Read Sehwi Lewitikɔso 15 Bible Online

Lewitikɔso 15 - Sehwi bible

Lewitikɔso 15

¹Na AWURADE sele Mose ne Aarɔn kyɛ,

²“Ɛ́mɔhã behyire Yisrael ama kyɛ, ‘Sɛ ebie bienzua fiti a, sɔ nzue ne ma ye nwo gua fiɛ.

³Nzue bɔ opukye ma ye nwo gua fiɛ ne, ye nwo mmeraa ɛhe: sɛ ye nwo nzue ne ɔtɛsẽ oo, anaakyɛ ye bienzua nu atee tua oo, ɔte nikyee bɔ ɔma ye nwo gua fiɛ ɔ.

⁴Na bɛen biala bɔ sona bɔ ye bienzua fiti ne kɔla so ne, ye nwo kogua fiɛ; yeɛ nikyee biala bɔ ɔkɔtena so ne, ye nwo kogua fiɛ.

⁵Na ebiala bɔ ye nwo kɔha ye bɛen ne, odi kyɛ ɔpo ye nwo nningyein, ná ɔ́fa nzue bia, na ɔkɔyɛ sona bɔ ye nwo ɔnde ɔ maa okoodwu nɔsoa.

⁶Nikyee biala bɔ sona bɔ ye bienzua fiti watena so ne, sona biala bɔ ɔkɔtena so ne, odi kyɛ ɔpo ye nwo nningyein, ná ɔ́fa nzue obia, na ɔkɔyɛ sona bɔ ye nwo nde ɔ maa okoodwu nɔsoa.

⁷Na ebiala bɔ ɔkɔfa ye nwo kɔha sona bɔ ye bienzua fiti ne, odi kyɛ ɔpo ye nwo nningyein, ná ɔ́fa nzue bia, na ɔkɔyɛ sona bɔ ye nwo nde ɔ maa okoodwu nɔsoa.

⁸Sɛ sona bɔ ye bienzua fiti ne, ɔfe nwɔserɛ gua sona bɔ ye nwo te nwo a, odi kyɛ sɔ sona ne po ye nwo nningyein, ná ɔ́fa nzue bia, na ɔkɔyɛ sona bɔ ye nwo nde ɔ maa okoodwu nɔsoa.

⁹Sona bɔ ye bienzua fiti ne, afupɔngɔ so atɛ biala bɔ ɔkɔtena so ne, ɔkɔyɛ nikyee bɔ ye nwo nde ɔ.

¹⁰Ebiala bɔ ye nwo kɔha nikyee biala bɔ watena so ne, ɔkɔyɛ sona bɔ ye nwo nde ɔ maa okoodwu nɔsoa; na ebiala bɔ ɔkɔsoa sɔ nikyee ne odi kyɛ ɔpo ye nwo nningyein ná ɔ́fa nzue bia, na ɔkɔyɛ sona bɔ ye nwo nde ɔ maa okoodwu nɔsoa.

¹¹Ebiala bɔ ye bienzua fiti ne, sɛ wamva nzue wanwunzi ye sa koraka, ná ɔfa ye nwo ka ebie a, odi kyɛ sɔ sona ne po ye nwo nningyein ná ɔ́fa nzue bia, na ɔkɔyɛ sona bɔ ye nwo nde ɔ maa okoodwu nɔsoa.

¹²Kukue biala, sɛ sona bɔ ye bienzua fiti nwo ka ye a, odi kyɛ bɛbɔ ye; yeɛ sɛ ye nwo ka alaka biala bɔ bafa bakaa bayɔ a, odi kyɛ bɛfa nzue benwunzi ye nwo.

¹³“Sona bɔ ye bienzua fiti ne, sɛ ye nwo sa a, odi kyɛ otu ɛlɛsoo sie berɛ fa pete ye nwo. Afei odi kyɛ ɔpo ye nwo nningyein ná ɔ́fa mbombonzue gyengɔɔ obia, na ye nwo kɔte.

¹⁴Ye ɛlɛbɔtwɛ ne aso, odi kyɛ ɔfa mmorɔma nyɔ anaa mmorɔnoma buruwa nyɔ ɔba AWURADE nyunu wɔ ɛtena sua atenaleɛ anoa nu berɛ, ná ɔ́fa bɛ ma ɔsɔfo ne.

¹⁵Na afei odi kyɛ ɔsɔfo ne fa nnomaa nemɔ ko bɔ bɔne nwo afɔleɛ ná ɔ́fa ko koso ɔbɔ naen yeralɛ afɔleɛ. Ɔsɔfo ne kogyina sona ne gya nu kɔpata kɔma ye wɔ Nyameɛ nyunu, ɔnate ye bienzua bɔ né ofiti ne ati.

¹⁶“Sɛ bienzua bie nwo nzue ba a, odi kyɛ ɔfa nzue bia ye nwo amukoraati, na ɔkɔyɛ sona bɔ ye nwo nde ɔ maa okoodwu nɔsoa.

¹⁷Nikyee biala bɔ bafa ɛtena anaa nwomaa bapa ne, sɛ ye nwo nzue ne bie gua so a, ɔsɛ kyɛ bɛfa nzue bɛpo, na ɔkɔyɛ nikyee bɔ ye nwo nde ɔ maa okoodwu nɔsoa.

