Read Sehwi Lewitikɔso 14 Bible Online

Lewitikɔso 14 - Sehwi bible

Lewitikɔso 14

² “Kyẽa bɔ bɛte kwataniɛ nwo ne, mmeraa bɔ ɔla berɛ ma ye ɛhe: Odi kyɛ bɛfa ye bɛbrɛ ɔsɔfo ne;

³na odi kyɛ ɔsɔfo ne fi asikyeleɛ ne anu ofite kɔneanea sɔ sona ne anwo. Na sɛ kwataniɛ ne nwo asa afi kwata anwonyerɛ ne anwo a,

⁴ye de odi kyɛ ɔsɔfo ne hyɛ maa ɔnate sona bɔ bɛbaate ye nwo ne ati bɛ́fa ɛhemɔ bɛ́ba: nnomaa nyɔ bɔ bɛte ngoa nu bɔ bɛ nwo te ɔ, bakaa bɔ bɛfrɛ ye sida, adaabene ne sufiɛ.

⁵Odi kyɛ ɔsɔfo ne hyɛ maa bɛfa nnomaa nemɔ nu ko besinze kukue bɔ mbombonzue gua nu ɔ so ná beku ye.

⁶Anomaa ko bɔ ɔtɛte ngoa nu ne, odi kyɛ ɔfa ye boka bakaa bɔ bɛfrɛ ye sida ne, adaabene ne, ɔne sufiɛ ne aso. Na anomaa bɔ bɛfale ye besinzele mbombonzue nu nzue so behuni ye ne, ye mogya ne, odi kyɛ ɔfa bɛ ne anomaa bɔ ɔte ngoa nu ne owura nu.

⁷Na sona bɔ bɛ́te ye nwo béfi kwata anwonyerɛ nwo ne, odi kyɛ ɔsɔfo ne ɔfa mogya ne pete ye nwo pɛen nzoo. Afei odi kyɛ ɔfa to dwaa kyɛ sona ne nwo ate, ná ɔyakyi anomaa bɔ ɔte ngoa nu ne maa ɔkɔ buro.

⁸Sona bɔ bate ye nwo ne, odi kyɛ ɔpo ye nningyein, ɔpoa ye nwo nwiaa amu, ɔfa nzue bia, na ye nwo kɔte. Ye si ye, odi kyɛ osa ba asikyeleɛ nu berɛ, nakoso ɔkɔtena ye ɛtena sua asi ɛlɛsoo.

⁹Na ye ɛlɛsoo ne aso, odi kyɛ ɔpoa ye nwo nwiaa amukoraa: ye ti nwiaa, ye kanza ne ye ndo nwiaa; ɔ́poa ye nwo nwiaa amukoraa. Ɔsɛ kyɛ ɔpo ye nwo nningyein, ná ɔ́fa nzue bia, na ye nwo kɔte.

¹⁰Ye ɛlɛbɔtwɛ ne aso, odi kyɛ ɔfa mmoaen nyii akrɔngrɔma nyɔ bɔ bellili nnɛen biala, boaen beleɛ akrɔngrɔma ko bɔ wali afoɛ ko bɔ ollili nnɛen biala ɔ, esam paa olonka nza bɔ bafa ngoo bafra bɔ bɛ́fa bɛ́bɔ aburoo afɔleɛ ɔ, ɔne ngoo towaa ko.

¹¹Na ɔsɔfo bɔ ɔte sɔ sona ne anwo ne, ɔkɔfa sɔ sona ne ɔne sɔ nningyein nemɔ kɔhɔ AWURADE nyunu wɔ ɛtena sua atenaleɛ ne anoa nu berɛ.

¹²Odi kyɛ ɔsɔfo ne fa mmoaen akrɔngrɔma nyii nemɔ anu ko ɔboka ngoo towaa ko so, ná ɔfa bɔ bɔne nwo afɔleɛ. Odi kyɛ ɔpagya so fa bɔ ɛnwahanɛ afɔleɛ wɔ AWURADE nyunu.

