Read Sehwi Yesaya 62 Bible Online

Yesaya 62 - Sehwi bible

Yesaya 62

¹Sion ti mengɔhã me noa mengɔto nu, yeɛ Yerusalem ti mengɔyɛ konn, kɔpem kyɛ ye bebualɛ kopukye kyɛ alehyeleɛ kanea, ɔne kyɛ ye ngoalelɛ kopukye kyɛ ɛtɛen bɔ ogye ɔ.

² Maen maen mɔ konwu wɔ bebualɛ ne, yeɛ ahemvo amukoraa bekonwu w’animnyam; bɛkɔfa dumaa foforɛ yeɛ bɛkɔfrɛ wɔ ɔ, bɔ ɔte dumaa bɔ okofi AWURADE noa nu kɔwa ɔ.

³Ɛkɔyɛ animnyam abotire wɔ AWURADE sa nu, ɔne ahemvo abotire wɔ wɔ Nyameɛ sa nu.

⁴Bɛngɔfrɛ wɔ “Bɔ bapo ye ɔ” ko, yeɛ bɛngɔfrɛ w’aseɛ ne “Kurofoen” ko; na mmom bɛkɔfrɛ wɔ Hefesiba,[19] yeɛ w’aseɛ ne koso bɛkɔfrɛ ye Bewela[20]; ofikyɛ ɛla AWURADE ahone nwo, na okogya w’aseɛ ne.

⁵Na kyɛbɔ aberandeɛ gya ababunu ne, sɔ ala yeɛ wɔ mma mmienzua mɔ bekogya wɔ ɔ; yeɛ kyɛbɔ atɔmvorɛ biaa odi ahurusi wɔ atɔmvorɛ braa nwo ne, sɔ ala yeɛ wɔ Nyameɛ koli ahurusi wɔ wɔ nwo ɔ.

⁶O Yerusalem, wɔ fasue nemɔ aso yeɛ mafa awɛmvoɛ magyinagyina ɔ; alehyeleɛ nu amukoraa ne alesaleɛ nu amukoraa bengomua bɛ noa. Ɛmɔ bɔ ɛmɔsu bɛfrɛ AWURADE ne, nnɛma ɛmɔyakyi bede bɛ nwome.

⁷Nnɛmɔma ode ye nwome kɔpem kyɛ okosa kɔkyekye Yerusalem, ɔne kyɛ ɔkɔfa ye kɔyɛ kuro bɔ bɛkamvo ye wɔ aseɛ so amukoraa ɔ.

⁸AWURADE afa ye sa famaa ne ye tumi asaa ne wata ndaen kyɛ, “Amba, mengɔfa w’aburoo mengɔma wɔ pɔfoɛ mɔ ma ɔngɔyɛ b’aleɛ ko, yeɛ amanvrafoɛ koso, bɛngɔno wɔ nzaa bɔ afɛ wɔ nwo ayɛ ne ko.

⁹Na mmom bɛ bɔ bɛboaboa ye noa ne, bɛ yeɛ bekoli ná baye AWURADE ayɛ ɔ; bɛ bɔ bɛboaboa bobe mmaa ne noa ne, bɛ yeɛ bɛkɔno ye wɔ me nekaa krongron n’aluo berɛ ɔ.”

¹⁰Ɛ́mɔworo, ɛ́mɔworo pambim nemɔ anu, ɛ́mɔsiesie atee ne bɛ́ma maen ne, ɛ́mɔye atimbire ne, ɛ́mɔye atimbire ne, ɛ́mɔtutu nyɔboɛ ne béfi so, ɛ́mɔfa frangaa bɛ́pena berɛ bɛ́ma maen maen mɔ.

¹¹Ɛ́mɔtie, AWURADE abɔ ye dawure maa waadwu aseɛ so nekaa biala. Ɔnwa nyoo, “Ɛmɔhã behyire Sion awa brasua ne kyɛ, ‘Tie, wɔ ngoalelɛ ne ɔ́ba, tie, ye ngonim akatuaa ne boka ye so, na ye akatuaa ne li ye nyunu.’”

¹²Na bɛkɔfrɛ bɛ: Maen krongron, Mmenia bɔ AWURADE apɔ bɛ wale bɛ ɔ, na wɔ de, bɛkɔfrɛ wɔ: Bɔ baapena ye si atee banwu ye ɔ, Kuro bɔ bambo ye ɔ.