¹⁸Sɛ bienzua bie ne brasua bɛda, ná ye nwo nzue ba a, ɔsɛ kyɛ bɛ munyɔ bɛfa nzue bebia, na bɛ nwo kogua fiɛ maa okoodwu nɔsoa.

¹⁹“Sɛ brasua bu ye sa a, ɔkɔyɛ sona bɔ ye nwo nde ɔ ɛlɛsoo, na ebiala bɔ ye nwo kɔha sɔ sona nen, ɔkɔyɛ sona bɔ ye nwo nde ɔ maa okoodwu nɔsoa.

²⁰Nikyee biala bɔ sɔ brasua ne kɔla so wɔ mmerɛ bɔ wabu ye sa ne, ɔkɔyɛ nikyee bɔ ye nwo nde ɔ; yeɛ nikyee biala bɔ ɔkɔtena so ne koso, ɔkɔyɛ nikyee bɔ ye nwo nde ɔ.

²¹Sɔ brasua ne, ebiala bɔ ye nwo kɔha ye bɛen ne, odi kyɛ ɔpo ye nwo nningyein, ná ɔ́fa nzue bia, na ɔkɔyɛ sona bɔ ye nwo nde ɔ maa okoodwu nɔsoa.

²²Ebiala bɔ ye nwo kɔha nikyee biala bɔ sɔ brasua ne kɔtena so ne, odi kyɛ ɔpo ye nwo nningyein, ná ɔ́fa nzue bia, na ɔkɔyɛ sona bɔ ye nwo nde ɔ maa okoodwu nɔsoa.

²³Sɛ bɛen oo, anaa nikyee biala bɔ ɔkɔtena so oo, sɛ ebie nwo ka ye a, ɔkɔyɛ sona bɔ ye nwo nde ɔ maa okoodwu nɔsoa.

²⁴ Sɛ bienzua bie ne ye bɛda, na nikyee bɔ wama ye nwo agua fiɛ ne bie ka bienzua ne a, bienzua ne nwo kogua fiɛ ɛlɛsoo, na bɛen biala bɔ sɔ bienzua ne kɔla so ne nwo kogua fiɛ.

²⁵“Sɛ brasua nwu mogya nyunu ngyẽa pee wɔ aberɛ bɔ nna ye sabulɛ mmerɛ ahɔ ɔ a, anaa obu ye sa maa ɔtra kyẽa bɔ ɔsɛ kyɛ ofi ne a, mmerɛ bɔ onwu mogya nyunu ne amukoraati, ɔkɔhɔ so kɔyɛ sona bɔ ye nwo nde ɔ, kyɛ mmerɛ bɔ ɔfa bu ye sa ne ala, na ɔkɔyɛ sona bɔ ye nwo nde ɔ.

²⁶Mmerɛ bɔ ɔtɛnwu mogya nyunu ne amukoraati, bɛen biala bɔ ɔkɔla so ne, bekobu bɛen ne kyɛ ye nwo nde, kyɛ ye bɛen bɔ ɔkɔla so mmerɛ bɔ wabu ye sa ne ala; na nikyee biala bɔ ɔkɔtena so ne, ye nwo kogua fiɛ, kyɛ mmerɛ bɔ wabu ye sa ne ala.

²⁷Ebiala bɔ ɔkɔfa ye nwo kɔha sɔ nningyein nemɔ nen, ye nwo kogua fiɛ; odi kyɛ ɔpo ye nwo nningyein, ná ɔfa nzue bia, na ɔkɔyɛ sona bɔ ye nwo nde ɔ maa okoodwu nɔsoa.

²⁸Nakoso sɛ mogya bɔ wanwu ye nyunu ne pɛ a, odi kyɛ ɔma ɛlɛsoo pɛ nu, na ye si ye ɔkɔyɛ sona bɔ ye nwo te ɔ.

²⁹Ye ɛlɛbɔtwɛ ne aso, odi kyɛ braa ne fa mmubure nyɔ anaa mmorɔnoma buruwa nyɔ brɛ ɔsɔfo ne wɔ ɛtena sua atenaleɛ anoa nu berɛ.

³⁰Odi kyɛ ɔsɔfo ne fa ko bɔ bɔne nwo afɔleɛ, ná ɔfa ko koso bɔ naen yeralɛ afɔleɛ; na ɔsɔfo ne kɔpata kɔma ye wɔ AWURADE nyunu, ɔnate mogya bɔ onwuni ye nyunu maa ye nwo guale fiɛ ne ati.

³¹“Sɔa yeɛ odi kyɛ ɛmɔyɔ bɛfa bɛte Yisraelfoɛ nwo befi nningyein bɔ ogua bɛ nwo fiɛ nwo ɔ, amaa bamva efiɛ banga me ɛtena sua ne, ná ɔnate bɛ nwo bɔ wagua fiɛ ne ati banwuwu.”

³²Mmeraa he yeɛ ɔla berɛ ma bienzua biala bɔ ye bienzua kofiti, anaa bienzua biala bɔ ye nwo nzue kɔwa maa ye nwo kogua fiɛ ɔ,

³³ɔne brasua biala bɔ okobu ye sa, bienzua anaa brasua biala bɔ ye nwo nzue kogua, yeɛ bienzua biala bɔ ɔne brasua bɔ ye nwo nde kɔla ɔ.