Read Sehwi Lewitikɔso 1 Bible Online

Lewitikɔso 1 - Sehwi bible

Lewitikɔso 1

¹AWURADE frɛle Mose, na ɔhã hyirele ye fi ɛtena sua atenaleɛ ne anu kyɛ,

²“Ka kyire Yisraelfoɛ kyɛ, ‘Sɛ ebie fa naen afɔleɛ brɛ AWURADE a, maa ɔfa kaka bɔ ɔbaafa bɔ afɔleɛ ne ofi nandwie kure anaa mmoaen kure ne anu.

³“Sɛ ye afɔleɛ ne te naen yeralɛ afɔleɛ bɔ ofi nandwie kure ne anu a, odi kyɛ ɔfa nyii bɔ ollili nnɛen biala ɔ; odi kyɛ ɔbɔ afɔleɛ ne wɔ ɛtena sua atenaleɛ anoa nu berɛ, amaa AWURADE ale ye ato nu.

⁴Odi kyɛ ɔfa ye sa to naen yeralɛ afɔleɛ kaka ne ati afia, ná Nyameɛ kole kɔto nu maa ɔkɔfa kɔyɛ ye ti mbata.

⁵Na afei ohu nandwie nyii ne wɔ AWURADE nyunu, ná Aarɔn mma mmienzua nemɔ bɔ bɛ yeɛ bɛte asɔfo ne, bɛ́fa mogya ne, ná béhwie bégua afɔleɛ bokyea bɔ ogyi ɛtena sua atenaleɛ anoa nu berɛ ne anwo bɛ́bra béyia.

⁶Odi kyɛ obia naen yeralɛ afɔleɛ ne, ná ɔpepɛ nu ahuronzi ahuronzi.

⁷Ɔsɔfo Aarɔn mma mmienzua nemɔ, odi kyɛ bɛfa see begua afɔleɛ bokyea ne aso ná bɛhyehyɛ eyein begua see ne aso.

⁸Aarɔn mma mmienzua nemɔ bɔ bɛ yeɛ bɛte asɔfo ne, ɔsɛ kyɛ bɛhyehyɛ naen bɔ bapepɛ ye ahuronzi ahuronzi ne: mmakaa bɔ ɔsamo afɔleɛ bokyea see ne aso ne, odi kyɛ bɛfa kaka ne ti ɔne ye loe ne begua so.

⁹Nakoso ye kunu nningyein ne ye gya nemɔ de, odi kyɛ bɛfa nzue benwunzi bɛ nwo. Ɔsɛ kyɛ ɔsɔfo ne yera ye mukoraati wɔ see ne aso fa yɛ naen yeralɛ afɔleɛ; ɔte afɔleɛ bɔ bɛbɔ ye see so bɛma AWURADE ná ɔbo ye fona ɔ.

¹⁰“Akyɛdeɛ bɔ sona ne ɔbaafa bɔ naen yeralɛ afɔleɛ ne, sɛ ofi mmoaen kure anaa mbɔngye kure ne anu a, odi kyɛ ɔfa nyii bɔ ollili nnɛen biala ɔ.

¹¹Odi kyɛ oku ye wɔ afɔleɛ bokyea ne sorɔ wɔ AWURADE nyunu, ná Aarɔn mma mmienzua nemɔ bɔ bɛ yeɛ bɛte asɔfo ne, bɛ́fa ye mogya ne, ná béhwie bégua afɔleɛ bokyea ne nwo bɛ́bra béyia.

¹²Odi kyɛ sona ne pepɛ nu ahuronzi ahuronzi, ná ɔ́fa ye ti ne ye loe boka so. Eyein bɔ ogua afɔleɛ bokyea see ne aso ne, odi kyɛ ɔsɔfo ne hyehyɛ bɛ wɔ so.

¹³Nakoso ye kunu nningyein ne ye gya ne de, ɔ́fa nzue ónwunzi bɛ nwo. Odi kyɛ ɔsɔfo ne, ɔfa ye mukoraati ɔyera ye wɔ afɔleɛ bokyea ne aso. Ɔte naen yeralɛ afɔleɛ; ɔte afɔleɛ bɔ bɛbɔ ye see so bɛma AWURADE ná ɔbo ye fona ɔ.

¹⁴“Sɛ nnomaa yeɛ ɔfa bɔ naen yeralɛ afɔleɛ ma AWURADE a, ye de odi kyɛ ɔma ye afɔleɛ ne yɛ mmorɔma anaa aborɔnoma buruwa.

¹⁵Odi kyɛ ɔsɔfo ne ɔfa ye ba afɔleɛ bokyea ne anwo, ókisa ye kɔme ná ɔ́yera ye wɔ afɔleɛ bokyea ne aso, ná ohwi ye mogya ne ogua afɔleɛ bokyea ne ngyɛnu.

¹⁶Odi kyɛ ɔye ye komvi abo lolaa ne, ɔne bɔ ɔwɔ nu ne ná ógyi gua afɔleɛ bokyea ne ngyɛnu wɔ ye eyia afiteleɛ, nekaa bɔ bɛfa nzoen begua ne.

¹⁷Na odi kyɛ ɔsɔ ye ndaa nemɔ anu osua ye nu, bɔ koso ɔmma ye nu nde koraa ɔ. Afei ɔsɔfo ne ɔ́yera ye wɔ afɔleɛ bokyea ne aso wɔ eyein bɔ ogua see ne aso ne aso. Ɔte afɔleɛ bɔ bɛbɔ ye see so bɛma AWURADE ná ɔbo ye fona ɔ.