Read Sehwi Lewitikɔso 18 Bible Online

Lewitikɔso 18 - Sehwi bible

Lewitikɔso 18

¹AWURADE sele Mose kyɛ,

²“Ka kyire Yisraelfoɛ kyɛ, ‘Me ole AWURADE ɛmɔ Nyameɛ.

³Misraim aseɛ bɔ né ɛmɔte so ne, nnɛma ɛmɔyɔ bɛ yɔleɛ ne bie, yeɛ Kanaan aseɛ bɔ méfa ɛmɔ mékɔ so ne, bɛ yɔleɛ ne, nnɛma ɛmɔyɔ bie. Nnɛma ɛmɔdi b’ahyɛdeɛ so.

⁴Ɛ́mɔli me nhyehyɛleɛ ne m’ahyɛdeɛ so, ná ɛ́mɔfa bɛ́bɔ bɛ bra: Me ole AWURADE ɛmɔ Nyameɛ.

⁵ Yiti ɛ́mɔli m’ahyɛdeɛ ne me nhyehyɛleɛ so, na sona bɔ okoli so ne, okonya ngoa: Me ole AWURADE.

⁶“Nnɛma ɛmɔ nu biala ne ye abusuaniɛ beyia nnaa. Me ole AWURADE.

⁷ Nnɛne eni bɛda ná ɛfa gua ɛse nyunu ase; eni ɛne, nnɛne ye bɛda.

⁸ Nnɛne ɛse aye bɛda; ɛse aye ɛne.

⁹ Nnɛne eliɛma brasua, bɔ yeɛ ɔte ɛse awa brasua anaa eni awa brasua bɛda, kyɛ bɛwole ye awuro berɛ oo, anaa bɛwole ye nekaa bie oo.

¹⁰Nnɛne ɛwa bienzua awa brasua bɛda, ofikyɛ wɔ bɔbɔ wɔ mogya ɔ, na ɔte nyanzoen nikye.

¹¹Nnɛne ɛse aye awa brasua, bɔ ɛse yeɛ ɔwole ye ɔ bɛda, ofikyɛ eliɛma brasua ɔ.

¹² Nnɛne ɛse aliɛma brasua bɛda; ɛse ne ye bɛte mogya ko.

¹³Nnɛne eni aliɛma brasua bɛda, ofikyɛ eni ne ye bɛte mogya ko.

¹⁴ Nnɛne ɛse aliɛma bienzua aye bɛda, nnɛkɔ ɔye anwo; wɔ maame ɛne.

¹⁵ Nnɛne wɔ sia brasua bɛda; ɛwa bienzua aye ɛne; nnɛne ye bɛda.

¹⁶ Nnɛne eliɛma bienzua aye bɛda; eliɛma bienzua aye ɛne.

¹⁷ Nnɛne brasua bɛda ná esa ne ɔwa brasua koso bɛda; yeɛ nnɛne ye anomaa brasua bɛda; ɛne bɛ bayɛ mogya ko, yiti ɔte musue.

¹⁸Yeɛ nnɛgya brasua boka oliɛma brasua so, nnɛne ye da wɔ aberɛ bɔ oliɛma brasua ne tɛ te ase ɔ.

¹⁹ “Nnɛkɔ brasua nwo ɛne ye bɛda wɔ mmerɛ bɔ wabu ye sa ɔ.

²⁰Nnɛne ebiɛngo aye bɛda, ná angua wɔ ne brasua ne nwo fiɛ.

²¹ Nnɛfa wɔ mma mɔ nu biala maa bɛfa see bɛyera ye bɛbɔ afɔleɛ bɛma bosoen Moleke, amaa ɔnate so angua wɔ Nyameɛ dumaa nwo fiɛ. Me ole AWURADE.

²² Nnɛma bienzua biala ɔne bienzua bɛda kyɛbɔ ɔne brasua bɛda ɔ; ɔte musue.

²³ Nnɛma bienzua ɔne kaka bɛda ná ɔnate so wangua ye bɔbɔ ye nwo fiɛ; yeɛ nnɛma brasua biala fa ye nwo ma kaka maa ɔne ye bɛda; ɔte musue.

²⁴“Nnɛma ɛmɔyɔ ɛhemɔ anu biala begua ɛmɔ nwo fiɛ, ofikyɛ maen maen bɔ méfoa bɛ méfi ɛmɔ nyunu ne, ɔnate sɔ yɔleɛ hemɔ aso yeɛ beguale bɛ nwo fiɛ ɔ,

²⁵Efiɛ hane aseɛ ne, maa yiti nduale ye amumuyɛɛ so kerɛ, na mmane aseɛ ne pole so mmenia.

²⁶Nakoso ɛmɔ de, ɛ́mɔli m’ahyɛdeɛ ne me nhyehyɛleɛ so, na nnɛma ɛmɔyɔ sɔ akyiwadeɛ nemɔ anu biala, kuromani oo, anaa ɛwɔfoɛ bɔ waatena ɛmɔ nu oo.

²⁷(Ofikyɛ aseɛ ne aso ama bɔ né bɛwɔ berɛ koraka yeɛ ɛmɔba ne, sɔ akyiwadeɛ hemɔ amukoraa yeɛ bɛyɔle ɔ, yiti efiɛ hane aseɛ ne.)

²⁸Sɛ ɛmɔfa efiɛ bɛka aseɛ ne a, AWURADE kɔma aseɛ ne kɔpo ɛmɔ, kyɛbɔ ɔmane aseɛ ne pole maen bɔ né bɛte so daa ne.

²⁹Ofikyɛ ebiala bɔ ɔkɔyɔ akyiwadeɛ hemɔ anu biala ne, odi kyɛ bɛpɛ ye asue befi maen ne anu.

³⁰Ɛ́mɔli m’ahyɛdeɛ so, na mmenia bɔ né bɛte aseɛ ne aso daa ne, akyiwadeɛ bɔ bɛyɔle ne, nnɛma ɛmɔyɔ bie, ná ɔnate so ɛmɔangua ɛmɔ nwo fiɛ: Me ole AWURADE ɛmɔ Nyameɛ.”