Read Sehwi Yesaya 57 Bible Online

Yesaya 57 - Sehwi bible

Yesaya 57

¹Teneneeniɛ wu, na ebiala kunu nde ye, bɛpɛ anwoteefoɛ ngoa so bɔ ebiala nde ye bo ɔ. Ofikyɛ bɛpɛ teneneeniɛ ngoa so kyɛbɔ ɔkɔyɛ bɔ edwirɛ tɛɛ bɔ ɔbaawa ne ɔngɔto ye ɔ.

²Ɔkɔ nekaa bɔ asomdwee wɔ ɔ, na bɛ bɔ bɛnate tenenee atee so ne, bede bɛ nwome wɔ bɛ mba so.

³Nakoso ɛmɔ de, bayifoɛ brasua mma, ɛ́mɔpingye wa, agyaasɛkyelɛniɛ ne gyanderaniɛ bosofoɛ.

⁴Nwa yeɛ ɛmɔgoro ye nwo ye? Nwa yeɛ ɛmɔsobi bɛ noa begua ye so ye? Nwa yeɛ ɛmɔkekã edwirɛ tɛɛ betia ye e? Aso nna mmeraatolɛ mmaa ole ɛmɔ? Nna kanda mmaa ole ɛmɔ?

⁵Ɛmɔ bɔ ɛmɔ ne mmosoen bɛbɔ adwaman wɔ bakaa monɛ biala bo ɔ, ɛmɔ bɔ ɛmɔkuku ɛmɔ mma mɔ wɔ bɔnza nemɔ anu wɔ nyɔbotaen ngumaa nemɔ anu ɔ?

⁶Bɔnza nu nyɔboɛ torometorome nemɔ anu yeɛ ɔte wɔ kyɛfa ɔ, bɛ yeɛ bɛte w’agyapadeɛ ɔ, bɛ yeɛ abɔ wɔ anonneɛ afɔleɛ ne aburoo afɔleɛ ama bɛ ɔ. Aso me kunu kodwo wɔ sɔ nningyein nemɔ anwo anaa?

⁷Mmokaa mbiri ndendenn so yeɛ asɛ wɔ bɛen ɔ, na dɔ yeɛ ɛfo ɛɛbɔle afɔleɛ ɔ.

⁸Anoa ne aponnwaa si yeɛ afa wɔ ngayeɛ nikyee ne asie ɔ; na ɔnate kyɛ apo me ne ati, aye wɔ nwo ato so, afo aala so, asɛ bɛen ne, ɛne bɛ bali ye noa bɔ ekole bɛ ɔ, wɔ nye gyele kyɛ ɛne bɛ kɔla ɔ, na enwuni bɛ nwo bɔ baye ne.

⁹Etuli atee ɛɛfale anaatere mane Moleke,[18] ɛfale ayirefona pee yɛle wɔ nwo; ɛsomane wɔ bɔfoɛ mɔ maa bɛhɔle dedeede, na ɛsomane bɛ maa bɛhɔle ɛborɔ po.

¹⁰Wɔ yɔleɛ tɛɛ pee ne amaa afɛ, nakoso anga kyɛ, ‘Ɔte mbaen’; na mmom ɛhɔle so nyane nu anwoserɛ, na wɔ nwo anyɛ wɔ bɛtɛɛ.

¹¹Nwa yeɛ ye nwo yɛ suro bɔ esuro ye ɔ, bɔ yiti anga nahorɛ ɔ, bɔ yiti angaye me ɔ, bɔ yiti andwene me nwo ɔ? Aso nna konn yeɛ mayɛ fi tetetete ɔ, bɔ ɔnate sɔ ati enzuro me ɔ?

¹²Wɔ tenenee ne wɔ yɔleɛ nemɔ, ngɔye bɛ ali ngohyire, na so ngɔwa mvasoɛ biala ngɔma wɔ.

¹³Sɛ esu pena mmokalɛ a, ma wɔ mmosoen bɔ aboaboa bɛ noa nemɔ bɛpepɛ bele wɔ! Mvrama kopia bɛ mukoraa kɔhɔ, nwomeɛ kɔbɔ bɛ kɔhɔ. Nakoso sona bɔ ɔkɔɔbɔ ye nwo adwaa wɔ me nu ne de, ye yeɛ ɔkɔfa aseɛ ne kɔtena so ɔ, na me bokaa krongron ne kɔyɛ ye agyapadeɛ.

¹⁴Na bɛkɔhã kyɛ, “Ɛ́mɔyeye atee ne anu! Ɛ́mɔyeye atee ne anu! Ɛ́mɔsiesie atee ne! Sundidua bɔ ɔwɔ me maen atee nu ne, ɛ́mɔye béfi berɛ!”

¹⁵ Ofikyɛ Anwuro Anwuroniɛ ne, bɔ ɔwɔ berɛ afebɔɔ, bɔ ye dumaa ole Krongron ne, ɔnwa nyoo: “Anwuro ne nekaa krongron berɛ yeɛ nde ɔ, na sona bɔ wanya nnuhoɛ ne anwobrɛaseɛ ne, me ne ye yeɛ yɛte ɔ, amaa ɔnate so mama anwobrɛaseɛfoɛ bɛ sunzum anya ngoa, ná mama bɛ bɔ banya nnuhoɛ ne b’ahone anya ngoa.

¹⁶Mengɔbɔ kwaadu afebɔɔ, yeɛ m’ahone koso ngohu daa, anyɔ a, sona sunzum ne ye kra bɔ me yeɛ mabɔ ne, bɛkɔyɛ mmerɛ wɔ me nyunu.

¹⁷Ye adifuu amumuyɛɛ ti yeɛ m’ahone huli ɔ, mburale ye, mvale me nyunu mveale ye, na mvɛle yaa, nakoso ɔhɔle so lili makyebu fale ye bɔbɔ ye atee so.

¹⁸Manwu ye atee bɔ ɔnate so ɔ, na ngɔsa ye anwonyerɛ, ngɔyɛ ye taataa, ná makyekye ye wora, na ye mmenia bɔ bedi aworabɔlɛ ne, ngɔma bɛ noa dwirɛ kɔyɛ ayɛyelɛ.

¹⁹ Asomdwee, asomdwee hã bɔ ɔwɔ nziɛ nziɛ ne bɔ opingye ɔ, AWURADE noa dwirɛ ɛne; na ngɔsa ye anwonyerɛ.

²⁰Nakoso bɔnefoɛ de, bɛte kyɛ ɛpo bɔ mvrama obu fa so wuruwuru ɔ, ofikyɛ ɔngora ngyina dinn, na nu nzue pu asaa ne nnɛterɛ ba.

²¹Bɔnefoɛ ye so anu ngodwo ye, me Nyameɛ noa dwirɛ ɛne.”