¹³Odi kyɛ oku boaen akrɔngrɔma ne wɔ nekaa krongron berɛ, nekaa bɔ beku bɔne nwo afɔleɛ ɔne naen yeralɛ afɔleɛ ngaka ne, ofikyɛ foɛlilɛ afɔleɛ te kyɛ bɔne nwo afɔleɛ ne ala; ɔte ɔsɔfo ne deɛ na ɔte krongron paa.

¹⁴Ɔsɛ kyɛ ɔsɔfo ne ɔfa foɛlilɛ afɔleɛ mogya ne bie, ná ɔfa kekã sona bɔ bɛbaate ye nwo ne ye so famaa tɛndiaa ne, ye sa kokotire famaa ɔne ye gya kokotire famaa.

¹⁵Odi kyɛ ɔsɔfo ne fa ngoo towaa ne, ná ohwie ngoo ne bie gua ye bɔbɔ ye sa bɛen nu,

¹⁶ná ɔ́fa ye sa mmɛseka famaa ne bɔ ngoo bɔ ɔwɔ ye sa bɛen nu ne anu, ná ɔfa ye sa mmɛseka pete ngoo ne bie pɛen nzoo, AWURADE nyunu.

¹⁷Ngoo bɔ ɔkɔha ɔsɔfo ne sa nu ne, odi kyɛ ɔfa bie kekã sona bɔ bɛbaate ye nwo ne ye so famaa tɛndiaa ne, ye sa kokotire famaa, ɔne ye gya kokotire famaa, wɔ foɛlilɛ afɔleɛ mogya ne aso.

¹⁸Ngoo bɔ ɔkɔha ɔsɔfo ne sa nu ne, odi kyɛ ohwie gua sona bɔ bɛwɔ so bɛte ye nwo ne ye ti so. Afei ɔsɔfo ne ɔ́yɛ mbata ɔ́ma ye wɔ AWURADE nyunu.

¹⁹Ɔsɛ kyɛ ɔsɔfo ne bɔ bɔne nwo afɔleɛ fa yɛ mbata ma sona bɔ ye nwo agua fiɛ ne, ná ye nwo te. Na ɛhe asi ne, odi kyɛ oku naen yeralɛ afɔleɛ kaka ne,

²⁰ná ɔbɔ naen yeralɛ afɔleɛ, ɔne aburoo afɔleɛ wɔ afɔleɛ bokyea ne aso. Ɔnate ɛhe aso, ɔsɔfo ne ɔ́pata ma ye ma ye nwo te.

²¹“Nakoso sɛ sona ne te ehianiɛ ná ye nwo ngɔso so a, ye de odi kyɛ ɔfa boaen nyii akrɔngrɔma ko bayɛ foɛlilɛ afɔleɛ bɔ bɛkɔnwanha ye bɛkɔyɛ mbata bɛkɔma ye ɔ. Nningyein hemɔ koso boka so: esam paa bɔ bafa ngoo bafra ɔ olonka ko bɔ bɛfa bɛbɔ aburoo afɔleɛ ɔ, ngoo towaa ko;

²²mmorɔma nyɔ anaa mmorɔnoma buruwa nyɔ bɔ ye nwo kɔsõ so ɔ: ko te bɔne nwo afɔleɛ yeɛ ko ne koso te naen yeralɛ afɔleɛ.

²³Ye ɛlɛbɔtwɛ ne aso, odi kyɛ ɔfa bɛ brɛ ɔsɔfo ne ma ɔfa te ye nwo wɔ ɛtena sua atenaleɛ ne anoa nu berɛ, AWURADE nyunu.

²⁴Odi kyɛ ɔsɔfo ne ɔfa foɛlilɛ boaen akrɔngrɔma ne, ɔne ngoo towaa ko, ná ɔpagya bɛ fa bɔ ɛnwahanɛ afɔleɛ wɔ AWURADE nyunu.

²⁵Ɔsɛ kyɛ ɔsɔfo ne oku foɛlilɛ afɔleɛ boaen ne, ná ɔfa foɛlilɛ afɔleɛ mogya ne bie fa kekã sona bɔ bɛwɔ so bɛte ye nwo ne ye so famaa tɛndiaa ne, ye sa kokotire famaa ne ɔne ye gya kokotire famaa.

