Read Sehwi Lewitikɔso 16 Bible Online

Lewitikɔso 16 - Sehwi bible

Lewitikɔso 16

¹Aarɔn mma mmienzua nyɔ hɔle AWURADE nyunu ná bewuli ne, ye si ye, AWURADE ne Mose dwudwole.

² Na AWURADE sele Mose kyɛ, “Ka kyire eliɛma Aarɔn kyɛ, nekaa krongron bɔ ɔwɔ mbɛmuɛ tena ne asi dɔ ne, mbata bia bɔ ɔwɔ apam alaka ne aso ne, nnɛmaa ɔba ye nyunu mmerɛ biala bɔ okuro ɔ. Sɛ ɔyɔ sɔ a okowu, ofikyɛ meye me nwo ali mekyire wɔ munungum bɔ ɔwɔ mbata bia ne aso ne anu.

³Sɛ Aarɔn ɔba nekaa krongron ne anu a, bɔ odi kyɛ ɔyɔ ɛhe: odi kyɛ ɔfa nandwie nyii akrɔngrɔma ko bɔ ɔfa bɔ bɔne nwo afɔleɛ ɔ ɔne boaen nyii bɔ ɔfa bɔ naen yeralɛ afɔleɛ.

⁴Odi kyɛ owura nwera ataadeɛ tendenn krongron ne, ná owura nwera pieto ɔfa kata ye nwo, ná ɔbɔ nwera abɔsoɛ ne, ná ɔbɔ nwera abotire ne; ɛhemɔ te ndaadeɛ krongron. Ɔsɛ kyɛ ɔfa nzue bia koraka né wawura ndaadeɛ nemɔ.

⁵Odi kyɛ ode mbɔngye nyii nyɔ fi Yisrael maen berɛ bɔ ɔfa bɔ bɔne nwo afɔleɛ ɔ, ɔne boaen nyii ko bɔ ɔfa bɔ naen yeralɛ afɔleɛ ɔ.

⁶“Odi kyɛ Aarɔn fa nandwie nyii ne bɔ bɔne nwo afɔleɛ ma ye nwo, ná ɔpata ma ye bɔbɔ ye nwo, ɔne ye awuro ama.

⁷Ɔsɛ kyɛ ɔfa mbɔngye nyii nyɔ nemɔ ba AWURADE nyunu wɔ ɛtena sua atenaleɛ anoa nu berɛ.

⁸Odi kyɛ Aarɔn to mbɔngye nyɔ nemɔ aso serewa; ko te AWURADE deɛ, yeɛ ko koso te Asasɛl[3] deɛ.

⁹Odi kyɛ Aarɔn fa abɔngye bɔ serewa ne yele ye mane AWURADE ne, ná ɔfa bɔ bɔne nwo afɔleɛ;

¹⁰nakoso abɔngye ko bɔ serewa ne yele ye mane Asasɛl ne de, odi kyɛ bɛfa ye bɔ ɔte ngoa nu ɔ bɛba AWURADE nyunu bɛbayɛ mbata, ná bɛkɔɔyakyi ye ɛserɛ so bɛma Asasɛl.

¹¹“Odi kyɛ Aarɔn fa nandwie nyii ne ɔbɔ bɔne nwo afɔleɛ ma ye nwo, ná ɔpata ma ye nwo ne ye awuro ama. Ɔsɛ kyɛ oku nandwie nyii ne ná ɔfa bɔ bɔne nwo afɔleɛ ma ye nwo.

¹²Na odi kyɛ ɔfa see kulie bɔ afɔleɛ bokyea ne anu see gonn ayi ye tɛkyɛ ɔ ɔba AWURADE nyunu, ɔne ɛyɛɛ fona muhumuhu bɛ sa bum nyɔ, ná ɔ́fa bra mbɛmuɛ tena ne asi.

¹³Afei odi kyɛ ɔfa ɛyɛɛ ne ogua see ne aso wɔ AWURADE nyunu, amaa mbata bia bɔ ɔwɔ Adanzeɛ ne aso ne, ɛyɛɛ nwosina ne akata so, ná wanwu.

¹⁴Odi kyɛ ɔfa nandwie nyii mogya ne bie, ná ɔfa ye sa mmɛseka bɔ nu fa pete mbata bia ne anyunu; ɔ́fa ye sa mmɛseka ne pete mogya ne pɛen nzoo.

¹⁵“Odi kyɛ oku maen bɔne nwo afɔleɛ abɔngye ne, ná ɔ́fa ye mogya ne ɔba mbɛmuɛ ɛtena ne asi. Kyɛbɔ ɔfale nandwie nyii mogya ne yɔle ne, sɔ ala yeɛ odi kyɛ ɔfa abɔngye mogya ne ɔyɔ ɔ; ɔsɛ kyɛ ɔfa mogya ne pete mbata bia ne aso ne ye nyunu.

¹⁶Sɔa yeɛ odi kyɛ ɔyɔ mbata ma nekaa krongron ne ɔ, ɔnate Yisrael ama bɛ nwo bɔ wagua fiɛ, bɛ mmeraatolɛ, ɔne bɛ bɔne amukoraa ti. Sɔ ala yeɛ odi kyɛ ɔyɔ ma ɛtena sua atenaleɛ bɔ ɔwɔ mmenia bɔ bɛ nwo nde ne b’afia ne ɔ.

¹⁷Ofi mmerɛ bɔ ɔsɔfo ne kowura ɛtena sua atenaleɛ ne anu kyɛ ɔkwaayɛ mbata wɔ nekaa krongron ne anu ne, kɔpem kyɛ ɔkɔpata kɔma ye bɔbɔ ye nwo, ye awuro ama ɔne Yisrael maen ne amukoraati, ná okofite ne, onni kyɛ ebiala kɔ ɛtena sua atenaleɛ ne anu.

