ onwu wɔ anwumvoin ne, ye noa dwirɛ ɛne.

¹¹ “O wɔ bɔ edi yealɛ, bɔ mvrama atu afĩ wɔ, bɔ ebiala ngyekye wɔ wora ɔ, tie, ngɔfa nyɔboɛ nyemenenyemene yeɛ ngosisi wɔ sua mɔ ɔ, na ngɔfa nyɔboɛ bɔ oli safire ngɔto wɔ fapem ne.

¹²Ngɔfa nyɔboɛ bɔ oli agate ngosi w’abandenden nemɔ bɛ ti afia, ngɔfa nyɔboɛ bɔ oli kabunkre ngosi wɔ pambim nemɔ, ná mafa nyɔboɛ bɔ ye nyɔboɛ yɛ se ɔ mato wɔ fasue ne amukoraa.

¹³ AWURADE kohyirehyire wɔ mma mukoraa nikye, na wɔ mma konya asomdwee pee.

¹⁴Wɔ bo kotindim wɔ tenenee nu, ɛne nhyɛsoɛ b’afia atee kɔwale, ofikyɛ engosuro, yeɛ ɛne ahunundetelɛ b’afia atee kɔwale, ofikyɛ ongopingye wɔ.

¹⁵Sɛ ebie fa koɛ batoa wɔ a, ye de, nna me yeɛ mayɔ sɔ ɔ; yeɛ sɛ ebie fa ngondii batoa wɔ a, ɔnate wɔ ti okoli ngoguo.

¹⁶Tie, me yeɛ mmɔle buralɛ dwumvoɛ bɔ ofita ebunaen see nu, ná ɔbɔ akodeɛ maa akodeɛ ne fata adwuma bɔ bɛfa bɛyɔ ɔ. Nakoso me ala yeɛ mmɔle sɛkyefoɛ kyɛ ɔsɛkye nningyein ɔ.

¹⁷Akodeɛ biala bɔ babɔ bafa batia wɔ ne, ɔngɔyɛ adwuma, yeɛ noa biala bɔ okodwɔso kotia wɔ wɔ ndɛenbualɛ nu ne, ɛkɔsa wɔ nwo maa okoli fɔ. AWURADE somvoɛ mɔ, b’agyapadeɛ ne bɛ tenenee bɔ ofi me berɛ hɔ ɛne, AWURADE noa dwirɛ ɛne.”