²⁶Ɔsɛ kyɛ ɔsɔfo ne hwie ngoo ne bie gua ye bɔbɔ ye sa bɛen nu;

²⁷ná ɔ́fa ye sa mmɛseka famaa pete ngoo bɔ ɔwɔ ye sa bɛen anu ne bie ne pɛen nzoo, AWURADE nyunu.

²⁸Odi kyɛ ɔsɔfo ne ɔfa ngoo bɔ ɔwɔ ye sa nu ne bie kekã sona bɔ bɛwɔ so bɛte ye nwo ne ye so famaa tɛndiaa ne, ye sa kokotire famaa, ɔne ye gya kokotire famaa wɔ nekaa bɔ ɔfale foɛlilɛ afɔleɛ mogya ɔkekane ne.

²⁹Ngoo bɔ ɔkɔha ɔsɔfo ne sa nu ne, odi kyɛ ohwie gua sona bɔ bɛwɔ so bɛte ye nwo ne ti so, ná ɔfa pata ma ye wɔ AWURADE nyunu.

³⁰Mmorɔma anaa mmorɔnoma buruwa bɔ sona ne nwo kɔsõ so ne, ɔsɛ kyɛ ɔsɔfo ne fa bɔ afɔleɛ.

³¹Nnomaa ne bɔ sona ne nwo kɔsõ so ne, ko te bɔne nwo afɔleɛ yeɛ ko koso te naen yeralɛ afɔleɛ; sona bɔ bɛwɔ so bɛte ye nwo ne, odi kyɛ ɔfa aburoo afɔleɛ boka so, ná ɔsɔfo ne ɔpata ma ye wɔ AWURADE nyunu.

³²Sona bɔ kwata anwonyerɛ kɔyɛ ye nakoso ye nwo ngɔso nningyein bɔ bɛfa bɛbɔ afɔleɛ bɛpete ye nwo ne, sɔ mmeraa he yeɛ ɔla berɛ ma ye ɔ.”

³³AWURADE sele Mose ne Aarɔn kyɛ,

³⁴“Sɛ ɛmɔbadwu Kanaan aseɛ bɔ méfa méma ɛmɔ maa ɔyɛ ɛmɔ deɛ ne aso, ná sɛ mema kwata anwonyerɛ pe awuro bie anu wɔ aseɛ bɔ ɛmɔ sa baahã ye ne aso a,

³⁵odi kyɛ awuro ne mene kɔka kyire ɔsɔfo ne kyɛ, ‘Ɔyɛ me kyɛ anwonyerɛ bie ape m’awuro dɔ.’

³⁶Na ɔsɔfo ne kɔhyɛ maa bɛkɔyeye awuro ne anu nningyein amukoraa koraka ne ɔsɔfo ne ahɔ wanea anwonyerɛ ne. Sɛ banyɔ sɔ a, awuro berɛ nningyein amukoraa nwo kogua fiɛ. Ye si ye, odi kyɛ ɔsɔfo ne kɔneanea awuro ne anu.

³⁷Odi kyɛ ɔkɔnea; sɛ anwonyerɛ ne wakekã awuro ne terɛ ne anwo ma berɛ ayɛ kyɛ apopobibire anaa kɔkorɛ, ná sɛ osoma kyɛ wadidi wahɔ terɛ ne anu a,

³⁸ye de odi kyɛ ɔsɔfo fa anoa nu berɛ fite, ná ɔto awuro ne anu ɛlɛsoo.

³⁹Ye ɛlɛsoo ne aso, odi kyɛ ɔsɔfo sa kɔneanea berɛ; sɛ anwonyerɛ ne atrɛ wɔ awuro ne ye trɛ ne anwo a,

⁴⁰odi kyɛ ɔsɔfo ne hyɛ kyɛ, nyɔboɛ mɔ bɔ anwonyerɛ ne ayɛ bɛ nwo ne, bɛ́yeye béfi sua ne anu ná beegyi bégua kuro ne asi dɔ nekaa bie bɔ berɛ nde ɔ.