¹⁸Na odi kyɛ ofite ɔkɔ afɔleɛ bokyea bɔ ɔwɔ AWURADE nyunu ne anwo, ná ɔpata ma afɔleɛ bokyea ne; odi kyɛ ɔfa nandwie nyii mogya ne bie, ɔne abɔngye mogya ne bie kekã afɔleɛ bokyea mmɛen ne anu biala nwo bra yia.

¹⁹Odi kyɛ ɔfa ye sa mmɛseka pete mogya ne bie gua so pɛen nzoo, ná ɔte ye nwo ɔyɛ ye krongron fi Yisraelfoɛ nwo bɔ wagua fiɛ ne anwo.

²⁰“Sɛ ɔsɔfo ne yɛ mbata ma nekaa krongron ne, ɛtena sua atenaleɛ ne, ɔne afɔleɛ bokyea ne yie a, odi kyɛ ɔfa abɔngye bɔ ɔte ngoa nu ne ɔba.

²¹Afei odi kyɛ Aarɔn fa ye sa munyɔ gua abɔngye bɔ ɔte ngoa nu ne ye ti afia, ná ɔka Yisraelfoɛ amumuyɛɛ amukoraa, bɛ mmeraatolɛ amukoraa ɔne bɛ bɔne amukoraa gua abɔngye ne aso, ná ɔprapra ye mukoraati gua ye so. Odi kyɛ ɔyakyi abɔngye ne ma bienzua bie bɔ bafa sɔ adwuma ne bawura ye sa maa berɛ ne ala ɔkɔyakyi kaka ne eburo maa ɔkɔ.

²²Yisraelfoɛ bɛ bɔne amukoraa, abɔngye ne kɔsoa kɔhɔ aseɛ bɔ kuro sona biala ɔtte so ɔ so; na odi kyɛ ɔkɔyakyi abɔngye ne wɔ eburo dɔ.

²³“Odi kyɛ Aarɔn wura ɛtena sua atenaleɛ ne anu, ná opuro nwera ataadeɛ bɔ owurale koraka yeɛ ɔkɔ nekaa krongron ne, ná ɔyakyi bɛ berɛ.

²⁴Na odi kyɛ ɔfa nzue obia wɔ nekaa bɔ ɔte krongron ɔ, ná owura ye ataadeɛ ne, ná osa ofite babɔ ye naen yeralɛ afɔleɛ, ɔne maen naen yeralɛ afɔleɛ ne, ná ɔpata ma ye bɔbɔ ye nwo ɔne maen ne.

²⁵Ɛloe bɔ ɔwɔ bɔne nwo afɔleɛ ne anu ne, odi kyɛ ɔsɔfo ne yera ye wɔ afɔleɛ bokyea ne aso.

²⁶Sona bɔ ɔyɛ a, ɔkɔyakyi abɔngye ne ma Asasɛl ne, odi kyɛ ɔpo ye ndaadeɛ ná ɔfa nzue bia koraka né wahora wawa asikyeleɛ ne anu.

²⁷ Bɔne nwo afɔleɛ nandwie nyii ne, ɔne bɔne nwo afɔleɛ abɔngye ne bɔ bɛfale bɛ mogya bɛɛpatale wɔ nekaa krongron ne anu ne, odi kyɛ bɛfa bɛ bɛkɔ asikyeleɛ ne asi; na bɛ nwomaa, bɛ naen ɔne bɛ fure ne, odi kyɛ bɛfa see bɛyera bɛ.

²⁸Sona bɔ ɔkɔyera bɛ ne, odi kyɛ ɔpo ye ndaadeɛ ná ɔ́fa nzue bia koraka né wahora wawa asikyeleɛ ne anu.

²⁹ “Odi kyɛ ɛhe yɛ ahyɛdeɛ ma ɛmɔ: bosome nzoo ne, ye kyẽa bɔ ɔtɔ so buru ne, odi kyɛ ɛmɔkye ɛhɔen; kuromani oo, ɛwɔfoɛ bɔ waatena ɛmɔ nu oo, nnɛma ebiala yɔ adwuma biala.

³⁰Ofikyɛ sɔ kyẽa ne yeɛ bɛpata bɛma ɛmɔ, ná bɛfa bɛte ɛmɔ nwo befi ɛmɔ bɔne amukoraa nwo, ma ɛmɔ nwo te wɔ AWURADE nyunu ɔ.

³¹Ɔte afofikyẽa bɔ odi mu paa ma ɛmɔ ɔ. Odi kyɛ ɛmɔkye ɛhɔen; ɔte ahyɛdeɛ afebɔɔ.

³²Ɔsɔfo bɔ bapopa ye ngoo ná bate ye nwo maa waasi ye baba gya nu wayɛ ɔsɔfo ne, ye yeɛ ɔkɔyɛ mbata ne ɔ; odi kyɛ owura nwera ataadeɛ krongron ne.

³³Odi kyɛ ɔpata ma nekaa krongron ne, ɛtena sua atenaleɛ ne, ɔne afɔleɛ bokyea ne; ná afei ɔ́pata ɔ́ma asɔfo nemɔ, ɔne maen ne amukoraa.

³⁴Ɛhe te ahyɛdeɛ afebɔɔ ma ɛmɔ: afoɛ biala odi kyɛ ɛmɔyɛ Yisraelfoɛ bɛ bɔne amukoraa nwo mbata ko. Na Mose yɔle kyɛbɔ AWURADE hyɛle ye ne.