Read Sehwi Yesaya 59 Bible Online

Yesaya 59 - Sehwi bible

Yesaya 59

¹Ɛ́mɔtie! AWURADE sa ɔtte tika bɔ ɔngora mbepɛ nnne ɔ, yeɛ ye so anu ɔnyɛ se bɔ ɔnde dwirɛ ɔ;

²na mmom ɛmɔ amumuyɛɛ yeɛ watete ɛmɔ ne ɛmɔ Nyameɛ b’afia ɔ, na ɛmɔ bɔne ne amaa waye ye nye wato buro wafea ɛmɔ, bɔ ɔnate so ɔndɛ ɛmɔ so ɔ.

³Ofikyɛ ɛmɔ sa ahã mogya agua, ɛmɔ sa mmɛseka afɔrefɔre amumuyɛɛ, ɛmɔ noa ahã nnakannaka dwirɛ, yeɛ ɛmɔ temverema apɛ ngondombo.

⁴Ebiala ngyina edwirɛ paa so ɔnzama obiɛngo, ebiala mmɔ nahorɛ kuro wɔ badwafoɛ nyunu; bɛto soen mbaen mbaen, na bɛnga nahorɛ, bɛnwonzɛ nzɛmmɔne, na bɛwo amumuyɛɛ.

⁵Bɛkɔ ɛkyenebene ngyiremvua so abu bɛbobɔ bɛ, bɛnwo ananze ndendaen, ebiala bɔ odi bɛ ngyiremvua ne, owu, na sɛ ebie gyerɛgyerɛ bie a, ɛbɔnaa fi nu fite.

⁶Bɛ ndendaen ne, ɔngɔyɛ ɛtena, yeɛ bɛ yɔleɛ ne koso, bɛfa begurɔ bɛ nwo a ɔnyɛ yee. Bɛ yɔleɛ te abusudeɛ, na atutureasɛm ali bɛ ti.

⁷ Bɛ gya tutu amirika kɔyɔ bɔne, na bɛngyɛ ye nwo ná bahã mogya bɔ odi be ɔ bagua; amumuyɛɛ nwo adwene ali bɛ ti, na nzɛmmɔne ne nningyein sɛkyelɛ yeɛ ɔwɔ b’atee nu ɔ.

⁸Asomdwee atee de, bɛnze, yeɛ pɛpɛɛpɛyɛlɛ nne b’atee nu; bama b’atee akondokondo, na sona biala bɔ ɔfa so ne, onnya asomdwee.

⁹Ye sɔ ne ati, yɛ ne pɛpɛɛpɛyɛlɛ afia atee awale, yeɛ tenenee koso yɛne ye abɔ nzahoɛ; yɛpena kanea, nakoso, nea, yɛte awosii nu, yɛ nye la hyireinn ate, nakoso yɛnate awosii kabii nu.

¹⁰Yɛfuafua yɛpena terɛ kyɛ anyesiniwaafoɛ, yɛfuafua kyɛ bɛ bɔ belle anyeɛ ɔ; yɛsoti eyia ketee kyɛ kɔngɔen ahɔ ɔ, na yɛte kyɛ awufoɛ wɔ anwoserɛfoɛ nu.

¹¹Yɛ mukoraa yɛpo kyɛ kwabrafo, yɛpene kyɛ mmubure, yɛpena pɛpɛɛpɛyɛlɛ, nakoso ebie nne berɛ, yeɛ yɛpena ngoalelɛ, nakoso ɔne yɛ afia atee wale.

¹²Yɛ mmeraatolɛ asone pee wɔ wɔ nyunu, na yɛ bɔne di adanzeɛ tia yɛ, ofikyɛ yɛ mmeraatolɛ la yɛ nyunu, na yɛ amumuyɛɛ koso, yɛse:

¹³Yato AWURADE mmeraa, yeɛ yapɛ ye ngondombo, yayakyi yɛ Nyameɛ si lilɛ, yɛ dwudwolɛ te nhyɛsoɛ ne ɛlɔenyɛlɛ, na yɛ ti anu nzusuleɛ bɔ ofite yɛ noa ne, ɔte nnakannaka.

¹⁴Yasumu ndɛen turoloo yahɔ nziɛ, yeɛ tenenee waagyina dedeede; ofikyɛ nahorɛ afi ase wɔ dwaaso, yeɛ pɛpɛɛpɛyɛlɛ onnya atee mma nu.

¹⁵Amba, nahorɛ ayie, na ebiala bɔ ɔtwe ye nwo fi bɔne nwo ne, odi amia wɔ mmenia sa nu. AWURADE nwuni ye, na wanyɛ ye fɛ kyɛ pɛpɛɛpɛyɛlɛ biala nne berɛ ɔ.

¹⁶ Onwuni kyɛ sona biala nne berɛ, na ɔyɛle ye nwanwa kyɛ kamafoɛ biala nne berɛ ɔ; yiti ye tumi maa onyane ngoalelɛ, na ye tenenee tiretirale ye nu.

¹⁷ Ofikyɛ ɔfale tenenee wurale kyɛ buralɛ bɔ ɔkata bɛ hue so ɔ, yeɛ ɔfale ngoalelɛ buralɛ kyerɛ wurale ye ti; ɔfale wereɛtɔlɛ ataadeɛ wurale, na ɔfale nungunɛhwenɛ herale kyɛ ɛtena.

¹⁸Okotua bɛ kerɛ kyɛbɔ bɛ yɔleɛ te ɔ, ye ahone kohu bɛ bɔ bekyi ye ɔ so, yeɛ okotua ye pɔfoɛ mɔ so kerɛ, yeɛ supɔ mɔ koso, okotua bɛ so kerɛ.

¹⁹ Yiti bekosuro AWURADE dumaa bekofi eyia atɔleɛ, yeɛ bekosuro ye animnyam bekofi eyia afiteleɛ, ofikyɛ ɔkɔwa kyɛ asue bɔ ɔsẽ wuruwuru bɔ AWURADE mvrama fa ye kɔ ɔ.

²⁰ Defoɛ ne kɔwa Sion, ɔkɔwa kɔma Yakob boso ama bɔ bɛtwe bɛ nwo befi mmeraatolɛ nwo ɔ, AWURADE noa dwirɛ ɛne.

²¹“Na me de, m’apam bɔ me ne bɛ yayɛ hɔ ɛne, AWURADE noa dwirɛ ɛne: Me sunzum bɔ ɔwɔ wɔ so, yeɛ me dwirɛ bɔ mafa matua wɔ noa ne, ɛngɔyakyi ye hanɛ, wɔ bosofoɛ ngɔyakyi ye hanɛ, yeɛ wɔ bosofoɛ bɛ bosofoɛ ngɔyakyi ye hanɛ, ofi ɛnɛ bɔ ɔkwaadwu afebɔɔ ɔ, AWURADE noa dwirɛ ɛne.”