⁴¹Odi kyɛ ɔmaa bɛwɔngye awuro ne akunu amukoraa. Ye kunu bɔ bɛkɔwɔngye ne, ɔsɛ kyɛ bekogyi begua kuro ne asi dɔ nekaa bie bɔ berɛ ɔnde ɔ.

⁴²Odi kyɛ bɛsesa nyɔboɛ foforɛ bewura nyɔboɛ ɛhene mɔ boso, ná bɛ́fa ɛfaa foforɛ bɛma awuro ne anwo.

⁴³“Sɛ bɛyeye nyɔboɛ ne, ná bɛwɔngyewɔngye terɛ ne anwo, ná bɛma awuro ne anwo beyie, ná ye si ye anwonyerɛ ne sa ba awuro berɛ a,

⁴⁴odi kyɛ ɔsɔfo ne kɔnea awuro berɛ. Na sɛ anwonyerɛ ne atrɛ wɔ awuro berɛ a, ye de né kwata anwonyerɛ bɔ ɔtrɛ yeɛ wape awuro berɛ ɔ, awuro ne nwo nde.

⁴⁵Odi kyɛ ɔsɔfo ne maa bedwiri awuro ne begua ase; ná ɔmaa bɛsesa nu nyɔboɛ, mmakaa ne nnɛterɛ amukoraa bekogyi begua kuro ne asi dɔ nekaa bɔ berɛ ɔnde ɔ.

⁴⁶Mmerɛ bɔ bato awuro ne anu ne, ebiala bɔ ɔkɔhɔ nu ne, ye nwo kogua fiɛ maa okoodwu nɔsoa.

⁴⁷Ebiala bɔ ɔkɔla sɔ awuro ne anu ne, odi kyɛ ɔpo ye nwo nningyein, na ebiala bɔ okodidi awuro berɛ ne, odi kyɛ ɔpo ye nwo nningyein.

⁴⁸“Nakoso sɛ bɛma awuro ne anwo beyie, ná ye si ye ɔsɔfo ne banea ná anwonyerɛ ne wandrɛ wɔ awuro berɛ a, odi kyɛ ɔsɔfo ne fa to dwaa kyɛ awuro ne ye nwo te; anwonyerɛ ne ahɔ.

⁴⁹Sɛ bɛte awuro ne anwo a, odi kyɛ ɔfa nnomaa nyɔ boka bakaa bɔ bɛfrɛ ye sida ne, adaabene ne sufiɛ so.

⁵⁰Ɔsɛ kyɛ ɔfa nnomaa nemɔ nu ko osinze kukue bɔ mbombonzue gua nu ɔ so, ná oku ye.

⁵¹Odi kyɛ ɔfa bakaa bɔ bɛfrɛ ye sida ne, sufiɛ ne, adaabene ne ɔne anomaa bɔ ɔtɛte ngoa nu ne, ná ɔ́fa bɛ wura anomaa bɔ bahu ye ne mogya ne anu, ɔne mbombonzue ne anu, ná ɔfa ɔpete awuro berɛ pɛen nzoo.

⁵²Atee he aso yeɛ ɔsɔfo ne kɔfa anomaa mogya ne, mbombonzue ne, anomaa bɔ ɔtɛte ase ne, bakaa bɔ bɛfrɛ ye sida ne, sufiɛ ne ɔne adaabene ne kɔte awuro ne anwo ɔ.

⁵³Odi kyɛ ɔyakyi anomaa bɔ ɔtɛte ngoa nu ne wɔ kuro ne tiwaa maa ɔkɔ buro. Ɔnate ɛhe aso, ɔkɔpata kɔma awuro ne, na awuro ne anwo kɔte.

⁵⁴Mmeraa bɔ ɔla berɛ ma kwata anwonyerɛ biala ɛhe: asee,

⁵⁵kwata bɔ ɔwɔ ataadeɛ nu, anaa awuro nu,

⁵⁶edoee anaa yira anaa ndotɔndotɔ.

⁵⁷Ɛhemɔ yeɛ ɔkɔmaa bekonwu kyɛ nikyee bie nwo te anaakyɛ ye nwo nde ɔ. Kwata anwonyerɛ mɔ nwo mmeraa ɛhe.