Read Sehwi Lewitikɔso 17 Bible Online

Lewitikɔso 17 - Sehwi bible

Lewitikɔso 17

¹Na AWURADE sele Mose kyɛ,

²“Ka kyire Aarɔn ne ye mma mmienzua, ɔne Yisraelfoɛ amukoraa kyɛ, ‘Bɔ AWURADE ahyɛ hɔ ɛhe:

³Yisrael awuro ama ne, sɛ ebie ku nandwie anaa boaen akrɔngrɔma anaa abɔngye wɔ asikyeleɛ nu berɛ, anaa wɔ asikyeleɛ ne asi,

⁴ná wamva ye wamma ɛtena sua atenaleɛ anoa nu berɛ, wamma ammɔ afɔleɛ wamma AWURADE wɔ AWURADE ɛtena sua ne anyunu a, okoli mogya hagualɛ nwo fɔ. Waha mogya wagua, na odi kyɛ bɛpɛ ye asue befi maen ne anu.

⁵Ɛhe kɔma Yisraelfoɛ kɔfa b’afɔleɛ bɔ bɛbɔ ye wɔ ɛserɛ so ne bɛkɔbrɛ AWURADE. Odi kyɛ bɛfa bɛbrɛ ɔsɔfo ne maa ɔfa ma AWURADE wɔ ɛtena sua atenaleɛ anoa nu berɛ, ná ɔ́fa bɔ asomdwee afɔleɛ ma AWURADE.

⁶Odi kyɛ ɔsɔfo ne hwie mogya ne gua AWURADE afɔleɛ bokyea ne anwo wɔ ɛtena sua atenaleɛ anoa nu berɛ, ná ɔ́yera ɛloe ne maa ɔyɛ nwosina bɔ ɔbo AWURADE fona ɔ.

⁷Ɔnate ɛhe aso bɛngɔhɔ so bɛngɔbɔ b’afɔleɛ mɔ bɛngɔma mmosoen[4] mɔ bɔ besoma mbɔngye ne, mekyire mmosoen bɔ bafa bɛ nwo bawura bɛ sa ne. Ɛhe kɔyɛ ahyɛdeɛ afebɔɔ kɔma bɛ wɔ b’aworɛ ndoatoasoɛ mukoraati nu.’

⁸“Na sá ka kyire bɛ kyɛ, ‘Ebiala bɔ ofi Yisrael awuro anaakyɛ ɛwɔfoɛ biala bɔ waatena Yisraelfoɛ nu, sɛ ɔbɔ naen yeralɛ afɔleɛ, anaa ɔbɔ afɔleɛ biala,

⁹ná wamva wamma ɛtena sua atenaleɛ anoa nu berɛ wamma ammɔ afɔleɛ ne wamma AWURADE a, odi kyɛ bɛpɛ ye asue befi maen ne anu.

¹⁰ “Sɛ ebiala bɔ ofi Yisrael awuro anaakyɛ ɛwɔfoɛ mɔ bɔ baatena bɛ nu, odi mogya biala a, ngotu me nye ngosie sɔ sona ne aso, na ngɔpɛ ye asue ngofi maen ne anu.

¹¹ Ofikyɛ anwoɔnaen biala, ye ngoa wɔ ye mogya nu; na mafa mogya mama ɛmɔ wɔ afɔleɛ bokyea ne aso kyɛ ɛ́mɔfa bɛ́yɛ mbata bɛ́ma ɛmɔ kra. Ngoa wɔ mogya nu, yiti mogya yeɛ odi kyɛ bɛfa bɛyɛ mbata ɔ.

¹²Yiti mahã mahyire Yisraelfoɛ kyɛ, ‘Nnɛma ɛmɔ nu biala di mogya, yeɛ nnɛma ɛwɔfoɛ biala bɔ waatena ɛmɔ nu koso di mogya.

¹³Na Yisraelniɛ biala anaa ɛwɔfoɛ biala bɔ waatena ɛmɔ nu ne, sɛ oku kaka anaa anomaa biala bɔ bedi a, odi kyɛ ohwie ye mogya gua ase ná otu nnɛterɛ kata so.

¹⁴“Ofikyɛ anwoɔnaen biala, ye mogya yeɛ ɔte ye ngoa ɔ; yiti mahã mahyire Yisraelfoɛ kyɛ, Nnɛma ɛmɔdi abɔdeɛ biala ye mogya, ofikyɛ anwoɔnaen biala ye mogya yeɛ ɔte ye ngoa ɔ; na ebiala bɔ okoli mogya ne, odi kyɛ bɛpɛ ye asue.

¹⁵Sona biala, kuromani oo, ɛwɔfoɛ oo, bɔ okoli naenmvuin anaa naen biala bɔ kaka aboyaa bie ahu ye atete ye ne, odi kyɛ ɔpo ye nwo nningyein, ná ɔ́fa nzue bia, na ye nwo kogua fiɛ maa okoodwu nɔsoa koraka né ye nwo ate.

¹⁶Nakoso sɛ wambo ye ndaadeɛ anaakyɛ wammia a, ye de, ye musue kɔbɔ ye ti so.